非常爆…內幕

見慣大場面的金牌電影監製大賓哥(羅拔狄尼路)出盡法寶，拉攏女強人 (嘉芙蓮堅拿) 投資鬼才導演的新作，又邀得影帝辛潘主演，兼有機會成為康城影展開幕電影，齊齊行紅地毡。 一切順風順水之際，爆出新片爛尾風波！導演堅持風格，老闆一怒閂水喉；影展臨近，賓唯有見招拆招。 一波未平一波又起，與第1任前妻所生的乖女竟與吞槍自殺的明星經理人有一手？第2任前妻 (羅賓活麗萍) 秘密搭上吹水編劇 (史丹利特治)？另一開鏡在即的新戲，男主角布斯韋利士突然暴脹、唔肯剃鬚、仲發肥四反轉片場？荷里活似乎要同賓過唔去！ 面對接踵而來的爆鑊事件，賓應該如何收科？