填詞L

呢套電影都算很勵志，女主角就算面對現實當中很多的失敗，亦都很努力不斷嘗試，以致達成自己做填詞人的夢想

導演黃綺琳之前執導「金都」已有好成績。佢本身亦係一個填詞人，所以今次劇本基本就係一個半自傳。開頭以為係一套小眾圍爐嘅電影，竟然最後睇到我眼都濕埋。頭盤係填詞嘅教科書：填詞技巧、啱音押韻、0243......之後當然係勵志片嘅套路，不斷嘗試、不斷失敗、不斷奮鬥、不斷失望、再接再厲。劇情完全寫出填詞人嘅困難同辛酸：啱音押韻不停練，人工少過職安健，識人總好過識字，來回地獄嘅試煉。戲中所有對白同歌詞都係導演黃綺琳包辦，細節都做得好好。主題曲好好聽，記得留意歌詞。而家溝通乜都用emoji 嘅社會，喺香港做填詞L真係要好有決心，值得支持。有啲奇怪，一套咁好嘅香港電影，講廣東話填詞，竟然係由台北文化局支持，不過唔緊要，最緊要係作品出到街。睇完好感動，我都拿拿聲填返首詞，鼓勵一下自己.....〈為我清零😩〉(曲：為你鐘情)為你鍾情 輸足九成點解可以 跌 唔停還未跌停 輸到眼凸餐餐三餸頓變『一丁』就算清零 都會叫停輸甩底褲 眼擎擎明蝕到暈 一切歸零胃痛 心絞 頭又㷫跌到 斬 孖展終須都接受以後明白要 生性跌到 心都死 I lose I lose就算醫到 亦冇反應------為我慘情 得返一成想死感覺 冇人明人若到頭 先會甘心勿再 貪精 痴線 唔 定性我要 斬 手指想一想以後發達其實靠 打拼咪再玩 孖展 I do I do勿去一注入晒輪證事過天晴 終於我明黑暗到頭 有黎明勤力數年 總可翻身莫再 貪心 偷懶 同 任性

題材新鮮有趣，對以廣東話為母語嘅人嚟講，特別有共鳴。一直都覺得寫廣東話歌詞嘅填詞人非常犀利，要寫一份啱音嘅詞已經好唔簡單，仲要啲詞係講緊一個完整嘅故事，更加困難。電影入面除咗描述填詞時遇到嘅問題，亦有道出填詞人要搵機會出到「出街歌」、被人認識前會經歷嘅困難，睇完會更加佩服堅持填寫全首只有廣東詞嘅填詞人，因為呢種堅持真係好唔容易。電影中大部分時間都較輕鬆搞笑，但亦不乏令人眼濕濕嘅情節，同場都有觀眾睇到喊。另外，電影歌曲嘅詞填得好有趣，如果冇睇漏，應該全部都出自導演手筆，導演都算係自肥地一圓自己嘅填詞夢。

我睇大部分喜劇都笑唔出，但呢套非喜劇好多位令我忍俊不禁，點中笑穴，係有笑有淚嘅電影。睇得出係導演嘔心瀝血嘅作品，好多細節好多心思，剪接過場，畫面代替對白，歌詞視覺化的動畫，歌曲由導演親自填詞。鍾意睇YouTube 嘅觀眾見到好多YouTuber出場應該會會心微笑。劇情合理順暢，近兩小時都沒有冷場。多謝導演同團隊拍出咁好嘅作品。仲有，故事背景大約2000年，還原咗當年MSN等電腦畫面同聲音，八九十後嘅回憶返晒黎。

甚少見無商業元素極樸素的自編自導半自傳小品. 任何曾有過少許夢想過的不難找到共鳴和回心微笑的小品. 記得由頭看到尾. 包括謝幕的名單. 填詞人的夢想不但實現. 更獲影展提名. 意義非凡. 堅持不是白費. 歌曲句句入心.

雖然話套戲嘅題材有啲窄，但係有不同夢想嘅人我相信係佔大多數，套用呢套戲係講夢想，真係可以啱大部分嘅人睇，尤其是喜歡音樂嘅人通常都會更加鍾意，鍾雪瑩嘅演繹好好完全冇違和感，用呢個budget能夠拍出一部咁出色嘅電影，香港人實在太勁💪🏻加油👏🏻。