如果德川家康成為總理大臣

2020年初新冠病毒蔓延全球，正當人類看不清走出陰霾籠罩的前路時，作家真邊明人以短短一年時間，神速寫成四百多頁的《如果德川家康成為總理大臣》。故事描述日本戰國三英傑——織田信長、豐臣秀吉、德川家康，聯同一堆歷史偉人組成AI內閣，奉命於危難之間，帶領國家挺過疫情。如此天馬行空的「創作力量同幻想」，確實「會嚇你一跳」。小說問世不久，日本規模最大的電影公司東寶映畫旗下的Toho Studios，同樣以神速買下版權，由執導過《交響情人夢》、《羅馬浴場》的資深導演武內英樹捉刀。近廿多年間，日本影視娛樂產業，儘管已被近鄰韓國全方位壓倒，但平情而論，東瀛創作人還是不乏創意，偶有亮點。對於市場的嗅覺，依舊相當敏銳。韓國電影和電視劇，雖然會過度沈迷於神反轉結局，以至經常出現不必要的，甚至不合理的安排。饒是如此，仍然勝過日本作品墨守成規，結局永遠在窠臼中打轉的一板一眼。將「杜鵑」捧在手心裏的東寶，終究無法擺脫慣常的慷慨說教模式，令《如果德川家康成為總理大臣》高開低走。七月全日本公映，一個半月票房總收入十一億多日圓，只及同期上畫的《死侍與狼人》的半數。入場前，對德川內閣中最期待的人物，是「尼將軍」北條政子。這位不甘心自己的婚姻受到父親擺布，勇於追求戀愛自由的日本武則天，假如可以在電影中發表另一番怎樣應對「杜鵑不啼」的見解，想必比起三英傑的殺之、誘之、待之更有意思。本片女主角濱邊美波，搣甩了數年前《我想吃掉你的胰臟》時的嬰兒肥，一頭短髮，尖削下巴，令人聯想起《情書》的中山美穗⋯⋯歷年感想，存檔IG及FB：pm7290movie（https://www.facebook.com/Pm7290movie-105185654399988/）歡迎瀏覽。

題材絕對係可以拍出瘋狂劇情，但可惜導演處理麻麻，拍到好似80年代王晶果類學校霸王式cosplay唧都唔笑嘅貨色。劇情亦沉悶乏味。故事包含唔少日本著名歷史人物，但香港人睇會較少共鳴。電影亦包含好多政治明喻，畫公仔畫到出腸，臨尾直頭由兩個主角直接以訓話去痛斥日本年輕一代政治冷感，真係睇到我傻眼。縱使有當時得令嘅浜邊美波亦救唔到套戲，角色毫不重要，亦毫無表現。

新冠肺炎爆發，日本內閣死得七七八八，居然用AI生成歷代偉人組成救亡內閣，加上竹中直人，以為會好爆笑，點知冇乜笑位！幾百年前嘅戰國武將居然好快融入現代社會，識得宣傳造勢，跳舞唱歌嘩眾取寵，捏造事實騙取民意，咁只是著住古裝嘅現代政治戲，有啲悶添，點解唔用傳統觀念同現代生活製造矛盾，引發碰撞式笑料呢？雲集德川家康、豐臣秀吉、織田信長戰國三大武將，唔係發揮佢哋嘅領導能力和超凡智慧去化解日本現世危機，最後落得又一場權力鬥爭，好鬼老土。另外寫《源氏物語》嘅紫式部算乜鬼潛在救世英雄呢？艷情小說唔通可以消除疫情😷振興經濟？坂本龍馬係有魅力嘅歷史人物，但喺倒幕時代佢促成薩長同盟，對幕府有破壞冇建設係啱用嘅，但去到現代需要嘅係佢冇嘅建設性，所以編導選歷史人物嚟復活，點解唔係明治維新時期嗰班改革現代化嘅寡頭呢？伊藤博文、西鄉隆盛、大久保利通⋯⋯甚至福澤諭吉、吉田松蔭、夏目漱石⋯⋯都更適合做救現世嘅偉人，因為佢哋係近代人，而且係日本明治維新現代化改革，喺實施和理論上嘅開山鼻祖，更適合電影故事嘅前設！不過電影結尾出現激盪人心嘅一幕，德川家康率領偉人內閣功成身退之前嘅演講，發揮日本敬老尊賢嘅傳統，由先祖教訓後代，不要輕信網絡媒體，要有主見，要有個性，不會人云亦云，不要假手於人，要積極參與政治決策，自己幸福要自己努力爭取！雖然我好懷疑封建專制獨裁嘅德川會唔會喺嚟到現世，得到啟發，轉死性講出咁現代民主自由色彩嘅說話，但令我感悟歷史偉人之所以偉大，就係在於知所進退，因時制宜應物變化，轟動地上場，優雅瀟灑壯麗地退場，只留下人類經常疏忽但不會忘記嘅教訓。