真‧三國無双

既然叫三國無雙,就要當係一部遊戲電影嚟睇。電影敍述左三國開始時嘅重要情節,講故事講得流暢,冇乜冷場,演員都演得唔錯,尤其林雪、姜浩文同羅家英。美術、畫面、風景都好靚,睇到拍攝畀咗心機。打鬥預咗跨張,但打得過癮,有啲似中國版復仇者聯盟。當係一套歷史科幻片嚟睇,我覺得收貨。期待續集,可以講多啲每人嘅兵器、絕招同埋戰術。

1.前幾年蕭定一嘅HMV數碼中國可算風頭一時無兩，信奉IP係王道而購入多個中港著名小說/電視劇版權再拍電影版。呢套『真。三國無双』就係當年其中一個矚目嘅項目嚟，畢竟改編熱爆亞洲嘅遊戲，如果拍得靚靚仔仔會食中唔少地區市場。.可惜HMV資金鏈斷裂令整個影視皇朝倒下，市傳蕭生欠債累累不得不將手頭上嘅電影項目轉讓畀債主或者套現。現時電影出品公司已經見唔有佢份，僅僅得香港嘅發行同宣傳權。不過值得一提出品人同監製係有昔日HMV嘅關聯人士，所以都係唔知佢搞邊科。-2.『殺人犯』『大追捕』大導演周顯揚過往作品質素相信大家有目共睹，今次繼續冇令大家失望！電影淨係頭半個鐘已經笑到我口罩都濕晒！完全估唔到係一套笑片嚟！.古天樂騎馬追住王凱一幕更將啲馬當電單車咁靈活操控 - 成隻馬完全打平避開冧咗嘅樹，超出常人嘅理解範圍！另一我特別推介場面係華雄連續斬甩幾個人頭，每一個都飛到勁遠嘅山窿入面，如果佢係今時今日出世一定係一個哥爾夫球奇才！.導演喺場面調度方面亦非常之成功，後面「三英戰呂布」處理得非常混亂，觀眾冇辦法識別到邊個打緊邊個，甚至會睇唔清係邊位演員！配以流到爆嘅CG、「來又如風離又如風」赤兔馬、關羽爆衫用自己肉身幫把刀開光⋯⋯太豐富啦！.你話點可能唔會笑吖。-3.電影遠赴紐西蘭拍攝，雖然當地景色浩瀚但搵華裔臨時演員變得困難，部分騎馬鏡頭見到主角以外嘅騎兵都係外國人！原來早喺三國時期已經有外國勢力介入！.或者紐西蘭嘅風景實在太靚，導演都忍唔住拍唔少演員嘅Mood Shot，睇睇下以為係紐西蘭觀光局宣傳短片多過電影囉。-4.係咪因為打正旗號改編自遊戲所以啲CG可以做到咁流？成千上萬嘅士兵只係Copy and Paste咁擺喺場景，無限瘋狂loop住一樣嘅動作 - hea住咁搓嚟搓去「開拖」，劈中人又完全無血！.儘管我好想進入導演創作嘅世界，但如此低劣水準真係難以令人投入，反而只會不斷令我發掘更多恥笑嘅地方。-5.演出陣容當中，香港演員除咗張建聲全數自己配音，難以理解點解會有咁嘅安排。不過最匪夷所思係搵黎耀祥配王凱把聲！不但年紀差別大完全唔夾，黎耀祥仲唔知點解成日用陰陽怪氣嘅語調講野。.雖然事前知道呢個「星級配音」，但當王凱第一次講對白嘅時候我真係忍唔住笑到抽筋，嗰種滑稽程度你以為係惡搞電影片段嚟。-6.杜緻朗繼『殺人犯』後再次炮製令人啼笑皆非嘅經典對白！首先安排劉嘉玲以極為認真態度講出古天樂「外表俊美」，其後幾幕士兵不斷向主角大嗌「我願意！」以表忠誠！.非常難得呢套戲係每個範疇上致力去搞笑，令觀眾喺疫情期間苦中作樂。咦唔係喎，呢套唔係笑片嚟㗎喎。-7.拍攝期間被兵器誤傷眼球嘅古生以為佢係主角，點知上映前海報忽然冠以「特別領銜主演」，原來戲份同配角相約而已。嚴格上劉關張同曹操先至係主角。.三國無雙嘅世界咁大，電影一早預留定後路以便開拍續集。而電影就模仿「赤道」般係最後打出「三國混戰的時代 才正式開始」，令大家愕然睇咗咁耐只係一個續集預告！.坦白講以目前電影喺國內票房仆直，賣俾Netflix個價亦都未能回本，兼且原定推進項目嘅主要公司處於收皮狀態，開續集嘅機會近乎係零。.周顯揚伉儷嘅作品已經三連仆，而且獲獲新鮮獲獲金。唔知仲有邊位老細咁有膽識搵佢開戲呢？有嘅話就祝佢好運啦。

首先敘述真係好差，唔知想表達啲咩劇情斷開一段一段，上戲唔接下戲，睇到唔順戲畫面都算靚，我估去咗西藏取景廣東話配音差到爆。導演快啲收皮

亂改史詩壯陽劉關張 悶到死為左呂布先買飛

電影標榜獲遊戲官方授權拍攝，三億元鉅製打造，上映前非常期待，見到演員卡士及角色造型都好吸引，但，觀影時便發覺認真你便輸了。先利申: 我無玩過這款遊戲，亦唔熟三國歷史。所以造型是否形神俱備我不作評論，但配音方面實在令人出戲，特別是黎耀祥配王凱飾演的曹操，聲畫完全唔Match！我亦不理解張建聲飾演的張飛為何要找人配音，感覺也不太搭。如果角色比較成熟穩重，那就不要找個後生演員去擔綱，這樣配音實在崩壞。演員落力演出，古天樂眉頭眼額交足戲，角色性格鮮明但人物關係薄弱，劇情亦不敢恭維，恰一恰眼瞓可能會跟唔上角色已經倒伐！戲中有幾幕Cult到頂點，華雄打高爾夫同騎馬頭D 幾有娛樂性。至於打鬥場面，主要靠電腦特效打到飛起，效果唔錯但可惜最終未分勝負，劇情似乎沒有進展。之後曹操跟劉備一席話，我心諗「仲未完場？」原來是為續集鋪陳......不禁講句「唔好啦！」，以此等製作成本及卡士，認真拍個好劇本可以嗎？.觀影平台: 朗豪坊 Cinema City.IG andymyf / #AndyMovieReview

欣賞電影公司開拍的熱血和衝勁，可惜各崗位也無法有足夠的擔當能力，做成連串大小問題，主要幕後團隊多加努力。