安妮夏菲維
電影評論
《 怪誕黑巫后 》Anne Hathaway 贏晒
於17/11/2020發佈

《 怪誕黑巫后 》Anne Hathaway 贏晒 《 怪誕黑巫后 》難搞,有 Anne Hathaway 出場嘅時候就好睇,無 Anne Hathaway 出場嘅時候就麻麻,而結局就令人好頭痕。再一次改編80年代嘅(暗黑兒童)小說《The Witches》,1990年嘅電影版本以當年標準嚟講算係幾有趣同獵奇;30年後嘅全新版本電影,故事骨幹一樣,改為以 CG 處理所有女巫相關嘅特效,畫面係就係做得幾細緻,不過電影喺整體上顯得活力不足,都幾失色。   暗黑兒童系 《怪誕黑巫后》一開始嘅鋪陳太冗氣同乏味,太多老土嘅對白,太多「哦,其實係咁樣嘅⋯⋯」嘅馬後砲,多數都係出自 Octavia Spencer 把口,亦係點解 Octavia Spencer 嘅外婆角色唔太好睇嘅原因。《 怪誕黑巫后 》劇情王道得嚟(唔計結局,下面再講)其實都幾幼稚,主角群同女巫嘅對決過分單調,小小男主角突然集勇氣與智慧於一身嘅橋段過分兒戲,劇情兒童向但係電影風格又唔夠童幻,感覺唔太 balance   AnneHathaway贏晒 如果無 Anne Hathaway 七情上面嘅演出,《怪誕黑巫后》或者就會不堪一擊。小小男主角得半齣戲嘅戲份(另一半時間佢係一隻老鼠),無乜發揮,演技都唔夠成熟,至於 Octavia Spencer 就如上文所講因為畀角色設定連累而唔太好睇,完完全全畀 Anne Hathaway 撳住嚟打。繼《盜海豪情:8美千嬌》同埋《圓美大盜》之後,Anne Hathaway 嘅女王霸氣、神經質仲有藐嘴藐舌(約等於八婆の条件)進一步升級,可謂已經去到爐火純青嘅階段,搶晒所有人鏡,好可惜劇本無空間畀佢再癲多啲喪多啲。其他女巫實在太廢啦,戲份亦都比想像之中少勁多。   結局氣氛超級古怪 唔知大家有無睇過1990年電影嘅結局呢?當年都係行一個大路嘅大團圓結局,平平無奇,但至少 make sense。至於,2020年嘅結局就⋯⋯編劇可能想大搞新意,寫出一個極度反常嘅結局,不過就弄巧反拙,好突兀,好誇張,情感上好唔合理,而且收尾得太急,我真係睇到呆咗。究竟只係得嗰幾歲嘅幾位小主角係點樣接受自己有一個咁衝擊嘅結局㗎呢?更加稀奇古怪嘅係,Octavia Spencer 喺電影裡面不斷咳不斷咳不斷咳,究竟咳咗咁耐嘅意義又係乜?   文:靈光

電影熱話
《 走佬俏公主3 》正在籌備中 安妮夏菲維、茱莉安德絲落實出演!
於28/1/2019發佈

安妮夏菲維(Anne Hathaway)主演成名作的《走佬俏公主》(The Princess Diaries),自2001和2004年上映第1、2集,便深受觀眾喜愛。電影除了為安妮帶來極大人氣,茱莉安德絲(Julie Andrews)的皇后角色亦深入民心。近日,安妮在節目上透露,《 走佬俏公主3 》的劇本已大致完成,證實未來的確會有第3集!

電影新聞
連卡佛 呈獻《潮遊鏡花水月》首映禮 周汶錡、諸葛紫岐、麥明詩、雷頌德等盛裝亮相
於7/9/2016發佈

美國翠貝卡電影節『開幕電影』《潮遊鏡花水月》(The First Monday In May) 直擊去年紐約大都會藝術博物館舉行的Met Gala慈善籌款晚宴及服裝藝術部春季展揭幕禮,拍下精彩的籌備過程。著名精品百貨連卡佛於昨晚 (9月6日)假PALACE ifc 戲院特別呈獻《潮遊鏡花水月》首映禮,率先邀請城中時尚達人盛裝出席。

FIND US ON FACEBOOK
私隱政策
使用條款
免責條款
c655d01