乘著光的幻想

至少對香港嘅觀眾嚟講呢套戲真係非常之印度，嗰啲階級觀念盲婚啞嫁、第二女主角同個男朋友談戀愛好似俾人唱到好大件事好大嘅醜聞咁、一開頭個醫生着到奇乸怪怪咁同女主角喺條橋度想追佢送本嘢俾佢原來係寫詩俾佢，但係又唔知點樣要拿低條褲攞本嘢俾佢；第一同第二女主角攞隻貓去俾個醫生照吓肚裏面有幾多隻小貓，第二女主角同醫生講咗幾句笑啫，第一女主角之後就鬧佢問佢做乜flirt 個醫生等等等等，老實講香港觀眾一般會覺得好奇怪,睇到R晒頭，感覺上有啲似睇緊Bollywood或一啲極度誇張嘅印度戲一樣，有啲culture shock。我對上一套有印象嘅印度電影係頗多年前嘅打死不離三兄弟，記得幾好睇，雖然都有啲Bollywood歌舞，但起碼劇情接近現代沒有感到難入口，但此片睇影片介紹係康城影展獲評審團大獎載譽上映，反而身在香港觀眾（我）睇落其實真係有啲突兀，未必接受到高潮欠奉嘅劇情，成兩個鐘劇情推進都頗為慢，我甚至留意到喺我隔籬嘅自己嚟嘅一個男觀眾睇到一半瞓着咗。成套戲就係要去了解印度嘅男女不平等呢方面嘅落後同荒謬，對理解印度呢方面嘅文化嚟講係用咗兩個小時去令我有一定嘅認識同令我有深刻嘅印象，但從電影欣賞角度去睇，恕我睇唔出呢套電影喺無論劇情、說故事方式、拍攝手法、配樂或電影美術方面等等有幾何觀同有何突出之處。