拳道

1.「瘦田無人耕，耕開有人爭」，近年香港一窩蜂開拍拳擊題材電影，喺『一秒拳王』上映之際另一套陳封多年嘅網大亦趁機開畫，就係陳國坤主演嘅『拳道』。.電影原定上年年尾喺香港上映，無奈戲院停業而延期。不過內地就用『激戰江湖』喺網絡平台播放，叫得咁嘅名以為連場激戰？其實套戲只係講述主角點樣成為「拳手之道」，打鬥場面極至少。.衰啲咁講，『地下拳』仲打得好過佢。-2.故事話係改編自真人真事，開首用咗頗長篇幅憶述陳國坤童年時嘅事混合93年蘭桂坊慘劇，其實睇唔到個必要同相關性。再者想塑造嘉華哥口硬心軟但背後有悲傷往事，但鋪完條線畀陳國坤學拳後就功成身退，又淪為功能人物。.敖嘉年大鬧陳國坤自爆喺佢面前毫無尊嚴一幕又係未經鋪排，失驚無神爆出一段咁嘅戲睇到好莫名其妙，強行加插兩人嘅爭拗嚟「掀起高潮」。.最娘係又有「條女原來係仇人個女」嘅橋段，連粵語殘片嘅情節都有，問你死未。-3.陳國坤同郭奕芯床上大戰對剪敖嘉年被打嘅場面，呢種騎呢剪接令觀眾睇到目定口呆，突出呢位重情義嘅主角都係重色輕友。加上全片不斷穿插陳國坤喺更衣室慢鏡作出場上擂台前準備，非常擾人兼令觀眾煩厭，搞咁鬼耐都唔上去打㗎。-4.戲內嘅打鬥場面甚少。過咗接近半套戲先見到陳國坤打地下拳，而且短短五分鐘打咗十幾場，場場都係一招KO對方，睇得完全無晒癮囉。.全片僅有最後同劉峻緯對決一幕係真真正正喺擂台上打，但離譜到四個角都黑到仆街，睇唔清兩位演員嘅動作，就算「打黑拳」都唔洗黑到睇唔到嘅。-5.最令我意外兼傷心嘅係由劉君樂負責電影嘅攝影 - 佢之前嘅作品『殘影空間』、『一秒拳王』以至『濁水漂流』吉鏡嘅表現均係我近年最愛，亦成為我深愛嘅攝影指導。.不過呢套陳年出道作品嘅質素就同以上三套有強烈對比。無可否認有少量嘅鏡頭係玩得幾靚，但其餘都係睇落為慳時間唔郁機位而文戲強行「一鏡到尾」，演員又無足夠能力應付搞到好odd。.動作場面拍得勁凌亂，尤其擂台上經常跟唔切演員嘅動作，對比喺『一秒拳王』嘅表現佢簡直脫胎換骨，果然經驗累積越戰越勇。

支持香港本土电影，值得一看👍🏻👍🏻👍🏻

全片的環境氣氛還是可以的，林嘉華演出到位

打鬥場面好睇，擂台場面拳拳到肉

想入場真係諗清楚!!

動作場面己經一般，連故事也一般。本來對他武打場面的期待。但真是不好看，只希望真的再拍不要咁馬虎。