A Real Pain

我喺Disney+先睹為快嘅🤣故事講一對猶太第三代移民嘅堂兄弟，喺嫲嫲死後回到波蘭旅遊尋根，由於嫲嫲生前不願提及在集中營嘅過去，兩兄弟喺參加小組歷史考察團時，觸景生情，想像嫲嫲和所有二戰期間被迫害猶太人嘅苦難，Jesse Eisenberg飾演比較冷靜、抽離、理性嘅堂兄，Kieran Culkin飾演敏感、情緒化、反覆無常、又躁又鬱和多愁善感嘅堂弟，前者遠不如後者搶鏡，後者反而更似主角，並憑本片摘下本屆奧斯卡最佳男配角，我對這個結果有點不能接受，因為我睇過晒本屆被提名最佳男配角所有演員嘅作品，Anona同the Brutalist嘅擺明係陪跑，不過A Complete Unknown入面嘅Edward Norton同Apprentice入面嘅Jeremy Strong冇理由輸俾Kieran Culkin，因為Culkin嘅角色大起大落，比較容易演繹，但另外兩位嘅角色都比較內斂，需要大量內心戲，單靠眼神、氣息、肢體小動作、表情極細微變化⋯⋯去交代，難度高好多，如果輸只有一個解釋，時勢造英雄，適逢以巴衝突踏入第二年(2024年係電影開拍嘅嗰一年)，Culkin演嘅又係猶太人，角色「討好」，又贏同情分，因為美國同荷里活都係有財有勢猶太人嘅天下呀！Jesse Eisenberg雖然表現低調，但也令我另眼相看，因為劇本係佢寫㗎，仲贏咗英國奧斯卡BAFTA最佳原創劇本獎呀！佢喺本片集編導演同監製於一身，多才多藝呀！不過電影片長略短、主題唔明顯、冇乜深度、故事情節唔夠緊密、冇乜一氣呵成嘅「戲勢」！不過我期望佢不斷進步，精益求精！