奧德賽

如果你係諾蘭Fans，《奧德賽》都係十足嘅諾蘭風格，你一定會喜歡（包括小弟）。諾蘭每套電影其實都有個種「命定論」，《奧德賽》如是。主角奧德修斯無論點補救，都係會團滅，只不過今次由虛無飄渺嘅命運變成比較實在嘅眾神。而其實希臘神話都極多預言，例如今次無出場，但係「特洛伊戰爭」大放異彩嘅阿基里斯，一早預言左佢會死（弱點腳踝/阿基里斯腱亦係命定嘅弱點）；或者宙斯老豆都被下過詛咒，預言佢必定被兒子推翻，所以吞晒所有子女，經歷一串事件，最後宙斯果不其然推翻父親成為眾神之王。整部希臘神話同諾蘭嘅相性非常合襯，本身題材已經非常適合諾蘭發揮，加上神級演員陣容，睇親諾蘭都係演技大享受。《奧德賽》已經係近年最易明嘅諾蘭電影，剪接上雖然都有啲非線性敍事，但比起《奧本海默》更小，係略嫌獨眼巨人個part有點混亂，整體電影節奏都幾好，3個鐘都好緊湊。實景處理都係諾蘭一貫風格，衣裝華麗戰船都唔錯，係隻木馬同特洛伊個城牆太流。不過今次隻巨人同班豬仔點都要用CG處理啦掛？雖然我就無睇過《奧德賽》，但戲前戲後都叫做過功課，諾蘭的確將呢個神話故事拍得幾好，叫做平衡到神性同人性。其實故事都主要講人類嘅殺戮，作孽嘅都係人類，Zeus's Law遵守與否都係由人類主導，不過係電影人在做天在看。可惜「木馬屠城記」不斷係現實世界再上演，到底有無宙斯睇住，大家心知肚明，我一個小小電影迷，睇完套戲9up幾句自己反思下算。

前段都多對白，亦比較平淡；中段出現怪物食人就開始嚟料，有番啲起伏！之後有好幾段來自不同人物嘅分支。個倒敍法都幾欣賞，透過零碎記憶去交代返成個故事！套戲的確係有少少長但唔會悶，都幾好睇…好認真嘅大製作！👏🏻👏🏻

本年度最矚目之一的電影《奧德賽》未上映先有大幅關注，對於DEI爭議個人先不討論，今天我想集中在Christopher Nolan對於重拍希臘同名神話的定位取向，劍走偏鋒不走大路方向拍出一段段歷險旅程，而是將重心放在一個被自我反噬的史詩式故事，接近三個小時去剖析一個男人的高山低谷心路歷程，將每一段奇幻旅程輕輕帶過，大部份文戲之下仍然能拍得鏗鏘有力，正正是Nolan的魔力之處。貫穿電影的重心在於宙斯法則(Zeus's laws)，主人必須熱情地款待客人，因為敲門的客人可能是神喬裝，客人則不能喧賓奪主，互相尊重維持文明的基本秩序。文明與野蠻之間的分畀線在於主客分明，奧德修斯離家而去多年後，一眾求婚者欲迎娶皇后Penelope掌握皇位，求婚者們一直霸佔奧德修斯的家甚至對於其子Telemachus惡言相向，打著宙斯法則的旗號去滿足一己私慾，扭曲神的旨意，打破人與人之間的關係的平衡；奧德修斯一行人戰勝後凱旋欲歸家時，強行擄掠途中的村落，搶掠之餘更火燒其家園，奧德修斯主動打破宙斯法則。由此可見人性醜惡並非單一偶發性事件，而眾神早就料到人性的醜陋，但諸神並未有對人類作出直接的懲罰，耗上十年時間讓奧德修斯深深體會到自己正正就是人所避之的「海上來的人」，再由奧德修斯親手整頓文明，再讓他為自己的罪孽作出補償。奧德修斯擁有過人的智慧及領導才能，無疑地特洛伊戰爭的確靠他的計謀才取得成功，但成功背後卻隱埋著對西農的謊言，犧牲戰友的性命去換取第一個成功，人性早就在這一此作出改變，勝利和成功逐漸沖昏頭腦，甚至認為自己可以與諸神作對，一步步被自我反噬，最後回望自己才是預言之下打破文明的那群人的首領，一個男人的高山低谷Nolan都拍得淋漓盡致，正正就是電影《奧德賽》的魔力。對於網民對於電影的爭議多多少少在於DEI、對白過於淺白、將歷險過程草草帶過，我個人認為對白上未見有太大問題，反而劇情在前段略顯拖沓不乾脆，令觀眾未能早早進入節奏之中，Tom Holland飾演的Telemachus劇情部份最為拖沓，可能因為這個角色前半段的作用主要在於透過問話去呈現出奧德修斯出海經歷予觀眾 ，發揮不大並感難以承接每個回憶片段之間的接駁位。

電影本身 .... 4⭐左膠不以常識去選角 .... -1⭐所以整體我只能比 .... 3⭐本人並非希臘神話專家，只略有認識，當中同原著有幾大分別我唔清楚。正所謂冇比較冇傷害，從一般觀衆角度去欣賞，仍然覺得本片唔錯睇，故事劇情流暢，主要演員演出不俗, 演譯同對白編寫具鬼佬文學 feel, 但不沉悶。奇幻大場面未至於非常精彩，但尚算不俗，有啲 production 睇下，不過木馬屠城過程設計有啲兒戲同唔夠浩大。以娛樂電影角度係可以一看，不過電影節奏再快啲會更好, 冇乜必要173分鐘。-1⭐係不滿電影唔用常識去選角，除最具爭議性黑人女演員色演希臘白人美女角色外, 其實好多唔顯眼群眾角色如士兵、宮女、平民都有唔少非洲裔、印度裔、亞洲裔老臨，試問古時交通咁原始落後，咁多不同種族點可能可以移民？而且當時咁講求種族、血脈同社會階級，外來種族點可能平等活於同一希臘文化國度？重可以同王帝一齊並肩出征？更可以入圍參加選夫大會？....唔好玩啦！做人請不要太左毒上腦，講下常識好冇！PS.• 好彩 Nolan 唔敢太放肆，避重就輕，啲左膠選角戲份唔多，又或只係群眾演員，未至於好影響整體觀影感覺，但唔支持以極左膠思維, 唔用常識去選角/拍電影，所以要懲罰性扣一⭐，已經好比面。• 如果第時荷里活開拍射鵰英雄傳，係咪可以搵香港嘅非洲王子做男主角郭靖？佢識講廣東話添呀！🤣🤣🤣 真係咁拍嘅話你收唔收貨？• 此作在奧本海默之下，亦唔覺有特別大嘅亮點

呢套一套畫面華麗、技術精湛嘅鉅作，再睇多少少發現有人評價電影脫離咗原著所講嘅人性混亂，改為以陰鬱嘅方式去講Odysseus嘅創傷。電影嘅視覺效果堪稱完美，有令人嘆為觀止嘅攝影、出色嘅場景設計同動人嘅場面。然而，撇開咗技術上嘅讚賞，劇本出現咗少許嘅缺陷。Nolan用左一種冷冰冰嘅美學風格同埋難得係Rated R卻不好好利用將一啲戰鬥場面升級，令到諸神同經典嘅神話場景冇左一啲應有嘅恐懼感，就例如電影中個場黯然無光嘅獨眼巨人。電影最大敗筆在於臃腫嘅敘事結構同埋選角失誤。Matt Damon, Anne Hathaway同埋表現出色嘅Samantha Morton試圖將電影昇華，但Zendaya同Ton Holland嘅選角令人好失望，佢哋就好似係為迎合製片方而存在嘅花瓶角色。劇本都放棄左好多引人入勝嘅主題設定，例如係船員之間嘅緊張關係同埋理性同迷信嘅衝突，轉而強行加入一條冇說服力、支線過多嘅搵老豆劇情，導致高潮部分冇左應有嘅緊張感。不過對於好似我唔太深入了解原著嘅觀眾嚟講，呢套絕對係驚艷嘅視覺呈現。

"你的聰明會惹來麻煩。""這就是你們的真正本性！""我們把人與人之間的脆弱連結。"成套戲overall覺得比Christopher Nolan大導演嘅上套佳作-奧本海默 Oppenheimer更緊湊好睇。套戲講述特洛伊戰爭一役取得勝利後，奧德修斯同一眾部下欲乘風破浪經海路返回家鄉古希臘，不料喺海上迷失方向又補給不足，途中更面對可怕對手包括獨眼巨人、巨型盔甲戰士、施行神秘法術嘅女巫......令回家過程一波三折、於他鄉流浪多年～同一時間，希臘城一直處於無王管狀態，喺希臘城苦守管治多年等候奧德修斯回家嘅太太同兒子更面對內憂外患，意圖奪取王權嘅勢力野心逐漸顯現，奧德修斯同太太兒子面對形勢複雜、荊棘無途......不得不讚電影嘅情節對白處理好有張力同埋有一番用意意味，通過奧德修斯回家前路坎坷嘅經歷去反思戰爭帶嚟嘅得與失、感受出故事情節當中嘅因與果、奧德修斯漂白他鄉多年嘅個人自省同對未來應對態度。值得大讚電影嘅視覺效果、音響、美術、服裝造型、攝影、剪接、動作戰鬥場面等等各方面技術皆做得極出色，好震撼呈現出電影場景情節。