贖夢

個人覺得套戲是不俗，張導整體的執行同處理均比他之前為好。講真，作為他當導演第四套片，他今套無論在調度、場面處理同講故事的技巧，也比之前的更為純熟同紮實，雖然他想講的元素很多，但他卻一一可駕馭到，整套高度也可維持，不會有虎頭蛇尾的情況。咁當然美術燈光也是大大幫到套戲，這兩點好大大令套戲的質感有大幅提升。我會形容套戲是有靈異元素的奪命金，用靈異包裝，但內裡卻好講金融道德同其衍生的因果報應，這方面張的執行無疑是好，劇本的熟成度高，可以一環扣一環，不會左跳右跳（除了那個巨星級客串那十分鐘外），這點已經值得讚。咁當然講演繹，無論是張導自己、劉謙、法拉以至一眾配角也是好睇同恰如其分，張導當下的演繹無疑是有進步。而劉謙同朱晨麗演醫生同護士好到位。唯一需挑剔應該是劉謙這個人設有點過強。醫生可以當偵探會做的事。PS：今次電檢對他真是好鬆手。痴·影·夢·藝 X 的專頁 https://www.facebook.com/ckwunmovie/

3.8⭐一部關於做壞事、發惡夢、心靈救贖嘅驚憟電影。本作話題當然係張家輝第四次執導作品。整體作品各方面都比上幾套進步不少，水準唔錯。講故事技巧抽象得嚟有次序同有層次，發夢同現實嘅穿插唔會亂哂章，劇情一步一步推進，背後真相一幕一幕揭開。收尾結局亦完整，唔會睇到一舊雲。悪夢場面設計亦見心思，有夢嘅感覺，亦唔太玩 jump scare，主要玩影像同氣氛嘅結合，值得一讚！以低成本製作算玩得唔錯，張家輝大可向導演之路繼續前進。演員方面，今次值得一讚嘅MVP係陳法拉，演出突破靚靚形象，令人眼前一亮。劉俊謙演沉鬱角色架輕就熟。而劉俊謙"知心"助手朱晨麗屬配角，角色設計有趣，亦令電影有唔少幽默位，令觀眾留有印象，但對故事又冇好大嘅影響，純粹調劑一下沉重嘅電影氣氛，同介紹男主角認識佢果位重量級客串朋友。反而張家輝本作嘅演冇佢嘅導咁大發揮同進步，只屬中規中矩。整體嚟講故事唔算好特別，但編、導、演各方面執行起上嚟都唔錯，亦睇得出花咗唔少心思，以低成本製作實屬對得住投資者同觀眾有餘，值得入場欣賞。PS.一開場許恩怡果個惡夢設計、分鏡、剪接都做得唔錯，出嚟嘅影像效果幾出色，要讚！

張家輝第四次執導，作品依然偏向驚慄，帶點陰暗的電影題材，前三套作品我只看過陀地驅魔人(2015）但我對電影完全零印象，另外兩部評價則一般，到底演而優則導係咪真係適合渣渣輝？.首先想講贖夢的宣傳幾成功，以戲中角色蔡辛強開Threads引來迴響，上映前落廟街解夢亦好有Gimmick；不過上映日謝票場感覺麻麻，我看的映前謝票有張家輝，劉俊謙，朱晨麗以及袁綺雯。觀眾未睇戲都預左演員講兩句，影張大合照。家輝哥好吹得，都講左成5分鐘，但內容大概係戴定頭盔…唔緊要，但另外3位演員接近無出過聲，無分享過，劉謙只有一句「家輝哥講得好好，我無野講」，朱朱現身謝票同電影演出一樣花瓶…….講返套戲，「夢境」加入唔少Jump Scare，驚慄氣氛營造算不俗，但感覺是為嚇而嚇那種，當中夢魘只是加插少許表面線索，實際對主線劇情幫助不大。其中有幕劉謙出浴跌落水中，前半除了觀眾福利，我都唔知想表達什麼；後半應該是心理學中的冰山理論，講潛意識中不為人知的秘密，但電影未有解說，或者要等網上解讀吧。.感覺電影花太多心神去營造氛圍，兩條主線劇情相對簡單。如果可以多點實幹去講故事及塑造人物，取得平衡會更佳。例如陳法拉的角色夠癲，但我看不出她跟張家輝有多恩愛，有多大打擊以及有多需要老公陪伴。而朱晨麗的花瓶性大到連劉謙同老豆和解都要企響門口微笑，這個Close Up是有何作用？.隱藏人物是有驚喜，最後彩蛋亦有解讀空間，揭示另一真相。其實整體電影觀感還好，演員是加分的，院長大戰一場以及街上狂奔一幕我挺喜歡，但若認真去思考劇情細節，好像有不少犯駁位。.家輝哥其實專注做演員幾好，挑戰唱歌同導演仍需努力。.觀影平台: 高先電影院.IG: AndyMyFilmography/ #AndyMovieReview

“發夢總是無情地將你內心的秘密反映出來。”“是要金錢，還是要朋友？”“醫治你的方法只有一個，坦白承認你的過去，重要面對現在的自己。”劉俊謙飾演為求盡快根本性地醫好病人而踩過界介入病人生活嘅精神科醫生Dr.Man，工作身邊有關鍵時候適時幫手解難提供重要資料、為佢赴湯蹈火嘅護士Donna(朱晨麗飾演)，遇到晚晚都發惡夢嘅精神病人蔡辛強(張家輝飾演)，喺處理呢個極度複雜嘅病人case同時亦知道佢身邊瘋瘋癲癲嘅太太紀慧玲(陳法拉飾演)，逐步揭開蔡辛強不為人知、極度罪疚嘅過去，同時亦勾起醫生自己不堪回首嘅童年過去......劉俊謙喺成套戲入面飾演Dr.Man由頭帶到尾，尤其喺後尾好顯現出自己面對過去嘅恐懼；張家輝好顯活出被惡夢過去纏身嘅精神失常病人；久違喺港產片出現嘅陳法拉飾演因投資嚴重失利變成瘋癲婦人表現得好破格搶眼；朱晨麗飾演護士Donna表現出關鍵時候協助Dr.Man。另外，想提及許恩怡、李凱賢Brian、袁富華Ben哥令人印象深刻嘅演出，仲有估唔到有位大大粒明星驚喜特別演出即使對佢個角色存有好多個問號問號？？？？電影入面好睇得出何謂“貪字得個貧”，需坦承好好面對自己嘅過去錯失同作出行為帶出嘅後果甚至代價。凌厲突出嘅影像處理、特效音響好令觀眾代入電影入面角色惡夢纏身嘅境象。家輝哥久違大開金口唱主題曲“永遠的失眠”，唱出電影故事同入面角色嘅處境感受。

故事劇情都比較容易猜測 但整套電影嘅處理手法感覺創新 雖然有一些個人認為不需要的驚嚇場面 但看得出亦是用心製作 感謝張家輝為香港電影作出的努力 值得各位入場欣賞

有驚嚇位有意思演員演得好風格也好