走走停停

個人覺得套戲是有驚喜，導演執行同處理也好。我形容套戲好準，每個環節也好睇，故事輕鬆得來也有層次、角色塑造明確、演員演繹有水平。個人覺得導演想藉這個故事來寫出一批外闖不成，回到老家的內地年青人的心態，導演在這方面的描寫的確有水平，而我也喜歡套戲中另一個主軸，何謂是真實的記錄片這個設計。講真，這套的結構上同 不虛此行（大家也是胡歌當男一同以編劇作為故事設計）有點類似，但走向卻不同，這套卻比較偏向輕鬆向。不可不講，胡歌今次的演繹確演得好，他演這個一事無成的文藝向廢青頗為傳神。整個角色面很出，而之後的演變的拿捏也恰到好處。而個人也喜歡套戲中演他爸爸媽媽的演員的演繹。痴·影·夢·藝 X 的專頁 https://www.facebook.com/ckwunmovie/

一套有死人但唔太睇得唔太sad嘅溫暖家庭喜劇。整體故事唔複雜，但結構緊密完整，劇情推進流暢自然，加上選角同演出都恰到好處，自然嘅演繹令觀眾完全投入到戲中嘅人物關係同情感。更重要係片中嘅笑位都係嚟得自然不突兀，成功令呢套家庭溫情片同時亦係一套不俗嘅喜劇，其中有一、兩個笑位重係爆笑級。😄演員方面，胡哥演繹潦倒中年唔錯，但同其他三名家庭成員外型乎唔太夾，但對電影整體問題不大，父母演員外型寫實，演出亦非常到位。高圓圓明顯老咗，但仍然高顏值。全片印象最深刻係結尾胡哥同高圓圓公路塞車你前我後，我前你後果幕，雙方尷尷尬尬咁，又唔敢叫對方，但又走唔甩果幕，好有感覺。總括嚟講呢套係上佳之作，言之有物，完場後腦海仍會留有餘韻，絕對值得入場。

男主角雖然沒有取得世俗意義上的成功，但這就表示他就是失敗者嗎？一家拍片過程中的各種幽默，觀影體驗相當舒服，雖然中途遇到重大轉折，但仍坦然面對。戲中沒有煽情情節，也沒有升華主題，有的就是人生的寫照。相信開頭的問題，觀影後大家心中也會有自己的答案。4.7/5 （93分）

最近又歐洲國家盃又美洲國家盃，晝伏夜出，兩星期不能出門去戲院了，看過《繁花》覺得王家衛找胡歌仿效梁朝偉《花樣年華》式又懷舊又獨白，初初還可以，但連續三十集獨白就變成「煩花」又煩又花時間，加上哩齣戲上映戲院又少，所以本來冇諗住睇，但風評不錯，碰巧路經青衣城，便適逢其會，結果喜出望外。電影相當寫實，如果還有通識科，絕對係學校包場教「現代中國」單元嘅好教材，胡歌「北漂」失敗，回鄉做「啃老族」，對著兩位「空巢老人」過著「躺平」的日子，無意中被老媽發現一個「停」下來未開拍嘅劇本，於是又「走」上離京後回到重慶實現拍戲嘅路，無奈找不到男女主角差點要「停」，結果老媽出馬老爸出錢又繼續「走」，但老媽猝逝又「停」，結果老爸粉墨登場完成愛妻遺志終於「走」完戲中戲嘅戲軌，但戲是拍完了，無戲院上畫又「停」了三年，這段時間吳迪（胡歌飾）轉做的士司機，直至參展勝出為亡母奪了個新人獎，於是吳迪遇上轉機又繼續「走」銀色旅途，將來還有幾多走走停停不知道，這時片尾主題曲響起，大意是「人生太多不如意，走走吓要停，停咗一陣又走過，能勇敢地繼續生活下去，真要感謝自己！」大陸宣傳要年青人放棄躺平，不如送戲票請佢哋睇免費戲啦！胡歌演得好，但只是一般的好，只有一場戲令人印象深刻，就是分開三年後，轉做揸的士嘅吳迪在公路上遇著鄰車嘅馮柳柳（高圓圓飾），由於堵車兩人再一次肩摩轂擊地「走走停停」，始於高中同學時期，兩人互有好感，一個留意對方，另一個以為對方沒有留意過自己，走過又停，中間一個北漂一個留在重慶當記者，後來一個結婚離婚又變成單親母親，遇上回鄉嘅吳迪，邀請對方做紀錄片《返鄉的人》中嘅訪問對象，並鼓勵及支援吳迪開拍《似是故人來》，兩個人又走在一起，無奈電影因為老媽猝死停了，紀錄片被上司掠奪成果，令柳柳離職離鄉決心北漂，吳迪沒有相隨，兩人一起走路的日子又停下來⋯⋯直至三年後公路上塞車相遇又不相認，女嘅再婚，男嘅重新上路，走走停停，互相偷眼偷望對方，你看我我詐看不見，我看你你也詐看不見，最後只好接受今生大家都注定錯過對方，一起走嘅日子就停在這裡，不必相送，又一個中國版本嘅La La Land！電影有不合理嘅地方，柳柳和攝影師根本不知吳迪嘅實力，居然貿貿然又借器材又做義工幫吳迪拍一齣佢哋連劇本都未看過嘅電影！不過岳紅飾演嘅老媽於北京國際電影節拿下最佳女配角，絕對有說服力，無論重慶老媽，還是戲中戲嘅徐娘，完全兩種風格，但完全自然投入，深深吸引著觀眾，即使胡歌高圓圓係男女神級嘅俊男美女，觀眾都完完全全被岳紅吸引著，一個大媽看似冇乜學識，但生活智慧中淬礪出一些睿智嘅金句係全片最好嘅對白，令電影亦因此拿下同屆北京電影節最佳劇本和電影獎，相當實至名歸！「成功嘅人就係金，失敗嘅人難道就是屎？」講得好，如果撈唔掂嘅人係屎，咁通街都係屎啦，唔怪得哩個世界四處都臭不可擋啦！「人生嘅路有易走有難走嘅，通常人都會揀易走嘅路⋯⋯」於是為自己年青時放棄去北京受訓及為兒子北漂失敗搵到開脫或自我安慰嘅藉口，其實一切都係個人自己嘅選擇，所以人生最終成功或失敗，都不必怨天尤人，因為都是自己決定的，總之繼續走下去就是了！

本片《走走停停》係一部國內寫實喜劇，拍得唔錯，我較少睇內地電影，但近期睇過好幾部，例如由張藝謀執導嘅《第二十條》，都令我印象深刻，可惜港人大多厭惡內地嗰種陸味，連影視作品都難倖免，所以本片只得三間戱院上映。但我大力推薦，值得入場，散場都唔好即走，聽埋首主題曲，旋律動聽而歌詞又好有意思。而完場前場景在公路上塞車，汽車走走停停，男女主角各在自己車上，隔隣並排向前，但重遇有如陌路，頓覺人生無常，可能這是決定片名時忽來之靈感。戱內男主角吳迪，由胡歌飾演（即現在熱播王家衛《繁花》電視劇內主角寶總），愛好文藝寫作，係一個所謂「脆皮青年」，北漂北京超過10年，愛情事業兩無着落，回到家鄉依附父母，在舒適圈comfort zone 躺平，據說這種現象在目前國內頗為普遍。後來吳迪在家鄉重遇高中年代曾經愛慕的女同學馮柳柳（本片女主角由氣質女神高圓圓飾演），她一直冇外闖，在家鄉做着自己平生喜歡嘅記者工作，係已離婚單親媽媽。後來大家合作以吳迪所寫的故事《似是故人來》拍紀錄片，又帶出唔少笑料。《走走停停》最近在2024北京國際電影節中，獲得七位評委全票通過贏取最佳影片獎，的確係實至名歸。