殺手#4

3.8⭐睇呢套戲時一路令我唸起：- John Wick (世界觀及打鬥場面)- 這個殺手不太冷 (殺手男主角對女主角嘅關係成長同訓練培育) - 80s/90s日本動漫OVA (人物塑造、故事節奏、分鏡、配樂) - Kill Bill (由非日本導演拍出嚟嘅唔自然地突顯日本文化畫面)當然，本片不能跟億萬金元(美金)製作費嘅荷里活電影相題並論，但以新導演、冇大卡同喺有限資源情況下算係交出唔差嘅功課。本片故事係可預期，整體算流暢，劇情交代算清楚，不過有啲細位唔太合理、夾硬嚟又或冇交代清楚，不過仍然喺可接受範圍之內，未至於影響電影整體觀感。但個人認為電影劇情、打鬥場面、港日語言不通同文化差異所產生嘅戲劇效果(衝突、笑料、誤會、產生感情) 仍有更大發揮空間可以令電影更加精彩，不過以新導演同有限資源下能拍出現水平已算對得住投資者同買飛入場嘅觀眾。電影亦已建構出一個江湖世界，大可以拍續作，繼續深化其世界觀，解釋更多本作未有解釋嘅設定，如殺手組織由來、點解選擇男主角、點解係第4號，又或者安排其他編號殺手出場，拍成系列電影。演員方面，男主角選角ok。魏浚笙本身外型靚仔，電影中造型都幾有漫畫感，演出雖未至於10分水平，但對於片中角色要求嚟講已大致上達到應有效果，若演技上多加磨練，大有前途。至於日藉女主角，本人對佢完全冇認識，就本片而言，同樣未至於10水平，算中規中矩，但亦達應有水準。整體電影屬中上水平，拍出趣味，港日合作亦擦出火花，如果能加多少少黑色、加多少少cult，提升多少少血腥暴力會更有趣味/玩味。期望會有續篇，睇到更多號碼嘅殺手出現。PS.• 幾鍾意男女主角用手機translator 嚟溝通，對於經常去日本旅遊嘅香港人好有代入感• 近年港產片太多獅子山下，呢套感覺幾有新鮮感• 其實港產片题材/市場上應該面向國際，唔應該只係面向本地同北面，同海外合作或吸納海外資金亦都係一條出路• 本人睇嘅係謝票場，Jefferey 係幾靚仔，幾有potential，希望佢努力同星運享通啦！

港日合作的《殺手#4》，是一齣不搭調的電影。導演梁居英對片中主要角色的性格設定，予人相當平板，以及不切合身分的感覺。就以#4（魏浚笙飾）在電車上層襲殺目標人物為例。這一幕除了凸顯#4是一個既不專業，徒手格鬥能力亦不外如是的殺手之外，唯一有意思的地方，是令人聯想起四十年前《烈火青春》，夏文汐與湯鎮業同樣在電車上層「肉搏」的經典畫面。女主角雲（南沙良飾）初登場的行為，則是另一幕令人不忍卒睹的鬧劇。這名被描繪成天真爛漫，外帶一點點可愛的日本少女，實際上是身負不共戴天之仇的苦主。這種不理會是否合適，近乎興之所至的安排，最終將一個勉強可稱之為脈絡完整，打鬥設計、攝影視覺效果俱佳的殺手故事，演繹得不倫不類。全片唯一觸動人心的瞬間，是突然響起了中山美穗的歌聲。誰能料到2025年12月6日，美穗的第一個忌日當天，竟然會猝不及防聽到〈世界中の誰よりきっと〉迴盪於戲院內。歷年感想，存檔IG及FB：pm7290movie（https://www.facebook.com/Pm7290movie-105185654399988/）歡迎瀏覽。

開頭以為香港+殺手都伏伏地，點知入場後出奇地好睇。老實講劇情唔算有咩驚喜，Jeffrey演出不過不失，都係個種靚仔+Chok樣演技，但鑒於《殺手# 4》實在拍得佢太靚仔，直頭可以攞最佳攝影。而且佢仲算新演員，應該仲有突破，希望佢可以更進步啦；女主角真日本妹勁可愛，但演技都無乜特別。最特別係廣東話同日文透過翻譯app雞同鴨講擦出少少笑話咁，用呢個方法解釋合拍片言語不通嘅問題都幾有想法，最重要翻譯app呈現出嚟唔似蘋果發佈會個AirPods Pro 3即場翻譯咁突兀，用翻譯app呢part拍出黎可接受，但對白你話真係寫得好好亦未算。而劇情都係寫得中規中矩，最早段無咩殺手無啦啦戀愛腦智商急降劇情，但當然無出意外嘅殺手就無咩特別可以拍啦。幸好雖然劇情細節上寫得麻麻、橋段亦偏老土，但整體都完到個故事，無乜大Bug。我覺得全套戲最大加分位係世界觀，殺手組織嘅設計比想像中嚴謹，呢點就係我最喜出望外嘅部份。殺手組織唔止講前線殺手，而係成個組織上下級有哂完整產業鏈，中間人=開食堂，用三頭招財貓黎貫穿殺手組織；殺人賺錢咁偏門所以好信鬼神，首領就係各國嘅宗教領域。雖然只出現日本同香港兩個地區嘅殺手組織，但已經足夠說服到我呢個係一個有幾百件歷史、凌駕於政府、有規矩嘅跨國組織。當然個世界觀都唔係超級創新，好多殺手世界嘅設定都見慣見熟，感覺似寫一本小說。但導演執行能力奇佳，可以拍得返自己嘅想法出黎，仲要勁好睇個下好野。差啲唔記得講每個角色出場嘅字體介面都好有美感，又係出自導演手筆！《殺手# 4》雖然劇情普普通通，但勝在世界觀寫得好、美術都好到位。雖然係港日合拍片我唔知日方佔幾多比例，但香港主導我真係覺得好有驚喜。

犯駁位多到不得之了咁多，根本令觀眾難投入戲，男主真係得個樣，演技真係要下d苦功啦，香港2個男女配角，可以話完全係無戲可做，特別係女配。日本演員較為好戲，由女主到配角竹中都係唔錯，唔錯唔係代表角色的設定性格及動機，講都只係佢地演技。全片最可取係美術方面，打燈都係好既。仲有一點中山美穗首歌唔係卡帶年代啦，明顯係工作人員既自己喜好，但唔該都做下功課啦。

青春殺手故事，靚仔靚女加日本場景已經好好睇，不過兩個主角嘅關係發展太慢，仲有個小朋友，可以再用力描寫多啲，會再好睇啲。女主角係幾好戲，同埋講廣東話討喜。拜託拍第二集，搵女主角嚟香港拍。

劇情講唔通 睇到一半已經眼瞓 對白故弄玄虛想營造神秘感 做唔到John wick嗰種殺手組織嘅威嚴反而畫蛇添足 主持 尊者 出現得莫名其妙 刪減咗都冇問題連劇情都交代唔好嘅時候點樣能夠塑造好劇情嘅氣氛打鬥片段完全係為咗比Jeffrey展示自己特登留好長時間去特寫佢嘅面部 打緊乜嘢唔緊要 最緊要型呀直至到最後都答唔到點解一定請香港嘅殺手去日本處理日本嘅黑幫嘥咗個題材 直接喺香港拍都冇問題 唔知邊個實質想去日本旅行 但係就搵咗個劇本做藉口過去拍戲