再繫「腦」朋友

(首先呢套戲同玩轉腦朋友(inside out)無半點關係，佢續集好似暑假上~) 講返套戲，前期節奏有點慢，到後來入主線任務開始正，途中有天馬行空嘅小朋友想像世界，同埋"配對"過程各種苦與樂，加上結尾嘅反轉，幾適合大人睇，放鬆一下。4.4/5 (87分)

《再繫「腦」朋友》我好少讚西片嘅中文譯名，但今次例外，中文片名已交代咗故事主題。每個小朋友童年寂寞時，都會幻想或虛構一個「朋友」出嚟，然後對住佢自言自語，就如Inside Out入面Riley嘅Bing Bong一樣，不過細路仔會長大，哩啲腦海製造出嚟嘅「朋友」隨住主人成長會被遺忘，就好似Toy Story入面Andy會放棄Woody同巴斯光年咁。今次故事女主角Bea以為自己長大咗，唔再需要腦朋友，於是同好多大人一樣忘記咗哩位兒時靈魂伴侶，但其實人冇可能完全長大，總有一部份心智未成熟，總有孤單軟弱嘅時候，這時如果能從記憶或經驗中呼喚腦朋友出嚟，可以減壓可以紓困，有助心靈健康，不致鑽牛角尖，精神勝利法又好，自我安慰又好，總好過發神經自毀自殘自殺卦！電影中Bea同Calvin成為拍檔，一齊幫大人老人搵返腦朋友，然後繫在一起，相親相愛⋯⋯講到腦朋友係真實存在咁，我哋可以冇咗佢哋（長大後），但對佢哋嚟講，我哋係佢哋嘅一生一世，甚至全部/所有，哩個信息Toy Story同愛護動物組織都有傳遞過，冇乜新意，尤其同Inside Out裡嘅Bing Bong為Riley犧牲相比，感人力度不足，眼眶嘅濕潤程度差太遠了，係決堤同乾旱嘅區別。不過故事主題健康，腦朋友造型性格言行都很可愛，都好啱小朋友甚至一家大細一齊親子樂。只是Ryan Reynolds表現不過不失，冇驚喜。女童星Cailey Fleming太大個又演技一般，而佢哋嘅關係或連繫，開場唔夠十分鐘已經好容易估到，冇咗完場前真相大白嘅驚喜！不過最失色係老人早場冇英文版，廣東話配音加諸西片上有啲「失真」嘅感覺，尤其令我錯失咗Awkwafina、Brad Pitt、George Clooney、Blake Lively、Matt Damon、Emily Blunt、Sam Rockwell同Bradley Cooper一眾巨星磁性動人悅耳嘅聲演！如果老婆放工有時間，我願意陪佢睇英文版，實行二刷！

睇完全片搵唔到突出嘅地方，笑位或有趣位亦冇乜，亦冇乜高潮位，而各種設定亦未能令觀眾留下深刻印象。唯一較突出係女主角小女孩，演出不俗，外形亦討好，但男主角在片中角色同表現卻平平無奇。

你話拍俾小朋友睇又唔係，因為其實主旨幾深奧，小朋友未必明，而且套戲本身又唔係好好笑，啲IF又唔係好可愛，小朋友唔知啱唔啱睇？但拍比大人睇又唔夠認真，劇本唔完整，解釋得又唔夠清楚，有啲反駁位搞到有少少兒戲，結果拍出嚟好似搵唔到適合觀眾群？唯獨係個結局唔錯，係驚喜嘅。Overall套戲本身節奏正常、尚算輕鬆，講真如果唔係Ryan Gosling+John Krasinki都冇可能入場，所以不過不失啦。

陪伴童年好朋友要忘記得一乾二淨唔係被人當思覺失調