回到戀愛終結時(bcSunday)

我印象中無睇過一套完全由倒敍法拍攝嘅電影，呢套戲99%由倒敍法逐年逐年倒敍（只有結局時時間線先回到順敍），名副其實由戀愛終結回到起點，香港為電影起嘅譯名真心無敵；另外《回到戀愛終結時》其實就係倒敍版嘅《她和他的戀愛花期》，本人非常喜歡《她和他的戀愛花期》，所以對於呢套戲印象都唔錯。呢種倒敍拍攝手法缺點係前期入局太慢，頭兩個時間線輪回我仲成個傻仔咁覺得個故事推進得好慢，睇到一頭霧水；到中段開始入局知發生咩事時，先發現電影後勁好大；呢種拍法令我會想二刷，係知道結局嘅情況下睇返開段，感覺可以感受多一次套戲，非常新奇。呢個故事嘅戀愛關係同《她和他的戀愛花期》一樣，屬於平平淡淡嘅愛情，無生老病死生癌症撞車，但依然有戚住戚住嘅心痛感，呢種無聲無息嘅分開更貼地更令人有代入感。如果你係鍾意睇《她和他的戀愛花期》，呢套電影你絕對會合口味，不過《回到戀愛終結時》嘅戀愛關係無《她和他》寫得咁好，全靠花巧嘅拍攝手法支撐故事變得更好睇，所以都係《她和他的戀愛花期》更觸動人心。

將12夜倒轉拍做6個生日，情人相處日常拍出細膩質感。最後以淡淡嘅寫實無奈平常幸福作結，非常實在溫柔又隱隱作痛。主角嘅隨性，對比永瀨正敏夫妻嘅至死不渝。喜歡但冇堅持體諒理解溝通，感情只有一次又一次嘅失落遺憾。