森之廚房

1.本身無諗過會睇呢套戲，但因為Naver網民評分壓倒性地高（相對我原先想睇嗰套），先至揀佢嚟睇。淨係知道片名，連有咩演員做都唔知嘅情況下就入咗場，最後結果令我驚喜！-2.就咁望海報以為都係典型講年青人嘅友誼愛情嗰啲嘢，但電影並唔係咁簡單。透過講述惠媛（金泰梨 飾）重返鄉下過自給自足生活，嚟尋找生活嘅真諦。.近年韓國不斷有影視作品宣揚「歸農」概念，由綜藝節目『三時三餐』再到電視劇『現代農夫』等等。慢活主義嘅崛起某程度同壓抑工作壓力有關，勞碌生活節奏下，唔搵返個方法令自己抖下氣真係容易爆煲。.慢活最緊要可以陶冶性情，電影就以一年四季喺鄉村嘅生活，帶比觀眾一次療癒之旅。-3.正如剛剛所講，我對套戲完全零概念而入場。觀映期間一直覺得好有日本感，由女主角媽媽（文素利 飾）性格及服裝風格、屋企陳設以至整體清新感覺都好日本電影格調。.完場後上網一search先知自己孤陋寡聞，原來套戲係改編自同名日本電影系列，而韓版將原先「夏秋篇」同「冬春篇」二合為一。電影少不免會同原版作比較，對我來講最大分野係韓版食物上未有善用韓食嘅特質，部份菜式用上日本美食略為失色。-4.睇住惠媛一手一腳烹飪同耕作，過程好自癒。整體感覺好舒服嘅其中一個原因必定係搵金泰梨演呢個角色，佢外型比較純樸睇起嚟好自然，喺大銀幕望住佢煮同食嘢真係幾開心㗎。（可惜當時冇買嘢入場食啦，真係睇到流晒口水㗎。）.另外好多鄉村嘅細節位都幾得意，好似在河 （柳俊烈 飾）知道惠媛驚怪聲而俾隻狗仔陪伴佢、天不怕地不怕但就怕親戚送俾佢嗰隻雞、炎熱夏天成班人走去銀行嘆冷氣而職員仲會派發凍飲⋯⋯整個鄉村充滿人情味，正正係都市生活欠缺咗嘅嘢。-5.惠媛最初離開城市係為咗逃避考試失敗、愛情同工作壓力等問題，喺鄉村生活咁耐都冇諗過點樣面對，反而係在河點醒要面對自己最初逃避嘅事。.在河喺電影猶如一位智者，佢好早清楚自己要啲乜嘢而選擇做農夫。你可以話佢抗壓力低先至作出咁嘅決定，但在我個人立場上，佢想擁有選擇生活嘅權利。.農作唔需要好似係職場咁受上司氣，雖然好多時會因為自然因素而影響收成，但呢種親力親為嘅實在感，會帶嚟強大嘅滿足。-6.除咗惠媛喺鄉下點樣生活外，電影另一條主線係兩人母女關係。惠媛一直唔明白點解阿媽會選擇離家出走，但籍住煮同媽媽相關回憶嘅餸菜，佢漸漸明白到係呢條鄉村生活以及阿媽離開嘅原因。.從阿媽所煮嘅餸菜同談吐，我哋能夠搵到啲端倪 - 佢應該受過比較高嘅學歷因此知識比較廣博。選擇離開女兒係個困難舉動，但都係時候追逐返自己想做嘅嘢。.結局嘅開放式手法亦留返個幻想空間比觀眾 - 到底係阿媽返嚟定係其他朋友到訪呢？相信已經唔重要，最重要係惠媛終於明白自己應該點樣生活落去。-