機動警察 劇場版 東京毀滅戰

前中期大部分時間都係調查事件真相，劇情偏悶，到最後面做任務先精彩返d, 加上畫風相當古老，所以我純粹當係體驗吓。4.2/5 (83分)

機動警察絕對係日本動畫黃金年代其中一齣標誌性作品，資深日本動畫迷無人不知。劇場版交到押井守手上，成為一齣極富電影感同個人風格嘅作品。老實講押井守嘅風格並非爽片類型，往往會有口水多過茶嘅情況出現，所以觀眾有喜歡嘅亦有唔喜歡嘅，但無疑押井守嘅機動機察係變得好有style，鏡頭運用同美術效果營造出深沉富壓迫感氣氛，完全洗走TV少年動畫果種味，變得較成人向並走出國際。本作係劇場版第一作，幕後製作均為當時得令嘅製作人 - 押井守、伊藤和典、高田明美、出淵裕、河森正治、川井憲次等等，非常有睇頭。全片最精彩我認為係Opening。鏡頭個個精彩，有型有款，極富電影感同軍事感，加埋川井憲次極有風格同逼力嘅配樂，簡直就係睇緊一個非常緊張嘅軍事行動。配樂一起，雞皮都起埋。呢首opening 配樂ヘヴィ・アーマー責任影評非常喜歡，當年已購入其OST並且聽到耳熟能詳，今時今日有時仍哼在口邊。😄川井憲次現時仍然活躍動畫/電影配樂，香港電影葉問、九龍城寨之圍城亦係其作品。本作美術效果同機械設定亦出色，能寫實呈現一個近未來都市，令觀眾能投入故事世界。另外，本作聲效為重新製作，本人覺得都唔錯，比以前PCM Stereo 好好多。整體此作為上佳作品(除咗有時口水多過茶之外)，亦係一代名作，新舊動畫迷都值得入場欣賞/觀摩。同時亦希望其他一代名作4K版能陸續戲院上影，讓動畫迷能在大銀幕重溫。PS. 超時空要塞電影版4K Remastering 碟將於明年初推出，呢隻碟買硬嚟看門口，同時亦希望能有機會喺戲院欣賞。🙏

利申返：完全無接觸過《機動警察系列》，我開頭以為會有咩驚天動地扭橋劇情，睇完發覺都係偏王道動畫類。前段查案極之普通，所有線索都係角色自己「講」出黎；後段以為終於有機械人大戰啦，點知個戰鬥都係麻麻地，無咩特別咁。成套戲流程一般，文戲武戲都無咩特別，不過套戲已經係35年前，如果以當時水準黎講應該叫前衞；同埋睇到導演想像中嘅未來科技係用大牛龜電腦操控一啲現今科技都未有嘅野（巨型機械人）呢個反差感幾有趣，相信當年震驚唔少人。以上係我用完全無睇過《機動警察系列》同齋睇一套劇場版嘅廢青觀點講嘅野，如果係押井守或者系列Fans應該有唔同感受。睇哂咁多集動畫代入感應該仲強！.....同左班對動漫好熟嘅朋友傾後，以下係佢地嘅節錄：「套野唔係睇故事/橋，係睇採討緊既問題，1989年上映正值日本經濟崩潰年份，日本從高速經濟增長中一野仆街插直，電影入面用機械人/科技探討當時日本社會問題，「兇手」係邊個唔重要可能就係社會本身，結果就令到日本的「巴比倫」計劃爆破～迷失三十年」「機動警察後，象徵爆破後日本頹弱敗氣氛既攻殼機動隊應運而生」原來套戲係要咁解讀，我唔係個個年代嘅人真係理解唔到，多謝押井守比當時嘅人一個好嘅鼓勵！

第一次入戲院睇Pat Labor，仲要係4DX。電影前1/3文戲有點沉悶，但逢有武打場面，配合埋4DX同煙幕好正，只係這部比較少香貫花；一生人點都要睇一次！

一套電視動漫水平的劇集，吾明點解要擺在大銀幕放映，故事平板，劇情淩亂，冇起伏，頭果一粒鐘悶到噁，到尾部以為有起色，點知草草收場，大喊中伏。