重慶森林 (4K修復版)

前半有啲悶，後半隨著California Dreaming響起，即刻醒晒，王菲神神化化嘅演出，根本就唔係演緊戲，係做緊佢自己，好一個夢中人！梁朝偉大部分對住死物做戲，例如毛巾、毛公仔、魚缸、前女友衣物⋯⋯別樹一幟，首奪香港電影金像獎最佳男主角獎，實至名歸。金城武和林青霞靜默中嘅火花💥明顯唔及梁朝偉王菲那一pair嘅化學作用咁令人印象深刻，所以梁王後來還合作了兩次。王家衛終於確定了佢嘅電影可以放低劉德華，但唔可以冇咗梁朝偉！佢嘅演員班底和拍攝風格亦從這部電影開始奠基。電影嘅音樂、服裝、外景、美指和攝影都一流，百看不厭！

本片係三十年前1994王家衞作品，可說係一部經典香港電影，在電影史上佔一極重要地位，現在上映嘅係 4K修復紀念版。幽默而簡樸的對白或獨白，都係本片特色，此亦即所謂經典嘅原因之一，此外王導鏡頭的運用，主鏡、副鏡、長鏡、近鏡或搖鏡，都極有特色，營造出一種動人或震撼的效果，令人難忘。戱內幾位主角包括林青霞、王菲、金城武、梁朝偉，當年風華正茂，俊男美女，尤其朝偉，真係好靚仔。片中有兩個不同故事，但有兩個共同點：1）男主角都係警察，2）兩個男人都一樣失戀。今日重看，另有一番滋味在心頭，30年前仍是英治，但已是回歸倒數，好多人人心惶惶，前途未卜。到今天，戀殖者好似戲內兩男主角失戀，重尋舊處，人面全非。兩男都係普通警員、正如大多數普通人，都生活於疏離、孤寂與迷失之中，但王大導這部戲冇濃重傷感，反而叫人忘記過去，正如金城武在雨中跑步，淚水汗水已分不清，重新上路，尋找另一個夢，另一段愛情。

用音樂配合主角心情是導演王家衞擅長手法。’Things in Life’ 很配合警員223(金城武)和金髮女郎(林青霞)的心情。‘California Dreaming’ 也很適合阿菲(王菲)視663(梁朝偉)為夢想的人，直至663情傷癒才察覺佳人一直在身邊守候。當年的四位主角已經很懂演戲，令人看得好舒服。

難怪係「世界影史百大不朽電影」，無論鏡頭、意境、拍攝技巧都無懈可擊，仲可以將香港獨有嘅景色拍得咁地道、唯美。梁朝偉演技唔洗講，對住死物做劇都可以咁好睇；王菲真係天生食呢行飯，演出到佢獨有嘅跳脫感；相比之下前段金城武同林青霞劇情就失色少少，而且時長比例都差好遠，感覺前段出場都係為梁朝偉嘅後段鋪路。不過兩者用罐頭、跑步；毛巾、飛機模型等表達情傷手法如出一轍，實在非常優雅，雖然我比較喜歡後段劇情，但前段金城武出現都有一定重要性。梁朝偉食煙個畫面真係靚到痴線！戒煙L表示點頂呀？淨係入場係大銀幕睇梁朝偉食煙都值啦！而且比我呢啲90後睇到全盛時期嘅香港，仲有舊機場，真心正！

呢套冇5分，都吾知邊套值，依舊中環尖咀，一樣的明星，但在1994年不一樣王家衞鏡頭下呈現香港壓迫、獨一無二浪漫的氛圍，火花好到接近完美，這恐怕在巴黎也找不到拍不到，4K修復又是不同感受，有幾幕調光了更清晰，香港有幸曾經有這夢幻組合，再上映恐怕會再看一次。