現代啟示錄: 終極版

由細到大最討厭嘅事情之一，就係讀書 (有邊個會鍾意讀書？)，上堂發吽哣、欠交功課係家常便飯，甚至欠到記過都唔理。惟獨世史堂，明明係最悶到抽筋嘅一科，但就係我最打醒十二分精神上課嘅科目。唔係因為Miss靚女，而係我每堂都期待緊一個會用電影教世史嘅老師，今堂會講咩電影？記得某個飯氣攻心嘅下晝堂，世史教到越戰。老師入課室後，唔係打開書，係熄燈、拉低投影幕，放隻VCD入電腦，播放一套叫《現代啟示錄》嘅電影。大半班已經被睡魔襲擊得手，但開場一幕直升機飛過越南叢林，同課室天花板2度轉速嘅吊扇，竟然神奇地配合。明明樹林烽煙四起又塗炭生靈，點解戰爭都可以拍得咁浪漫？結果播咗15分鐘後，老師決定開燈關機繼續上堂：「嗱！呢套戲，睇死你哋都係會嫌悶到嘔睇唔晒，所以都係專心聽我講書嘞！」課本裡文字傳達唔到嘅影像，用電影呈現，會變得容易入口。而《現代啟示錄》教授我哋嘅，係一場接一場挑戰人性底線嘅震撼教育，亦係黑暗、扭曲、病態組成嘅盛宴：平和可以轉眼間變成毀滅，笑容可以一瞬間變成惡魔。血腥屠殺一時配上華格納嘅《女武神的騎行》，一時又配上The Door 同滾石樂隊嘅搖滾樂。想要精忠報國嘅年青一群，換來嘅係被國家唾棄到蠻荒地帶，文明道德完全無處容身；為虛無而打嘅戰爭，結果得到嘅係更大嘅虛無。如今再度回歸大銀幕，不能奢求戲院裝返幾把吊扇嚟令呢部史詩顯得更加浪漫。但《現代啟示錄》面世已有40年，眼見當下世道各種不公不義崩壞到盡頭，又經過幾個重剪版本洗滌歷練，原來呢部電影仍然不斷啟示現代。

Unscripted film but turns out to pull it off.