飛人類之吻

呢套連題材都寫住奇幻愛情，唔好再當恐怖片啦。不過核突位都幾多吓！愛情線係有感人位，但喊唔出。整個劇情就係講緊一個悲慘的愛情故事(加上有人搞事) ，幾sad果種。CG做得唔錯，有一幕有靚景，後段有大規模打鬥。但整體跟我以前看過的的奇幻愛情片有段距離。4.2/5 (84分)

《飛人類之吻/Krasue: Inhuman Kiss》都唔知點解可以係泰國咁賣座，見識過泰國頂級CG唯美「飛頭鬼」，冗長而又言之無物，青春三角戀又不覺淒美。

用左泰國民間傳說 飛頭鬼嘅慨念 幾新鮮有趣

懷着半人鬼的好題材期待入場，可惜劇情反駁，是一般典型的泰國電影通病！好像鱷囗逃生式的電影漏洞！人鬼戀的凄美拖拉越長反而變得不合理！整體都是導演執行失誤為死穴！

泰國鬼片手法層出不窮，最新已經進化到飛頭鬼crossover愛情故事。原本《飛》片題材吸引，半人半鬼設定亦有新鮮感，可惜執行出嚟一塌糊塗，兩個鐘極速煉成末期尷尬癌，唔少位寧願望住前座阿叔個油頭都唔想舉頭望mon自殘雙眼，實在佩服片商買片勇氣。劇本溶爛《飛》片係死罪之一：故事邏輯講唔清，角色莫名其妙出現，人物零刻劃，行為矛盾令人厭惡，轉折突兀惹笑，青春三角戀情節更係老土到令人嘩一聲，彷彿重回八十年代。又，節奏掌控失衡，文戲冗長且言之無物，大量「你食咗飯未／我食咗喇」之流對白。當然製作質素亦不遑多讓，所謂泰國頂級CG令人失望，最致命傷莫過於導演用盡吃奶之力營造浪漫煽情，但偏偏視覺處理極為可笑，聲畫十級違和。一段相擁慘情戲，爛面角色哭至涕淚交流，望住堂鼻涕滴呀滴，嘔心遠勝虐心。又，喺花海中長達一分鐘嘅接吻戲，連啲咀啜奶舐聲都錄埋係咩玩法？歸根究底劇本冇花筆墨描畫角色情誼，觀眾根本入唔到戲，更莫論被戲中愛情所感動。本業做唔好，幾多味精都無補於事，就算出動小鮮肉show肌吸睛，頂多加返0.5分俾你。而家諗返，宣傳以imdb 7.5分作招來，其實一早應該做好中伏準備，今次太大意了。

見張poster就知唔恐怖，所以決定入場一試，又真係講愛情故仔，故事中間有點拖，結局很淒美，泰國CG做得非常唔錯，加多半星畀泰仔。