#被偷走的勁歌 #PowerBallad #antman人生如歌大家好，我是 Wild Wildy！今日同大家傾下 2026 年最新上映嘅音樂喜劇劇情片——《被偷走的勁歌》（Power Ballad）。呢部戲由愛爾蘭著名導演 尊卡尼（John Carney） 自編自導，講到佢嘅代表作，相信鍾意音樂電影嘅朋友一定唔會陌生，包括《曾經。愛是唯一》（Once）、《一切從音樂再開始》（Begin Again）同埋《初戀無限 Jam》（Sing Street）！今次嘅演員陣容同樣有驚喜，由大家非常熟悉嘅「蟻俠」 保羅活特（Paul Rudd） 飾演過氣婚禮歌手 Rick，以及本身就係人氣音樂人嘅 尼克強納斯（Nick Jonas） 飾演偶像男團出身嘅 Danny。喺 IMDb 拎到 7 / 10，而 Rotten Tomatoes 爛番茄度更加得到 87%（影評人）/ 84%（觀眾） 嘅高分好評！我喜歡音樂，沒期望下反而有驚喜。我7.5-8分！講電影之前，先同大家科普下乜嘢叫做「Power Ballad」：呢個詞通常指一種情感非常澎湃、濃烈嘅搖滾或流行抒情歌。歌曲通常由緩慢、內斂嘅獨白或自省式旋律開始，隨住劇情同情緒推進，慢慢堆疊、爆發，最後入到一個好高亢、好具戲劇性同震撼力嘅大結局結尾。歌詞多數圍繞住愛、心碎或者渴望，完全係用嚟俾歌手盡情展示音域同爆發力嘅。讚：電影前半段嘅鋪排真係令人睇得好溫馨、好投入。首先不得不讚嘅，係佢嘅主題曲《How can I write a song without you》真係超級動聽，旋律一出，直情係直擊靈魂，完全承襲咗導演一貫高水準嘅音樂審美。首歌是導演和另一音樂人手筆 （written collaboratively by the film's director, John Carney, and singer-songwriter Gary Clark）整部戲透過婚禮獻唱玩咗好多經典舊歌巡禮，音樂感滿分。最令我驚喜嘅，係無諗過「蟻俠」 Paul Rudd 唱歌原來咁勁！佢嘅音域非常之闊，飆高音嘅時候真係真音頂上去，完全無欺場。而飾演後生歌手嘅 Nick Jonas 由於本身就是職業音樂人，演起呢類角色自然駕輕就熟，兩代人嘅化學反應火花十足。（歌手/樂隊想紅是命及運）故事中間嘅反轉位亦做得非常精彩，完全意想不到。更難得嘅係，編導喺戲入面加插咗好多笑點，節奏輕鬆，但同時對親情同人際關係嘅描繪又極之細緻入心。特別有一幕講到主角「連至親都唔相信自己」嘅時候，嗰份無奈同痛楚，電影刻畫得好深刻、好有渲染力。故事同笑點好似汽球同微風咁完美相輔相承，而個結局我亦都頂滿意，帶點遺憾卻又無比真實，呢啲就係人生。彈：雖然套戲整體真係好睇，但上映之後，我聽到身邊一啲「老友記」嫌呢部 90 多分鐘嘅電影節奏有啲拖。我自己就覺得，呢班觀眾主要係因為無經歷過「作曲」呢個創作過程。好似我自己咁，當我兩個小朋友出世嘅時候，我都各自為佢地寫咗一首歌（可惜係用普通話填詞，無用廣東話，因為廣東話九聲六調填詞真係難好多！）。只要你有過作曲、做音樂嘅經驗，你就會明白電影中音樂人之間嗰種交流、執著同碰撞，根本就唔係「拖」，而係最真實嘅靈魂共鳴。不過，電影嘅宣傳同定製確實有啲問題。首先係個預告片（Trailer）好似劇透得太多，基本上將好多關鍵情節都塞晒入去，減低咗入場時嘅新鮮感。而且喺入場初時，個情節一度令我以為導演係抄襲《玩轉極樂園》（Coco）——又係嗰種偷咗人哋嘅歌自己變紅、最後「水」咗大眾成為超級巨星嘅情節。雖然之後嘅走向同探討嘅出發點好唔同，但一開始真係會令人有種被 Coco「飲咗頭啖湯」嘅既視感。最後想彈嘅係發行商嘅宣傳，真係做得很不濟！明明有 Paul Rudd 呢個咁大牌、咁入屋嘅 Marvel「蟻俠」做主角，宣傳嗰陣應該用佢嘅大頭做賣點去 Sell 啦！依家搞到套戲好似變咗好文藝、好小眾咁，差點就埋沒咗一部咁好嘅作品。
顯示更多
收起
21
4
0
