周處除三害

本來以為係一套警匪片,睇睇下變咗黑幫片,跟住再變宗教片,然後就係懸疑片，後來又變左愛情片,最後原來係哲學片。編、導、演都高水準。開頭聽到導演個名有啲猶疑,但係今次絕對係翻身之作。追逐場面緊張, 打鬥拳拳到肉,畫面有台灣獨特風味, 對白有心思有哲理。每個演員都做得好好:三害之中,阮經天有血有肉、雖瘋狂但有情義;袁富華內斂兇狠、喜怒無常又多疑;陳以文皮笑肉不笑、令人不寒而慄。王淨就係一個影后級嘅周慧敏,恰如其分。要特別提一下，陳以文演技真係出神入化。無論演「陽光普照」嘅教車師傅、嚴肅老豆;演「大佛普拉斯」嘅貪財好色、賤格立委;「瀑布」嘅戇直老實、單身中佬;到呢套「周處」做嘅呃神騙鬼、逃犯尊者，套套都入形入格，印象深刻。戲入面啲歌好好聽，好療癒但係在不同場合又會令人聽得心寒。套戲冇冷場,估唔到咁好睇,唔好走寶。

導演可算是一雪前恥，可謂cult片中精彩嘅作品

個人覺得套戲是精彩，估不到黃導可以有這樣的處理同執行，無論是人設、故設、場面調度、編劇、美術音樂等，也是驚喜。黃導在整套戲設計也得精密，每一個章節也好有層次感，可以將周處除三害同貪嗔癡這兩個主軸充份地突顯出來。而更難得是套戲越睇越有其折理，他所涉獵的也闊，由人性到宗教也有涉獵，這樣更令套戲更為昇華。我會形容如果樹大招風是香港犯罪片的經典的話，這套便是台灣犯罪片的經典。而演員方向，無論阮經天、陳以文、袁富華好，他們的演繹也是精彩，三者也可以演繹出不同類型的惡，而他們互相交織也令套戲更好睇。而技藝上，這套也是精彩，無論場面、美術、攝影也是，個人最為喜歡尾段那場殺戮同阮同袁刮鬍的一段。這兩幕在可以反映黃導上乘的功架。痴·影·夢·藝 X 的專頁 https://www.facebook.com/ckwunmovie/

故事以佛教的貪嗔癡為中心架構，脱俗及帶有佛教味道，近期少有如此佳的故事編劇。演員阮經天、袁富華及陳以文表演出色，其他演員也不錯。編導演攝影俱佳的電影，值得一看。利申：個人較喜歡帶有佛教味道的電影如：血觀音、大佛普拉斯……。

周處除三害嘅典故，喺通緝犯list出來之後就呼之欲出，男主角作為三害之一，仍然挺身而出，用自己嘅方式為社會除害，上半部劇情精彩刺激不在話下，下半部節奏稍為放緩但帶出不少人生哲理值得反思，雖然真相大概都估到。本片集合犯罪，動作，感情，哲理等元素，而且各種元素穿插嘅戲裡面亦相當流暢自然，不但沒有說教嘅感覺，睇後亦猶有餘韻。4.6/5 (91分)

一套有關人性、善惡、救贖、決擇、溫情...等等好多元素嘅黑幫犯罪劇情電影, 有好多可以細味嘅位同對白。編、導、演等等各方面俱佳。尤其阮經天, 呢套戲證明到佢嘅演技。全片可以講係一雞三味 - 阮經天自身故事、阮經天與袁富華故事同埋阮經天與邪教教主嘅故事, 串埋一齊可以感受主角由惡變善嘅心路歷程同角色嘅變化。故事編排流暢, 睇得舒服。雖然話係黑幫犯罪片, 但以劇情取勝, 動作場面唔算太多, 幾場追逐打鬥戲過情無論鏡頭運用同設計都幾有水準幾精彩。最終果場邪教殺科戲幾有戲劇性, 生同死全取決於你嘅決擇, 畫面都幾震撼。另外一提袁富華, 早排先睇完佢喺“說笑之人”係一個輕度弱智令人感動嘅慈父, 記憶尤新, 現在卻係一個喪心病狂人人喊殺嘅人渣, 感覺幾有趣。😅