爸爸

要將一件慘絕人寰的悲劇改編成一齣電影，難度非常大。因為不管編劇怎樣細心聆聽受害人的憶述，恐怕都不可能單憑片言隻語，準確感受到那種切膚之痛有多痛。金庸在《倚天屠龍記》後記的最後寫道：「張三丰見到張翠山自刎時的悲痛，謝遜聽到張無忌死訊時的傷心，書中寫得太也膚淺了，真實人生中不是這樣的。因為那時候我還不明白。」書本可以教曉我們很多知識，唯獨關於情感的所有問題，只有在親身經歷過後，才有可能分辨清楚箇中酸甜苦辣的味道。即使像金庸這樣的大家，在他「明白」過來之前，也是「寫得太也膚淺了」。同樣是改編自真實的倫常慘案，翁子光的新作《爸爸》，比較起他兩年前監製的《正義迴廊》，少了一堆隱喻和符號所發出的雜音，讓全片的氛圍更加統一。觀眾只需要靜靜看着一個永遠不可能有答案的生命段落，是怎樣在一頓晚飯後，由天堂跌落到地獄。劉青雲在這齣有如半獨腳戲中飾演的男主角，在經歷家破人亡後，幾乎都是以一種局外人的冷淡，躲避巨大傷痛所帶來的打擊。這種試圖抽離的自我防禦機制，偶爾也會失效。男主角會為一些無關緊要的事破口大罵，受騙後狠狠的砸爛手機、風扇發洩情緒，在哽咽落淚中無法將〈這是愛〉唱下去。也許，只有麻木的冷淡與抽離，才可以繼續完成人生的下半場。對於海報上的「唯愛解惑」四字，我不以為然。較早上映的《破·地獄》，與《爸爸》是兩齣風馬牛不相及的電影，却因為出現過法事儀式和送葬場面，而意外產生了一條無形的紐帶，令前者某些差強人意的地方，得到完善和圓滿。當然，會產生這種感覺，必須先後看過兩部作品，而觀賞的次序假若反轉過來，補白的感覺大概也不至於那樣強烈。歷年感想，存檔IG及FB：pm7290movie（https://www.facebook.com/Pm7290movie-105185654399988/）歡迎瀏覽。

電影改編自2010年真實案件。全片從爸爸角度去處理同面對一件慘絕人寰事件時嘅內心悲痛。電影中爸爸沒有日哭夜哭嘅激情畫面，但卻凝聚著非常沉重嘅自我壓抑嘅感覺，果種巨大壓力就好像隨時會爆發一樣。家庭遇到一件如此慘劇，凶手卻係自己嘅愛兒，我可以如何？爸爸最後選擇不再去問究竟，與兒子(凶手)向前看，活好未來。事實上亦只有呢條路可以選擇。的確係一件唔容易嘅事。睇嘅時候的而且確感受到作為爸爸嘅痛苦、難以接受同無助感。全片導演以一個較冷嘅處理手法去演繹。故事以章節形式表達，家庭成員各自一個章節去描寫，畫面調色較淡，同時以4：3畫面表達一種回想舊事嘅感覺。而劉青雲同其他家庭成員嘅角色塑造同演繹都係較日常/寫實，呢方面各演員都做得到同唔錯嘅。而事件發生後嘅劉青雲就非常痛苦但壓抑同無奈，呢方面劉演得到位，同以前睇開嘅劉青雲有點不一樣。另一個重要嘅兒子角色演出幾自然，戲份需然冇劉青雲咁多，但卻令觀眾留有深刻印象。先前提過電影用比較冷嘅方法去處理，所以觀影嘅過程我投入到主角爸爸同樣咁壓抑情感，加埋導演分章節處理，並非一個一氣呵成嘅故事，而且演員繹較寫實，縱使係一件倫常慘案，我都好似一個第三者睇緊警訊案件重演咁。所以此作品我認為係一齣成功表達爸爸內心沉重同壓抑嘅作品多於一齣感動人心嘅催淚作品。個人認為導演可以考慮適量加多少少煽情喺劉青雲同個仔探監同出獄後生活，同埋劉青雲一個人嘅時候自我壓抑到爆發嘅獨腳戲。另外，我認為兒子精神病方面缺乏描寫，由頭到尾嘅演出都係正正常常，觀眾投入唔到佢有精神病，even佢嗱刀殺人果刻嘅表現都係好正常，唔似病發有殺意，所以案發果場戲我係冇感嘅(亦有可能係因為故事大綱一早已通哂天)。可能你會話電影重點唔係佢個病同殺人動機，但缺乏呢方面嘅描寫就令我冇咗對個仔嘅同情同理解，以至整個案件嘅了解同感染力。整體我認為係成功拍出爸爸嘅壓抑同沉重感，但感動嘅感覺我係冇嘅，唔需要紙巾(可能又係因為一早知道故事/案情)。但都係值得一看嘅電影。PS. 搵Eden客串有點多餘，雖然外型同氣質跟蘇文濤有點似，但成套戲只得果幾個鏡頭同果幾句對白，而且只係入咗去幾年，不如蘇文濤做埋啦！而家反而Eden一出場果刻令我出咗戲。可能導演想加強演員陣容？岑建勳、譚玉瑛同幾個專家當住精神病人同家屬面前討論病人病情可唔可以早啲放返出去令我有啲傻眼。

故事都幾直接，一起首就已經交代案發經過，都算交代得幾快，戲中亦不時穿插案發前/後爸爸嘅經歷…手法係幾特別但相信唔係所有觀眾都適應到。故事係悲慘，劉青雲亦演活爸爸兩種心痛，母女慘死及心憂兒子，好多無言嘅內心戲！略嫌扣分位喺小演員身上，睇得出係盡咗力去演，但感覺上有點生硬…大概係角色難度高喇；另外谷媽搭旅遊巴塞錢俾個仔一幕亦穿崩…疊新嘅五百蚊紙係唔可能出現於果個年代嘅……(建議觀賞前先上網睇睇相關新聞打底，因為有可能會跟唔切故事發展)

個人覺得今次翁導的確沒有令我失望，無疑睇這130分鐘感覺不好受，主要因為其題材。但我會形容今次翁導可成功擺脫了《風再起時》過於想模仿別人和臃腫的感覺。的確，在每個環節上，翁導今次的處理都駕輕就熟，或許這個故事和題材是他最拿手的，但翁卻可以用比以往更細膩的筆觸來處理，更令我有驚喜，他在塑造人物的技巧比《踏血尋梅》更進一步。無疑，戲中每個演員，以至猫演員三花的演繹都非常出色，各自也有其光芒，這點翁導的確功不可沒，他在塑造角色情感起伏的技巧比之前更有層次和火候。好令整套戲的質感更厚實。不可否認，青雲的演繹的確令人難忘，他對情緒的處理和調度可以彰顯他影帝級的水平，我會說他今次根本不是演繹，而是活生生地演繹一個經歷家庭悲劇和苦難，卻將情感隱藏在心中的普通中年男人。當中個人最深刻是他同媽媽，痛哭的一場而技術上，翁導今次的處理也是出色，無論剪接燈光調度、攝影等，均屬上佳，其中我最欣賞他好懂用這是愛一曲來貫穿同點綴，更是神來之筆之舉，我會講，這首曲可以令套戲的中心思想更為突顯。PS：在套戲中，青雲那場講X你老母，個人覺得是香港電影中，最有層次、劇味同靈魂的處理，咁當然這幕戲難為了這把風扇。痴·影·夢·藝 X 的專頁 https://www.facebook.com/ckwunmovie/

劉青雲當然做的好，每一個背影都有唔到既戲；做厚明既小男孩，演出非常流暢，好值得觀眾既掌聲。成套戲將非常沉重的案情拍出黎，雖然未能理解犯案動機，但足夠令人反思對小孩子既栽培係要時間既，錯過左幫小孩子既時機，悲劇發生都在所難免

全劇大量用插敍手法跳躍時間線，但其實觀眾細心觀賞唔難發現而家係講緊邊個時空，例如：貓的大小、有無貓出現、青雲鬢邊的白髮、有無親戚在場等等。而導演將細節處理得好好，令到就算套戲瘋狂插敍都可以令觀眾一下就明白。如果你睇完都覺得剪接係不知所謂的話，其實你唔適合睇呢類型嘅電影（非貶義，因為人人睇戲風格都唔同，可能你入場就係想唔用腦睇爆谷爽片）另外電影燈光調色好符合如此沉重嘅風格；電影將故事分為五段章節，對應五位家人，用家庭成員分章節描述亦係神來之筆；拍攝技巧高手級唔再講，想再表揚下導演對電影細節嘅重視：例如用小小一個「戇豆公仔」作首尾呼應，實在令人讚嘆導演對電影嘅掌握度；對白一句起兩句止已經令角色性格突出，再一次證明好電影係唔需要將所有野「講」同「做」出黎，優秀嘅導演用畫面說話，每句對白精而簡，已令人印象深刻。青雲演出令人無話可說，比較想講佢演獨腳戲都極其精彩，踢爛風扇個幕嘅內心戲有幾重深度，呢幕叫雞都唔係為加而加。而對白只有一句「屌你老母」，但已令觀眾睇到呢位爸爸到底有幾多種心事想法；飾演兒子嘅蘇文濤作為新人演出不過不失，唔太能演到精神病人個種分裂感，平時嘅對白感覺都似普通一個屁孩咁，但正正係咁先恐怖！因為精神病人無發作時真係正正常常，更加加深左青雲演爸爸後悔無關心兒子嘅無力感。實情係呢件悲劇似宿命般注定發生，無人知點解兒子會有嚴重精神病，成件事真係無解。成套戲精彩就在於用呢130分鍾黎探討青雲作為爸爸嘅呢種「倖存者內疚」，希望世上所有人經歷悲劇後，都能好似《爸爸》咁繼續前進，雖然痛苦，但日子還是要過！