長夜盡頭的微光

個人覺得這套戲很出色，三宅無論在處理和執行上都非常精湛，我會形容，整套戲也充滿了很舒適的溫度。三宅一如既往，繼續用了他最擅長的 16 毫米攝影，精準地捕捉出一種令人舒適且充滿靈魂的光，從而產生出一種有自家特色的溫度，而他這樣恰到好處的溫度處理好讓觀眾看得舒服和投入。而比較之前 52赫茲的鯨魚們，這套在各方面也比較優勝。我會說，這次三宅的整體處理也比之前的《惠子的凝視》更為細膩。無論是鋪排故事、塑造角色輪廓、情感處理等，都是同樣。其中我最喜歡角色塑造這一點，的確這次他去描寫男女主角的技巧真是高超，可以不溫不火地描繪出這種互相扶持、而恰到好處的情感交流，這方面的確看得津津樂道。而我也喜歡最後講稿的設計，這樣可以令整套戲更昇華。當然在攝影、美術等方面，三宅也沒讓人失望，他依然非常精準地用 16 毫米菲林攝影來塑造出非常有飽和感和唯美感的光，而構圖同美術也是亮麗。痴·影·夢·藝 X 的專頁 https://www.facebook.com/ckwunmovie/

故事性唔強，只係對男女主角相遇後嘅一啲工作同生活上嘅描寫，就算所謂男女主角之間嘅聯繫同互動都係好表面同平淡，男女主角間嘅關係亦冇好緊密嘅聯繫，只係好似一般同事咁。電影平舖直聚，並無加味精賣慘去感動觀眾，亦因為咁，電影主題“人總會互相扶持”亦唔算係好戲劇性地突出，所以唔係同病相憐嘅觀眾喺觀影嘅過程唔會有好大嘅情緒起伏。如此寫實編排相信係導演刻意要拍出嘅效果。喜歡日式淡如水文藝片嘅觀眾可考慮入場。

喺飛機上免費睇。經前症候群遇上恐懼症，前者會突然躁狂，食藥又渴睡，總之不能正常工作、生活和戀愛。後者覺得冇嘢好食冇嘢好睇，生無可戀但又唔想死，連搭公車都驚到又暈又嘔，生活和工作圈子由步行距離決定範圍，於是乎不能出遠門，只好和調派海外嘅女友分手。兩人雖然大學畢業，但只能屈就小公司，還幸公司和同事包容，男女主角又同病相憐，互相扶持下滲出淡淡嘅日本人情味。一向對上白石萌音冇乜感覺，今次佢嘅躁狂表現，相當表面和一般，和最近憑《精神病房也會迎來清晨》拿下青龍獎嘅朴寶英相比，簡直有雲泥之別！

我會形容為一套「溫暖」嘅電影，但老實講劇情偏悶。男主角踩單車送電話都可以拍幾分鐘，沿途就真係乜都無事發生，普普通通嘅踩單車。我認同其實情緒病人平日生活就係咁日常同淡而無味，只係間唔使會「失調」一下，除此之外同你我無分別。但拍成電影實在有點兒「硬核」，我平常睇戲都唔係要咩大場面嘅人，《新活日常》《但願人長久》等劇情無咁大上大落嘅電影都好鍾意睇。但呢套劇實在過份「日常」，全劇無論男主角前任+現任上司、男女主角嘅同事、甚至死去嘅前輩都過份體諒同溫柔，全劇一個叫做壞人嘅角色都無，有嘅只係人與人之間嘅互相扶持，我只可以話呢套劇唔適合一般觀眾睇。全劇我最欣賞嘅係男女主角間個種唔係愛情，係朋友+同事嘅關係；而女主角會離職、離職後就會成為前同事，可能閒時飲下茶食個飯，但證明世上嘅關係唔會只得愛情，男女主角只係一對因同樣同世界「失調」而認識嘅正常人。而無可否認嘅係導演執行技巧高超；畫面鏡頭都大師級；對白精湛一句起兩句止就解釋哂（相比之下《海關戰記》係另一個極端，所有對白、畫面、鏡頭都要拍哂出黎），所以成套戲藝術成份極高但就真係唔建議大眾入場，實在太過「難以服用」。

小品來說非常好看，女角男角表現都出色；結尾天文觀賞比喻人生神來之筆。兩星期前觀看仍有回嚮，特此分享，值得入場，感受一下真正的日本生活。

Very positive