有詭難言

故事有些太長，以致情節舖排乏力不緊凑，未能突顯玩弄獵物魔力~~言語操縱思想。如果情節緊凑些，觀眾更能感受壓迫感。不過不失。歹角夫婦表現不俗。

3.8⭐前段懸疑+後段驚慄嘅電影。戲名“有詭難言”都幾貼題。頭一個小時好似冇乜嘢，口水多過茶，但一啲都唔悶，對話同演員表情不斷帶出懸疑氣氛，有追看性，後段揭開謎團後轉入直路逃生過程具驚嚇感。呢類戲唔合理位一定有，如屋內充滿道具(好似打機咁😅)、壞人硬係要玩弄好人唔將佢一槍了結最後招至失敗...等等，過份聽古要駁古嘅就唔好睇戲喇！😄啞巴男童演出幾好，表達到有詭難言嘅慘況。

前期氣氛和諧舒適，中期覺得唔對路，真相慢慢浮現，後期開大片，結構上有d似近期另一套戲<<求救眨眨眼>>, 而呢套整體來講唔算悶，打鬥過程亦精彩，娛樂性相當唔錯。4.5/5 (89分)

自從《思裂》就對James McAvoy扮演顛佬好有信心，今次都冇失望，不過編劇就麻麻地，錯漏百出，雖然美國時有類似新聞，旅途上入咗黑店motel、遇上不懷好意當地人慷慨借宿，然後謀財害命男殺女姦⋯⋯但都係守株待兔、甕中捉鼈⋯⋯比較被動，唔會好似James咁主動兜客，仲要帶埋受害人死剩種去海外吸客咁冒險，試想個細路仔後尾咁勇敢，當初去到意大利遊客區仲唔向警察求救？而且James又唔係佢老爸，點帶個唔係英國人嘅小朋友出入境呢？電影後段困獸鬥、貓捉老鼠🪤都算幾緊張刺激，不過既然初心係謀財害命，使唔使鋪排三日兩夜呢？又遠足又水療又出外盛宴，第一晚就應該手起刀落啦，仲使唔使培養感情同信任呀？最後三個壞人持槍又喺主場，之前咁多家庭冚家升仙，最後哩一家三口冇乜過人之處，點解可以虎口餘生呢？不過中國人嘅古老智慧真係值得銘記「無事獻殷勤非奸即盜」「光棍佬教仔 便宜莫貪」「疑人之心不可有 防人之心不可無」出外旅行，切勿輕信陌生人！

美國夫婦賓Ben/露依𢇁Louise連同女兒Agnes艾妮絲一家三口在意大利度假，遇到另一對英國夫婦Paddy柏德/Ciara姫娜同阿仔Ant安特。大家相處甚歡，後來柏德更邀請Ben一家去他英國南部Devon郡附近的農莊小住遊玩。套戱精彩之處就在農莊幾天中的生活片段，懸疑而令人驚心動魄。柏德話自己係醫生，有參加無國界醫生工作，並話個仔Ant 天生缺陷冇脷，講唔到嘢，老婆又唔可以再生育，神神祕祕，似有不可告人秘密。兩家六口，每位演得都好好，好耐冇睇過呢類咁過癮電影，大力推薦各位入場。

根本係James個人表演電影，如果唔係佢根本冇乜需要入場。前part文戲仲好睇過後段嗰啲動作場面，後段嗰啲劇情越睇越炆憎，又係太多反駁位，再加個廢柴老竇同煩膠女，成家人都係靠個老婆carry先唔使死，呢啲戲總係見到個弱智設定，例如手提電話唔用來叫救命🤷🏻‍♂️總括嚟講，中前段鋪排仲有啲意思，起碼有少少feel，製造到嗰種懸疑同細思極恐嘅感覺，節奏都幾好，但後面開始弱智化真係搞唔掂。冇James呢套電影根本唔需要入場，或者你想睇佢嘅話，都可以入場。