一級指控

個人覺得套戲不俗，導演在各方面處理同執行不錯，雖然套戲整體格調同處理好電視劇感覺，但因演員演繹令套戲可以彌補以上不足。個人的確睇到導演編劇在處理同執行上的確有野心，他們不想將故事過度簡單般去講如何悍衛公義，而是想藉故事來描寫在悍衛公義中各方在灰色地帶中的變化，這方面導演的處理是不錯，尤其是在尾段。 而編導在故事包裝同執行上的確比以往同類大膽，更深入同更放大描寫政商界中這份潛規則、黑暗同功利，這方面導演的處理是出色。曾江、智叔同張建聲三位反派的處理不俗，他們的確有很大化學作用。這樣的確幫到這方面的處理。無論曾江這份只睇利益而不顧親情的老奸巨猾、智叔這份利益者嘴臉同張這份人前親民但背後真小人的格調，也是演繹得準繩。而三位加上會令整套戲有所昇華。而方中信方面，個人覺得他是演得不錯，可以拍出在對如何執行公義的迷失，而演繹上也是準而細緻。但個人略嫌覺得陳家樂有點失望，相比上述幾位，他演得好像被比下去。不夠吸引同細緻。咁當然鮑姐同黃定謙之間這份親情演繹也是好睇。 其實現在睇這套，感覺會比他原本19年上時會強烈得多，或者因我們經歷過很多事後，其中在當聽到套戲中聽到各個角色在戲中講出對如何悍衛公義的比喻時，這份感覺會更深，而因為這份感覺。也會令我們更投入到套戲。這樣又是幫到套戲。痴·影·夢·藝 X 的專頁 https://www.facebook.com/ckwunmovie/

要喺一個不公義嘅社會講法治、講公平，就算係最懂法律嘅律師都唔容易。表面上結局完滿，但其實冇乜嘢可以改變，社會依然崩壞。導演講故事手法唔錯，開頭幾段戲開得好，有懸疑feel，亦講出一啲法律倫理，節奏明快。不過劇本眼高手低，好多犯駁位。每個人解決問題嘅方法都不外乎用錢或暴力，尾段畫公仔畫出腸，亦有啲為扭橋而扭橋嘅感覺。幸得演員出色表現, 尤其智叔、曾光同鮑姐嘅演出，幾句對白，幾個眼神就交代到劇情，演出恰到好處。諗諗下，而家有啲地方嘅法庭就係一場戲......

電影2018年因「技術問題」而取消喺香港亞洲電影節放映，雖然台前幕後以香港班底為主，但始終全大陸資金自然惹來眾說紛紜。最終今年暑假獲得內地公映許可證，隨即安排以網絡電影方式上映。.如無意外投資方係避免獲取上映批文有任何差錯，因而決定當時抽起AFF嘅場次，只係估唔到一等，就等咗差唔多三年時間。.儘管導演同編劇表示過審一刀都冇剪，但現時智叔同曾江喺遊艇上對鬧一幕，原先智叔不斷強調「黨」（政黨），但經後期重新配音而變成「組織」。微妙分別散發出一絲耐人尋味嘅考量。.故事核心欲想同觀眾探討何謂法律，但編劇透過一連串金句式對白，強行灌輸畀觀眾。加上整體佈局甚有導演過往作品『律政強人』『選戰』嘅濃烈味道，案件牽涉各方勢力越吹越大，後段要逆轉局勢時卻無力承接，只可不斷開外掛嚟達致大團圓結局，充滿強烈電視感覺。.某程度上『一級指控』同『狂舞派3』面對同樣問題，原先電影製作時故事吻合當時社會大氣候，只可惜呢一兩年香港情況急轉直下，依家睇返電影情節只覺得未免太不合時宜。.主演陣容以實力派演員為主，而且好多都係演返佢哋嘅拿手好戲 - 方中信官仔骨骨專業人士、陳家樂職場新鮮人充滿魄力、張建聲斯文敗類大仆街⋯⋯基本上係駕輕就熟嘅演出機會，穩陣但冇乜特別驚喜。.有佢哋嘅演出，顯得黃定謙演技更幼嫩，繼續有待改善。

如果能早一兩年上會更好，但整體上不錯。

劇情直接、善用灰色地帶、尚存的法律面前人人平等，需要我們一起去維護。

智叔係演技嘅代表，亦係香港人嘅典範。