拼命三郎(HKAFF2024)

開頭對呢套戲期望不大，點知睇落有驚喜。成個劇本好飽滿，所有角色嘅人設性格好出，主要角色幾個動作眼神就知佢地想做咩。呢啲基本野近年港產片都唔係好多套做到。分享會上導演本身話想拍文藝片，但廠商叫加啲商業元素佢都有照做，其實商業拍攝手法都有一定可觀性先可以屹立多年（對比下《淺淺歲月》就係商業片上玩野，走去另一極致）所以成套戲齊哂起承轉合，角色都係經歷高潮低潮個啲野啦，出到黎我就覺得好睇，到底係咪因為我都係目光狹窄同世俗嘅普羅大眾呢？講返少少劇情，譚耀文+Locker父子線好好睇，無咩好講了，係有少少睇緊《別叫我「賭神」》《一秒拳王》嘅感覺（商業片壞處？）用黎對比嘅另一條父子線：鄭浩南老戲骨+本身嘅氣場已經好食到個角色，同譚耀文嘅對手戲都好有火花，選角非常合適；細貓做嘅兒子就唔太得啦，本身劇本著墨同演員魅力都麻麻地，拍落Locker到就差幾皮；主角線以外嘅角色最亮眼係姚樂怡，一黎太耐無見，二黎個角色都寫得唔錯，令到我好有印象。導演話係拍比香港人嘅勵志歌（雖然個個導演都係咁講架啦）但呢套《拼命三郎》個人覺得佢做到了，對白雖然都有少少硬崛向，但比起其他對白好突兀嘅戲黎講算合格，起馬睇落唔會尷尬先啦。呢套戲有文藝有江湖有拳拳到肉又有親情，劇情無崩壞仲幾好睇添，個人十分推介！