尋秦記

電影本身 - 3.8⭐賣情懷處理 - 加 0.5⭐Total - 4.3⭐我冇睇過電視版，冇任何包袱同期望入場。觀影後亦覺得冇睇過TV版係冇影響我理解電影版劇情同人物關係。老實講，呢個題材同故事，喺今時今日先推出，真係 out 哂，失咗先機，裡面啲趣味同笑位我都笑唔出，不過明白電影係 based on 2001年嘅電視劇，已有一個既有嘅框框，續篇不能拍得太偏離，但整體仍感覺輕鬆同良好。又公道啲講，我笑唔出啫，有啲笑位亦能令一啲觀眾發笑。講番套戲....係電視版嘅伸延，整體故事算完整流暢，既大路又直線 (合唔合理另一回事)，但古生同林峯之間嘅師徒情演繹得唔錯，其他演員演出則屬正常水平。而電影亦睇得出有落本製作，不過始終係幾年前嘅製作，CG特效差咁啲，但仍算係合格水平。然而動作/槍戰場面剪接鏡頭零碎又急速，睇得唔舒服之餘亦睇唔清楚過程，可能因為要遷就唔打得嘅資深演員....明嘅。電影另一吸引地方係卡士組合同埋賣情懷。古生 + 宣萱再合體同場出現真係冇得輸。電影乃2001年受歡迎電視劇續篇又係一個賣點。而電影首尾都播出電視劇片段更加令觀眾一齊"穿越“返去2001年，呢方面電影係有心思嘅，觀眾感覺同電影及演員一同成長，同時又緬懷過去，呢方面電影係非常成功，連我白纸一張入場都有啲感動。整體嚟講，如果以電影鑑賞角度嚟睇，呢套戲只係一般，但如果以一套輕鬆賣情懷電影又或者賀歲娛樂片嚟睇，呢套係高分作品，我傾向以後者角度去睇。所以我覺得此作係值得香港人一看嘅，係香港人先識得欣賞，有滿滿嘅集體回憶，睇完情感上係有嘢可以帶走，亦會係親朋戚友、同事之間嘅話題。PS.• 向智叔致敬 🙋• 睇字幕似乎背後有唔少高人比過意見、再補拍部份劇情先埋到尾以呢個版本上映，見戲中古生都有兩個樣 (唔計電視劇片段)• 有啲對白都幾"ang"耳，聽得幾尷尬，無啦啦又维港煙花都好老尷• 最尾古生同林峯碼頭對戲都唔錯• 相信唔少有睇過TV版嘅觀眾都會收貨• 片尾字幕播放珍貴TV版 ng 片段都為電影加分• 塊滑板令我唸起銀魔• 呢套戲雖然只屬一般，但其超必回憶殺好利害好屈機，搶返唔少分數同口碑，另電影升華，其他世界大片係比唔到香港觀眾呢種感受同激情。

經歷過40集由頭重溫一次電視劇後，立即入場睇，回憶滿滿，都幾有滿足感！本身仲以為套戲可能係唔關事，亦無諗過個效果似係睇緊電視劇續集…第41集！坦白講，當呢套係電視劇角度咁樣睇會比較順眼；以電影角度就會大打折扣，因為都實在剪咗太多舊劇零碎片段落去…如果係睇戲嚟講就好粗糙好odd！Anyway，都寫得幾好，亦算拍得好睇，感覺上大家都連到戲！鮮有由電視劇拍到去電影…感覺好特別！支持💪🏻

觀看《尋秦記》，像是一次舊生reunion。故交重逢，發現多年同窗，原來早已變成了熟悉的陌生人。2001年電視劇開播，旋即在兩岸三地掀起熱潮，影響更遠及東南亞華人社區。「黑馬王子」古天樂扮演的項少龍，眾星拱月，圍繞在身旁的女角琴清（郭倩妮飾）、烏廷芳（宣萱飾）、善柔（滕麗明飾）、趙倩（鄭雪兒飾）俱成為時代印記。而建構起整個故事的靈魂人物，無容置疑，必定是作者黃易。電影版是在黃易辭世一年後的2018年宣布籌拍，這個微妙的間隙，似乎預示着延續原著神髓的工作，將無可避免地出現偏差。四分一世紀前，劇集以項少龍與家人「避秦」遁世作結，新的故事線路圖，沒有像舊作那樣，不斷安插歷史人物輪番登場。從好的方面看，這有利於擺脫羈絆，放開手腳盡情發揮；不利的地方是，新的創作團隊必須把原著嚼過滾瓜爛熟，又要具備天馬行空的想像力和創造力。很顯然，電影版沒有讓電視劇得到昇華。當中原因，是故事的衝突和矛盾，始於一個頗為牽強，很難讓觀眾信服的動機。原著後記，項寶兒改名項羽，為整部小說劃上無與倫比、最圓滿的句號。對創作人來說，如果沒有超越前作的把握，是不會貿貿然續寫新篇的。或許，這就是電影版《尋秦記》，為什麼要在黃易身故後才開始籌備吧！歷年感想，存檔IG及FB：pm7290movie（https://www.facebook.com/Pm7290movie-105185654399988/）歡迎瀏覽。

雖然冇看過電視劇，但仍看得開心，感覺很爽！推介入場！

追返40集先入場係正既！都係大家集體回憶，比大家睇下what if 返現代既結局會點，明天要等咁耐都係想睇準時機，right timing , right moment .值得入場支持下

《尋秦記》如果唔係有廿五年情懷加成，只盡劇情係災難級別，橋段比TVB膠劇更膠。除左前段現代武器vs冷兵器比夠有睇頭外，中後段劇情暴走、除左原著角色外所有原創角色都毫無深度，空洞嘅人設反映《尋秦記》完全係為拍而拍，強行加入吐槽點好大嘅劇情發展；當然敗也蕭何成也蕭何，《尋秦記》原著出現過嘅角色都係寫得唔錯，回憶點滿滿，結尾項少龍同盤兒告別場面咁感人唔係因為套戲拍得好，完全係因為廿五年來，TVB版尋秦記陪伴大家嘅回憶而滾動，所以明白為何坊間嘅回響咁高。可惜小弟雖然有睇過TVB版尋秦記，但當年年紀太細反而未算係我童年回憶，無呢種回憶加成令電影版《尋秦記》於我而言只係普通電影。劇情呢啲唔再講，反而係睇完《尋秦記》令我回憶香港呢廿五年黎嘅變化，正如個硬sell中國制造科技、返回香港第一時間要食中式點心、見返烏博士智叔、連項少龍都要感嘆如今由治及興後嘅香港真係好繁榮呀！點解拍左咁多年先上映？大家明嘅會明！另一點睇完《尋秦記》會感嘆嘅野係古生真係如同項少龍為盤兒咁，為香港貢獻好多。項少龍可以退休了，古生幾時可以好好休息？電影業嘅項羽在何方？