熟女愛漫遊

由最初5分鐘的期望,再用盡下半生的忍耐… 去睇完呢一套戲💀如果戲院繼續上呢一套戲, 我相信好可能要重新裝修...🚜

陶莎莎好靚好可愛啊, 🥰葉楓好型 イケメン, 輕鬆的消閒電影。

1.繼『PG戀愛指引』新晉導演蔡潔鈴事隔四年帶嚟「新作」，呢套『熟女愛漫遊』早喺2017年完成拍攝並喺2018年沖繩國際電影節進行世界首映。拖足兩年本身喺年初情人節檔期開畫，但多番改期下幾經波折終於喺今個月上映。.能夠改咁多次期，某程度反映電影公司對套戲冇乜信心先一改再改。不過電影如此卡士、題材同情節，就算擺乜嘢檔期上都係必死無疑。睇返當初拍攝時嘅資料，原來製作公司當呢套係網絡電影。.好，完全明白晒。-2.坦白講，我睇到一半至捉到要用咩角度去睇套戲，奉勸真係有興趣睇嘅朋友需要調節心態入場。.電影走日式少女愛情漫畫風格，情節較為瘋狂騎呢、演員演繹誇張再配合舊式電視台 gag show罐頭配樂。令我目定口呆必定係飾演旅館老闆嘅坂本明，次次出嚟大嗌「莎莎」跟住痴漢式擁抱衛詩雅，呢種莫名其妙嘅情節我覺得似抽水多過搞笑囉。-3.片首交代女主角嘅職業除咗係KOL仲強調佢係插畫師，但呢個設定喺稍後嘅內容毫無用途，全片淨係見到佢不斷拍片打文反而插畫就唔知去咗邊。.呢一種唔知做乜嘅精神貫徹整套電影。例如又係片頭嘅部份，衛詩雅搭的士去機場一邊VO講自己講落去日本嘅事，一邊加插港島區唔同地方嘅空鏡。問題係兩樣野根本扯唔上關係，明顯係拍攝時只係一鏡拍晒喺車廂嘅場面，之後發現如果配上咁長嘅VO會好單調而強行插入香港各地嘅空鏡。.如果我要睇景，就直接聽瞬間看地球啦，點解要睇你套戲啫？.不得不提全片最精彩部份，就係煙火大會衛詩雅陶醉喺煙花嗰一幕，忽然退地key佢喺一堆煙花中間，效果出嚟突兀但無厘頭地好笑。當套戲冇乜笑位笑得出時，忽然彈個柒到核爆嘅位出嚟總算幫手炒慶個場面。-4.拍拖多年突然男朋友話要分手，一直諗唔明段關係真正死因嘅衛詩雅，透過喺東京各種際遇令佢放低傷痛，重新振作更投入另一段戀情。呢個原則上係電影想講嘅內容。.但係電影絕大部份情節圍繞喺女主角同旅館幾位奇怪住客身上，不斷胡鬧喧嘩又忽然認真講出自己逃避嘅事，真真正正幫到女主角面對感情問題嘅人，只有兩個女角色 - 由陳鳳同陳逸寧飾演。.所謂開解女主角嘅場面，就係直接喺餐廳講一堆戀愛哲學嘅對白淋醒女主角。呢啲純功能形人物仲乾脆到只係出現一兩幕就再無出現。-5.雖然佢係以網絡電影為目標，以為佢成本有限一定會偷雞返香港拍攝。首先意想不到戲中都算較多東京嘅戶外拍攝場面，其次電影真真正正日本情節就喺日本拍攝，唔係好似『肥龍過江』咁㗎，最誇張客串一組嘅陳逸寧都要飛去日本拍攝添。.撞著慳皮嘅監製一定會諗盡辦法將相關場面搬返喺香港拍攝，無情情出機票錢請個演員過去拍戲個筆錢都唔野少㗎。-6. 另一個有趣嘅地方就係電影主景「山田館」原來係小津安二郎曾經長住嘅「茅崎館」- 即係『原諒他77次』阿Sa同柏豪要搵嘅嗰間旅館。-7.宣傳方面無論海報定預告片，都大大隻字打出「唐禹哲」令大家誤以為佢係男主角。實情佢戲份仲少過特別演出嘅周俊偉，加加埋埋都唔夠5分鐘。.睇返最近所拍嘅宣傳短片，唐禹哲都話自己係客串演出。片商煲到咁大應該有唔少粉絲中伏，咁嘅戲份仍然擺佢落領銜主演，係確確實實誤導觀眾囉。-

雖然故事一般，不過拍得幾靚

靚人靚景靚服裝，輕輕鬆鬆100分鐘！