乒乓男孩

個人覺得套戲可以，我會形容整套戲好四平八穩，各方面的處理不是好也不太差，需要有的他有，但無過於突出的亮點來撐，因為這樣，令套戲沒令人印象深刻位。我明白這套的故事走向不是最傳統的運動片，但導演去執行上過於保守，轉折過於俗套，從而好令套戲缺乏其獨特性。痴·影·夢·藝 X 的專頁 https://www.facebook.com/ckwunmovie/

台灣體育電影拍得好過大陸同類電影，同以乒乓球🏓為主題，哩套完勝大陸鄧超幾年前蝕咗幾億嗰套《中國乒乓之絕地反擊》，其他如《KANO》講棒球⚾️都勝過講中國女排嘅《奪冠》，原因在台灣自量，唔會好似大陸要攪大場面大製作，要波瀾壯闊氣勢磅礴，仲要煽情，誓要翻起滔天愛國熱情。加上台灣電影師承日本，故事發生喺鄉郊地方（有啲走《乒乓情人夢》嘅路線），唔同你玩國際賽，只係小學雞嘅地區比賽，小本經營，滲入濃濃嘅鄉土情、人情味、父母子女之間嘅互愛、當然最重要係天真小孩從喜怒哀樂中嘅成長過程啦！但限米煮限飯下，仍然堅剛不奪其志，寄托台灣未來棟樑從基礎開始，由地區比賽打到做國手，最後由台灣乒乓球神童林昀儒陪著長大後嘅好兄弟出戰世界賽，雖未有成績，但胸懷大志，亦鼓舞寶島人心！電影除咗徐若瑄，恕我孤陋寡聞，其他演員冇個噏得出名，但都演得恰到好處，兩位小童星雖然演得有啲唔自然，但都真摯感人。由於冇用大牌，慳返嘅製作費可以用喺比賽乒乓球🏓嘅CG上，感覺比鄧超嗰套將製作費用晒喺名演員薪資上，攪到冇錢攪好CG特技，世界乒乓球錦標賽、奧運會乒乓球賽假到唔使恨，哩套反而逼真好多，哩啲咪叫腳踏實地囉！

本片係一套以小學生(算兒童吧🤔)角度去寫嘅一齣帶少少平淡文藝feel嘅劇情片。既冇日本運動動漫嘅熱血激情，亦冇令人動容下淚嘅煸情催淚，絕大部份劇情都係平淡日常畫面去表達，只有片末十分鐘較動態嘅對賽畫面。本片拍攝同製作技術上都冇乜問題，但劇本嘅定位就有啲問題，到底target audience係咩觀眾群？成年人？小朋友？成年觀眾如我會覺得孩子戲，戲劇趣味唔強。如果以兒童觀眾為對象的話，今時今日嘅兒童會有耐性接近兩個鐘同你坐定定嗒一套平淡劇情片？所以我認為此作從市場角度係有點失敗嘅。劇情方面，兩男童關係變化其實描繪唔太深刻到位。最終對賽高潮位播歌竟然唔係入樽直到世界終結之類嘅激情歌，而係慢版舒情歌，真係傻眼🙄，嫌套戲唔夠平淡沉悶咁。賽後無啦啦friend返直頭草草收場欠說服力。總括作為成年人觀眾嘅我認為此作可觀性唔高...縱使有一代小妖精徐若瑄助陣。

電影同個名一樣，平平實實嘅定位，無話咩打國際大賽，為國爭光等等榮耀。只係打鄉村情懷，重點描寫各自嘅家人關係等。兩名孩子嘅經歷我地成年人睇當然覺得好小學雞，而且整體嘅起承轉合較王道，成個故事無超特出嘅位、亦無伏位，基本功好足嘅電影。本來我只會評3-3.5分水平，但睇到結局個場大戰，最後兩人關鍵分數時嘅CG+意境：之前所有發生嘅經歷都係有意義，令導演想帶出兩位小朋友無謂太多算計，最後一刻享受快樂打球，先至係呢套電影嘅真諦。而前面個兩個小時係說服到我享受到最後呢幕嘅高潮位，我認為呢下係感動嘅。