玩轉腦朋友2

Inside Out最大嘅魅力莫過於好容易令人睇嘅時候幻想自己腦入邊個panel到底係有一個點樣嘅情緒組成，例如：邊個情緒係大佬/邊啲情緒較為少出現，所以套戲本身講故事嘅角度就好獨特，已經夠我secure起碼3粒星，哈。好，講返今集，Riley個腦依一集好明顯以阿焦為主導，同大部份人嘅青春期一樣，有好多不安同擔憂，例如驚自己做得唔夠好/好怕朋友疏遠自己，我覺得共鳴感係幾大。當然，每個人嘅情緒組成都唔一樣，共鳴感亦因此而因人而異。值得一讚嘅係廣東話配音好優秀，無論係新加入嘅角色定係舊角色都配得好好，好到肉！至於storyline嚟講，我本人係比較鍾意第一集。上集故事比較流暢，配角嘅戲份拿捏得好啲，個人認為今集夾萬/百寶袋嗰部份太過長，本來短短地都幾搞笑，一過長就會變得好突兀，我係有稍微出咗少少戲的。話雖如此，我自己係幾鍾意「無用」記憶球由被棄置到流返入意識森林呢個編排，我地生成一個點樣嘅人，係人生所有經歷累積而成就的。對我嚟講今集最鍾意既位係探討自我意識（好奇n人共鳴感係唔係會大啲xd），同埋啊樂理解到每種情緒都有其價值依兩點。啊焦嗰段（大概係咁）「啊驚係保護Riley from為可見嘅危機，而我係保護Riley from睇唔到嘅危機」，我覺得咁樣解讀焦慮嘅角度幾有趣，焦慮嘅本意未必壞，只係當其他情緒無辦法及時拉住焦慮，大腦就有可能hang機，最後影響我地嘅心理or even生理。套戲仲有好多好有趣嘅細節位：1.） 黑歷史同阿尷外型上好一致，的確好多不堪回首嘅黑歷史都係尷尬嘅情緒所致。尷尬離開panel嘅時候特別慢，好relate到一個人尷尬嘅時候，份尷尬散走得好慢嘅特點。其實每個情緒都值得更多篇幅，但劇本編排要好睇的話，根本無可能完全公平。真心覺得一開始諗到咁樣講故事真係好犀利，仲可以比觀眾陪riley大，真係出幾多集我都會去睇！(///▽///)

前中段劇情較為小悶 但整體嚟講係好睇 此戲顯然出每個人嘅人性化及情緒化

個人喜歡玩轉腦朋友1，這集完全保留1的元素和風格，今集2加進了少女青春期，更是精彩。喜歡這系列是她巧用人類情緒基本因子，去解說人類行為，從而去認識和構造愉快人生。動畫作風和色彩頗具新意，值得細看感受的動感電影。

今集有四種新情緒出場，本以為大家會有更多嘅交集，點知幾乎係同一個情緒solo咁滯，睇嘅時候都有d不安同埋焦燥感（連我都被anxiety影響到啦哈哈）而最後本來以為係主角群就咁還原返就算，但結果出乎意料，既窩心感人又好有道理。（個人比較鍾意上集，因為上集係joy帶隊，氣氛歡樂得多~）4.6/5 （92分）

感覺上冇上集咁好睇，亦冇咁啱小朋友口味，因為Ridley進入咗青春期，所以多咗啲新嘅情緒，除咗Joy, Sadness, Fear, Disgust同Anger之外，多咗Anxiety焦慮、Ennui討厭、Embarrassment尷尬😳同Envy羨慕，但全片流於Anxiety同Joy之間嘅對決，爭奪控制Ridley嘅霸權，新登場嘅Envy和Ennui形同虛設，其他情緒之間亦缺乏互動。至於故事發展和上次差唔多，上集樂和愁因為意外而流浪，今次所有舊情緒被新情緒驅逐流放，最後都努力回到控制室穩定Ridley嘅情緒，情節熟口熟面，所以有啲悶。其實哩個設定好有問題，我哋成長過程中受很多情緒和荷爾蒙影響，不是某一種情緒可以主導或壓制其他情緒嘅，不過哩啲唔係迪士尼主要粉絲（小朋友）可以明白㗎喎，所以哩齣戲唔係咁啱幼童。唯一比較有意思嘅係Joy嘅最終覺悟，由電影一開始擅自把Ridley不愉快記憶拋諸腦後，故事結尾反而釋放哩啲記憶，成就Ridley完整嘅人格，我哋如果只有愉快記憶只會落得過分樂觀，正因為我哋記得以前嘅唔開心同失敗，我哋至會小心謹慎，避免害己害人，所以Ridley最後同將要轉校嘅兩位好友重修舊好，喺融入新朋友和新隊友圈子時也不致完全放棄真我，懂得自持和保有自尊，不過朋友和解及九種情緒和諧相處，遠不及上集Ping Pong嘅犧牲咁真摯感人。而故事最大嘅缺失係Ridley既然已進入青春期，居然冇男女感情線，對異性嘅好奇完全冇，成齣電影好似喺尼姑庵發生咁，可能迪士尼諗住拍第三集至加入初戀橋段卦，不過今集咁悶，如果收得至講開拍新續集啦！

相隔多年，第一集女孩角色已成長到少女階段，人生經歷亦增加，第二集於是加入幾個新情感角色，整體保持水準，感覺像睇真人角色成長show，估計第三集、四集、五集會一直拍落去，cover哂一個人生、老、病、死，工作結婚、生子等不同階段產生不同情感同遭遇。如果係咁嘅話，會係一個唔錯嘅人生體驗show。不過有讚亦有少少彈，第二集雖然保持水準，角色有成長，亦加入新情感角色，但好似只係喺固有嘅框架中擴大、並非突破。作為第二集仍可接受，但如果第三、四、五...仍然都係咁嘅模式拍落去，就難以繼續吸引觀眾，希望第三集及以後每一集都能在固有戲軋中再加啲突破。