穿PRADA的惡魔2

3.7⭐因為大部分主要角色都有保留，而且外貌都保持到，除咗女主角果兩個死黨，明顯年紀大咗又肥咗，不過影響不大，戲份唔多。電影整體故事世界觀大咗，不再局限喺幾個角色之間，多咗不同財團同大人物角力，亦因此劇情亦多咗唔少零碎感同牽強位，唔似第一集咁劇情集中喺幾個主角互相拉扯。女主角繼續單憑個人一股熱血、傻勁同運氣，令不可能嘅任務得以完成，令身邊嘅人從心信服/感動，包括Runway惡魔，所以電影亦有唔少窩心位。不過女主角條新男友感情線非常薄弱，可有可無。整體電影卡士吸引，演技出色，大至上保持到第一集感覺，輕鬆暖心，以續集嚟講算係可以收貨。PS.• 女主角經過廿年專業記者磨練, 又攞過唔少獎, 返到Runway處事態度仍然似第一集初出茅蘆, 靠撞靠運氣, 似乎有點講不過去• Miranda 啲紓尊降貴位幾攪笑，例如坐經濟位、自己掛衫、去飯堂...😄• 光頭佬把聲沉哂沙哂咁

集體回憶，梅姨氣勢依然，靚人靚景無得輸！

靚人，靚景、靚衫，事隔廿年，不可能超越第一集，但順絮看情懷！

靚人靚景靚衫…睇到你對眼好忙，實在太多野睇！睇完個感覺其實有啲似Emily in Paris，橋段都係類近要幫公司/不斷被出賣/突然間要搵方法搵金主等等…不過呢套就再認真啲，真係搵到班名人/名模/名品牌負責人/名設計師/歌星等等去襯托番成套戲出嚟，豪華得嚟又唔突兀，睇得你舒服順眼！梅姨果種型格味道好正🙌🏻Anne / Stanley 組合更加無得輸，Emily為套戲加添詼諧氣氛…對白夠mean又抵死！

我為左睇第2集早幾日前先睇返第1集，係未知第2集講咩嘅情況下睇完第1集，睇完當下已經想知廿年前可以呼風喚雨嘅時裝雜誌，面對廿年後紙媒呢種夕陽行業會點。果不其然，第2集用返同一班主角同一性格寫返面對時代巨輪嘅洗禮係幾好睇。唔講紙媒沒落、智能手機當道，齋講第1集唔多見嘅有色人種，第2集通街都係；仲要有幾個鏡頭特寫明顯係LGBT嘅角色、戲中角色反諷「政治正確」嘅無奈、甚至最終解決問題嘅「白武士」都好政確；但電影某程度上又會父權，女主角有個浪漫帥哥男友，女角全部都要有男人支持、家庭做背靠，我已經分唔清電影係突登拍成咁反諷定點？本身對名牌無興趣，但無礙觀看Anne Hathaway逆天顏值+華麗衣裝，就算我係名牌小白，都知一套戲搵到咁多名牌贊助唔係易事（雖然套戲講Dior多過Prada）而且第1集主角經歷完奢侈再走返入平凡；第2集就算係高高在上嘅「惡魔」，都要搭經濟客機。講AI點樣會取代人類、一切繁華經過百年後都係一堆塵土嘅對白好精彩，大家面對新文明新沖擊都只能盡做啦！劇情無乜特別、扭橋近乎沒有，第2集最殺食部分果然都係睇返第1集嘅情懷吧。本身都無特別喜歡呢個系列，但2日前先睇完第1集所以印象深刻，角色面對時代巨輪車埋黎個下係我最鍾意睇嘅點，所以我臭直男覺得第2集比較好睇。

故事最好睇反而係講呢20年紙媒嘅變化，而令到人物嘅工作環境改變，但又保持住性格上特點，其實真係睇到好多感慨！