《星之聲》+ 《秒速5厘米》 + 《雲之彼端，約定的地方》 三片同一文章！！！我係由《你的名字》入坑先追返咁多套新海誠，但《星之聲》同《雲之彼端，約定的地方》我係從來無睇過，想講呢三套戲完全係新海誠用黎練手打好基礎，由第一套《星之聲》試水溫之作，畫風極度簡陋；第二套《雲之彼端》畫面已大幅進步，係講緊只係兩年半時間；再3年後嘅《秒速5厘米》畫面幾何級上升，已經有《你的名字。》嘅影子。所以多謝發行會揀呢3套做第一輪上，而院線又會安排到可以一氣呵成睇哂3套，因為我覺得呢3套電影一齊睇會更有感覺。呢3套初期作品，唔止畫面上嘅升級，連故事上都升級。《星之聲》中新海誠原來已經初窺探「時間」，我最喜愛電影《星際啟示錄》入面句對白"Love is the one thing that transcends time and space." 講緊嘅就係呢套戲（當然《星之聲》比《星際啟示錄》更早出現，我只係舉出呢個例子）睇得出《星之聲》受到EVA影響之深，外星人同爆血個下我以為自己睇緊EVA。新海誠第一套動畫就係熱血題材：美少女+機械人+外星人+宇宙，當然唔小得愛情線。如果話《星之聲》受EVA影響，《雲之彼端，約定的地方》我就覺得更有吉卜力+ 庵野秀明影子，睇得出新海誠仲係探索期中，《雲之彼端》科幻感更重，愛情線偏弱，而且我覺得拍得太玄，無後期作品咁通俗易明。當然無論吉卜力派定庵野秀明派都係大師級，各有各好。但我覺得唔適合新海誠，有種鸚鵡學舌感覺，睇落唔算好睇。再講《你的名字。》最著名嘅鏡頭，《雲之彼端》原來已經有出現過，真係睇完先知！《秒速5厘米》就走向另一個極端，愛情線佔據大部份，幾乎係無乜科幻元素。我十幾年前睇過《秒速》，當時年紀尚輕完全唔明佢噏乜；而家涉獵咗更多電影，再睇返有更多體會。原來櫻花就算秒速5厘米咁落下，而且遵守諾言一齊睇櫻花落下，我倆嘅心都無拉近1mm，該放下時就應該放下。總括而言，新海誠最初嘅3套電影係令《你的名字。》成功嘅養份，由愛情甜蜜版EVA 2.0《星之聲》；到有濃厚庵野秀明影子、科幻感滿滿嘅《雲之彼端，約定的地方》；然後畫出初戀無限好，但又無哂科幻嘅《秒速5厘米》。完全睇到新海誠嘅進步，最後平衡出科幻+愛情都超好睇嘅《你的名字。》最後先利申小弟唔係精通日本動畫專家，年輕尚輕無見證大師們由細睇到大，都係呢幾年興返復刻經典電影先睇返。由手塚治蟲到押井守、宮崎駿、大友克洋、庵野秀明；到新海誠由拾人牙慧到自成風格，而家佢自己就係一個流派；最近最紅嘅《鬼滅之刃》幽浮社（幽浮社我由Fate已經開始睇，基本上睇哂所有Fate系列）、我講親都傷感嘅京阿尼。都好睇得出日本個種匠人精神，一代傳一代，薪火相傳（所以京阿尼會再次強大，繼續前進！）真係最後！超期待之後重映睇我已經睇過但唔記得左9成嘅《追逐繁星的孩子》同《言葉之庭》！！！
顯示更多
收起
0
0
0
