UFO離奇命案

電影雖然只有86分鐘，不過短小精幹，充滿創意，天馬行空，能自圓其說，圓滿結束。此作肯肯定超低成本，但想像力之豐富，令電影具趣味性。劇本對白生動，演員出色，MVP 絕對係陳湛文，角色幽默攪笑，又為藝術犠牲，我係笑得出嘅。👍本片係有誠意創作嘅作品，瘋狂又輕鬆，具娛樂性，係值得入場欣賞嘅。PS.• 又一次證明拍電影創意係第一，唔一定要千萬金元去堆砌，好似果啲什麼1994• 作為觀眾/消費者，我寧願睇一套相對較短但好睇嘅低成本製作，好過睇一套又長但沉悶嘅大堆頭大製作• 冇 budget 亦唔一定只可以拍獅子山下• 電影需然冇講明，但應該都係以昔日華富邨UFO事件作背景• 電影係類似彭浩翔"買凶拍人"果類天馬行空式故事

#ufo離奇命案 #unidentifiedmurder大家好，我係 Wild Wildy！今日同大家傾下呢部 2026 年最癲喪、最玩嘢嘅港產黑色幽默懸疑科幻片——《UFO離奇命案》(Unidentified Murder)。呢部戲由兩位新晉導演郭家禧 (Jack Kwok) 同李振傑 (Jack Lee) 聯合編導。講起兩位導演，郭家禧之前執導過港版《大叔的愛》、《百萬同居計劃》，搞笑節奏一向有保證；而李振傑就做過好多大片好似《美人魚》、《催眠·裁決》嘅副導演，實戰經驗夠晒紮實。演員陣容方面，有2018年最佳新人奬凌文龍 (Luka Ling) 、女神楊偲泳 (Renci Yeung) 飾演佢嘅網紅女友、仲有近期老是常出現嘅陳湛文 (Louis Chan)、林子傑 (Ronald Lam) 以及型佬黃德斌 (Kenny Wong)。呢部戲早前喺第 22 屆香港亞洲電影節做「神秘場」放映嘅時候，已經全場爆發掌聲，仲攞埋香港電影評論學會大獎嘅「最佳編劇」同「推薦電影」添！嚟到第 44 屆香港電影金像獎，仲一舉入圍咗最佳編劇、新晉導演同最佳男配角 3 項提名！依家即刻同大家睇睇國際影評網嘅評分：IMDb: 7.2 / 10對於一部預算得 300 萬港紙嘅低成本港產片嚟講，呢個成績絕對係超班。好，入正題，即刻同大家「先讚後彈」！呢鋪編導有限budget玩得最大，劇本有心思，節奏拿捏得宜！首先，我必須要大力讚咗個劇本先。300 萬筆直要拍 UFO 外星人？聽落都覺得係咪玩嘢？但兩位導演兼編劇好聰明，無去同你硬碰硬搞荷里活式嘅 CG 特效，反而係將重點擺喺「戲中戲中戲」嘅精妙結構。導演好大膽咁採用咗倒敘、插敘、甚至多視角重疊嘅敍事手法。成個故事好似剝洋蔥咁，一層一層解開事件真相。最難得嘅係，兩位新導演對電影節奏嘅拿捏異常成熟，完全無拖泥帶水，86 分鐘嘅片長，一氣呵成，反轉一浪接一浪！講到黑色幽默，呢部戲真係玩得幾盡、幾癲喪。佢唔係用低俗、格硬塞畀你嘅爛 Gag，而係透過荒誕嘅情境（例如大家一邊要掩飾命案，一邊要自圓其說去應付外星人），引爆出極具諷刺意味嘅笑料。當中最正、最搶鏡嘅功臣，絕對係陳湛文 (Louis Chan)的”方法演技”！同凌文龍一冷一熱+林子傑有化學作用。而且陳湛文有唔錫身演出，直情係全片嘅靈魂人物！雖然好睇，但冷靜落嚟，有幾個位我都要「彈」兩句。第一，雖然劇本好有心思，但身為資深影迷嘅我，定眼一睇，其實會見到好多前人嘅影子。電影入面嗰種「一連串無厘頭嘅意外加意外，最後雪球越滾越大演變成大災難」嘅套路，好明顯有銀河映像《意外》或者《暗花》嗰種宿命論同黑幽默嘅影子。新意係有，但始終未算完全擺脫到前作嘅既視定勢。，結構精巧到令我想起當初睇日本神作《一屍到底》(One Cut of the Dead) 愈拍愈大鑊嘅感覺~ 甚至劇本上我覺比"再見UFO"更好，因為前者主線角色太多不夠聚焦，亦和UFO無甚關係... 但今個聚焦多了。 第二，劇本喺細節上其實有幾明顯嘅犯駁位。電影嘅核心舞台係「東頭山」，戲中講到幾路人馬（網紅、黑幫、警察、外星狂熱者）喺山上面兜兜轉轉、撞嚟撞去。但大佬啊，東頭山咁大個山頭，你哋好似行街行旺角咁，行兩步就撞到正一正，仲可以咁精準咁喺同一個點發生命案、交收、埋伏？呢種巧合一次就話係宿命，出現得太多次，就略嫌刻意。最後，我想講講關於「UFO / 外星人」呢個設定。睇到尾你會發現，其實到底真係有外星人，定係一切都只係角色們各懷鬼胎、各取所需嘅「主觀解讀」同「意願」？ 我略嫌在今天已足夠證明有”非人類智慧生命體”，電影結局玩味十足，但未能滿足我等要求。片初有講alien abduction，當事人失去記憶，甚至消失的一小時等等... 但最後只是淪為引言而沒下文有點可惜。總結：《UFO離奇命案》係一部充滿誠意、創意爆棚嘅本土黑色喜劇。雖然犯駁位同巧合位一定有，但兩位新導演用 300 萬筆直拍出一部結構複雜、節奏明快、而且真係令到全場爆笑嘅作品，我個人絕對收貨！我畀呢部戲：7.5-8 / 10 分！值得買飛入場支持！大家睇咗未？你哋覺得最後到底有冇外星人？定係一切都只係都市傳說？歡迎喺下面留言話我知！ 記得 CLS 我，comment, like, share，我哋下一部戲再見，Bye Bye！

睇得出係超低成本製作，但都反映到好戲唔一定要超多資金嘅大製作。非常欣賞係港產片式微嘅當下，仲有班人搞盡腦汁想拍不限於「鏗鏘集」嘅小本搞笑電影比香港人。無錢就主打創意，全戲就係玩反轉再反轉劇情，多視角敍事唔係咩新野，對上有大師級是枝裕和嘅《怪物》；但香港拍呢種技巧都唔差，加埋適當嘅笑點令成個故事好生鬼同貼地。演員有黃德斌做上把位引領劇情；亦有下把位陳湛文充當笑點（佢都大犧牲）；加埋靚女擔當Renci，可以話呢班演員選角活靈活現。UFO只係引子，一心想睇外星人嘅觀眾可能失望，但如果係想睇無厘頭+搞笑+黑色幽默電影，而劇情瘋狂反轉但都尚算合理（其實要係黑色幽默電影中平衡到合理性好難，例如《死屍死時四十四》我就覺得劇情唔好睇），真係強烈推薦《UFO離奇命案》比大家！

故事有創意，陳湛文演出出色，因帶太大期望入場，有點過譽！

值得一刷二刷三刷好耐冇睇港片咁HighMVP是陳湛文劇本非常扎實

想起《屍殺片場》，認真地說故事，帶點荒誕娛樂性豐富。值得支持的港產片。