功夫夢：傳奇少年

重來都冇睇過一套無論故事同人物一啲深度都冇嘅電影。導演似乎只想拍一套流水式簡單劇情嘅電影。全片劇情直線咁去，冇高低起伏，亦冇任何深入描繪嘅嘢，更加冇講故事技巧可言，人物/劇情轉折位話轉就轉，角色話出場就出場，毫無舖排，好突兀，係一套故事同人物都冇靈魂嘅電影，睇完係冇嘢會留喺個腦度嘅。此作唔值得入院，就算串流都有好多其他選擇。PS.• 男主角 Li 嘅選角屬趕客之選。

我好鍾意1984年嗰套Karate Kid，之後第二第三集每況越下，後來2010年成龍同Will Smith個仔合演嗰套簡直慘不忍睹！今集喺trailer見到成龍已經唔想睇，但可以見返40年前嘅老友Daniel、Johnny同Miyagi（死咗好耐，靠AI復活），於是今朝睇咗老人早場，故事單薄，差唔多老翻40年前第一集嘅情節，只係改少少，同將角色調換而已。成龍訓練李方，老翻袁小田當年喺蛇形刁手或醉拳訓練自己嘅畫面，冇乜新意！至於「新龍威小子」Karate Kid：Ben Wang又唔靚仔又唔有型又唔見好身手，當年Ralph Macchio比佢可愛唔知幾多，最後五區空手道比賽明顯抄襲1984年嘅比賽場面，但完全冇當年熱血沸騰、激蕩人心嘅效果，打得好hea求其打完收工嗰隻！唯一特別啲嘅係成龍演嘅韓師父用中國功夫、Ralph飾演嘅LaRusso用沖繩剛柔流空手道，一齊訓練李方去打擂台，強調中國功夫同日本空手道同出一源，係「一樹兩枝」！其他嗰啲父女情、母子情、師徒情、老少練拳、少男少女初戀、懷舊情⋯⋯都流於表面，甚至肉麻當有趣，無無聊聊，充撐場面塞時間，睇到好老尷，完全冇感人位！諗返當年睇Miyagi訓練Daniel嘅點點滴滴，如今只剩空虛同唏噓，此情可待成追憶 只是當時已惘然！

中規中矩，不沉悶，但也沒驚喜，正常戲劇功夫爆谷片！前2/3較慢，後1/3有些趕，節奏不統一，但冇乜廁所位，算系咁。打戲唔錯，但冇“九龍城寨“打得咁精采，睇落林峯打得好似勁D!主角Ben似後生成龍，但唔靚仔，但身手好，拍打片有前途！！！！Daniel 保養得幾好，唔似60歲，有看過前作Karate Kid 及Corba Kai 網劇的観眾該很感觸他能在大銀幕上再出現。成龍恰如其份唔扮後生，70歲做師父角色非常適合，佢中段再亂入後套戲似返功夫片，同Ben及Daniel產生到化學作用，學功夫橋段超老土但必須要有的，這種戲一定要有這些橋段。温明娜做Ben老母都唔错，但發揮空間不多，佢以前做過Street Fighter 春麗，如果佢今次有份打就過瘾了。此片不能超越之前”龍威小子”系列電影，但亦為此系列注入了新完素，令新世代體會此系列的魅力。希望有續集。62分（100滿分）

有娛樂性，但故事一般般

成龍就唔討論喇… 換咗佢相信會多好多人睇. Ben Wang 幾討好, 做得幾有信服力. 佢本人都好似係新移民. 因為創傷, 移民去外國, 人生路不熟, 要再新適應, 睇得幾有共鳴…