過界

1.2013年嘅香港電影其實都大放異彩，不過光芒似乎落喺王家衛十年磨一劍嘅『一代宗師』、暑假檔期彈出青春夢想『狂舞派』、張家輝瘋狂操肌中佬危機大反擊『激戰』以及年尾Juno驚艷之作『殭屍』等。其實仲有唔少值得留意嘅佳作㗎，今日就同大家講吓一套喺該年年尾上映嘅作品 - 『過界』。.製作團隊星光熠熠 - 劉嘉玲陳坤主演、施南生俞琤監製、杜可風攝影、阿叔張叔平亦有從中幫手。電影當年更入選康城影展「一種關注」單元，可惜返到嚟香港接近零迴響低調上映，實在太可惜。我一直覺得呢套戲係近代嚴重被低估嘅港產片滄海遺珠，不過平實風格未必人人受得落。-2. 儘使兩位主角生活嘅世界懸殊，但佢哋同樣面對嚴重困擾嘅問題，苦無傾訴對象只能獨自承受。所以戲中頗多場面佢哋毫無對白，單靠表情同肢體語言去演繹。.女主角雖然面對重大打擊，貴婦慘變失匙夾萬但仍要假裝無事維持日常生活，致力保持自己係上流社會階層；男主角極力爭取辦法俾老婆來港產子。.片名『過界』並唔係指兩人情感上越軌 - 女主角老公玩失蹤，被迫從上流生活墮落；男主角為求目的而踩界搵錢，最終帶住老婆跨越地界，佢所跨越除咗係實際嘅地域分界，亦係道德界線。.以上劇變導演卻採取生活化方式敘述，透過主角們普通日常生活嚟營造呢個漣漪嘅影響。面對困難人容易迷失信念，會好似主角咁寄托風水轉運或者賭博「以小博大」，但無論如何生活仍然要繼續走落去。-3.我極力推崇劉嘉玲嘅表現，甚至認為係佢近十幾年嚟演得最好嘅作品！可惜金像獎連提名都冇，實在太可惜了。佢精湛演出有賴杜可風嘅鏡頭相輔相成，用上較多handheld鏡頭捕捉佢神情流露，舒服同自然到唔覺得做緊戲。.有幾幕佢喺屋企覺得無助軟弱，坐或瞓喺床上沉思嘅場面就展示咗佢神級演技啦，一個眼神一個動作勝過千言萬語。-4.同樣有精彩演繹嘅仲有兩位女配角 - 車婉婉同江美儀。前者當時轉投杜sir旗下銀河海潤經理人管理，集中火力喺影壇發展，另一深刻印象嘅作品就係周冠威長片出道作『一個複雜故事』。.意想唔到車婉婉能夠咁收放自如，尤其輕鐵一幕強忍眼淚離開陳坤已暗示兩人以往關係，可惜佢近排都係返入大台拍劇。至於江美儀戲份都咁少，表面上都係做返啲八婆闊太角色，但就喺餐廳嗰幕憑着微妙表情成功牽引到場面 - 聽完劉嘉玲嘅大話扮冇嘢而又露出一絲耐人尋味嘅眼神。.真正嘅演技唔係一味靠呼天搶地大聲喊呢啲咁表面嘅嘢，要捉到屬於套戲同埋角色嘅情感因而調節力度。有啲演員過分捉錯用神只會令觀眾更加嫌棄佢嘅演繹。-

可以拍得更好：如交待鄭凡瑞點解破產，同陳坤點解同車元元分手

好有味道

好睇！

To: 有錢人: 唔好以為自己有錢……就好似好風光gum...其實有事發生時……你會發覺你日日見到既人……做既事……去既地方……都係假的……所有野都係 虛榮……空虛的……要懂得有錢時……分得出……咩係真……咩係假……珍惜……同真心是最重要的……To: 努力揾錢中既人: 有錢佬唔易做……錢可以換來好多物質上既需要……係可以買mud 都得……做mud 都得……但同時做有錢人……會換來好多你用錢都買唔走既野……有錢人沒什麼好羨慕的……總結……做番自己……唔做假開心的人著幾多……食幾多……整定的……最重要係……活在當下…… 珍惜現在有的……身邊既人……家人……朋友……知己……一日未完……路都要繼續行……別眼紅別人……亦唔好 冲大頭鬼……做番自己才是最重要的！！

講述大陸同胞來港生B其實好有苦衷！同埋講述一個有錢太太的老公失蹤了的心情，感受到那份無奈和無助但又要在其他人面前死撐、裝作若無其事！