超越

1.宏寰文化近期可算搞作多多，由上年年尾喺北角滙開設自家戲院ACX Cinema、參與投資多套中外電影、開拍港片兼且涉獵電影發行。『超越』正正係其中一套投資嘅戲，戲內更大肆植入自己公司名喺開首亞運會賽事當中添。.不過嚟緊大家一定會認識呢間公司，因為教主Anson Lo電影處男作『假冒女團』就係佢哋出品㗎啦。聞說電影暫定年底前上映，相信唔少教徒定必幫電影進行鋪天蓋地嘅宣傳，又再掀起打卡新浪潮。-2.言歸正傳，宏寰其實亦有參與投資天下一出品嘅『媽媽的神奇小子』，無獨有偶同『超越』涉獵嘅題材極其相似 - 同樣以跑步運動員為主，講述佢哋退役後嘅困難等。宣傳句語上感覺亦頗為接近，但宣發攻勢截然不同，畢竟套戲喺香港顯然冇市場，就算sell跑步都唔夠人哋爭啦。.最近咁多運動題材電影，唔多唔少想食奧運條水嘅。自己對華語片興趣越來越大，所以繼續未睇預告就決定入場。當日去到宏寰自家戲院觀影，除咗我就僅得一對不斷傾偈嘅外籍情侶同場，可謂反應都幾嚴重慘淡。-3.鄭愷因需演繹角色兩個極端階段狀態 - fit到爆嘅驕傲運動員同中年發福失意商家，開拍前操到勁fit但拍攝期內短時間極速增磅。欣賞同佩服佢有咁嘅毅力為角色去到咁盡。.外型極大反差幫助佢投入角色狀態，不過電影主要問題係劇本發展未如理想。現時太刻意將佢兩種身形相對平均咁展示俾觀眾睇，個人認為佢年輕當打嘅回憶戲唔使咁重，尤其係同李昀銳嘅關係描寫。假若由荷里活處理呢個故事，基本上『超越』會係電影頭45分鐘內嘅劇情，因為佢只有「起承」嘅效果。.以為電影後段會俗套啲，講鄭愷受到李昀銳「激將法」後接受邀請，決定協助訓練佢籌備迎戰東京奧運，從而進一步幫助兩人互助互療。點知卻未有如此發展，簡直反高潮！-4.當主角們聚首一堂食飯敘舊，飲酒吹水講講下變成互揭瘡疤，最後乾杯決定永不相見時，曹炳琨講出「願我們出走半生，歸來仍是少年」一幕係成套戲最深刻嘅位。人到中年回望燦爛往蹟而未來毫無希望係無比嘅唏噓。.就如『媽媽的神奇小子』所描述，退役後要面對殘酷現實，一剎那光輝唔係永恆，無限眷戀往日輝煌係毫無意義，要學會接受放低。.主角以往作為短跑選手，一直視跑道上嘅重點係佢嘅目標，作多項訓練從而希望縮短到達終點嘅時間。但完成「運動員」呢個終點後需要轉換人生跑道，同樣要向着目標前進，而今次終點唔似以往咁明確。-5.不過做人處事要揀啲有把握嘅嘢，主角選擇喺唔熟悉嘅範疇盲目投資兼遇人不淑，令佢泥足深陷。佢當年講出「你太想贏了，所以就注定輸」，偏偏現今自己正墮入如此輪迴。.少有地睇完越諗越有點鍾意嘅戲，或者最終故事唔落入俗套就係想寫實啲。

平時好少睇大陸電影，但難得鄭愷做主角。鍾意睇勵志電影嘅人就一定會鍾意，值得一睇👍🏼