(之前上集我係比4.5⭐)由於本片為下集，所以無可被免要同上集比較。珠玉在前，下集整體各方面都有啲跌Watt感覺。故事方面，上一集典型簡單直接大路，但勝在易明，加上處理不俗，仍能拍出精彩同緊湊，兩個幾鐘好快就過，完場時重有啲意猶未盡感覺，其待下集快快上映。可惜下集有點失望，故事仍舊典型，骨幹簡單，但細節變得複雜難明，前衛嘅 AI 概念加上好technical 嘅作戰策略，以大量快速嘅對白去解釋，平凡人嘅觀眾到底 get 到幾多呢？我就只係get 到作戰計劃嘅大概picture，細節只能不要問，只管睇，未能盡享100%樂趣。可能要二刷、三刷先得。😅 今集口水亦明顯比上集多，開場後吹咗好耐水(成45分鐘? 🤔)先有啲動作睇下，令我入場時果團火差不多熄滅先開始有啲睇頭。演員/角色方面，Tom Cruise 似乎比上一集霸道，重點放哂喺佢道，戲份比上一集重好多，好似個人表演咁，其他上一集有幾好發揮嘅角色今集都淪為工具人，冇哂個性同塑造，出場只為take actions 去配合湯佬嘅plan，造就湯佬喺所謂"最終章”成為救世英雄完美落幕。有啲浪費咗呢班角色。 尤其上集好好睇、好有個性嘅女刺客Paris，今集大部分都只係動作場面，冇乜戲演。女主角扒手今集同靚佬湯亦都冇乜內心交流戲，只有協助任務嘅動作戲。如此編排整體戲味冇上一集強，只有靚佬湯嘅救世行動過程。另外今集奸角頭目塑造有點兒低B同無聊，出場唔多，死得亦白痴，重以為湯佬最終會親手技術性精彩地將其捉拿或消滅，點知唔係。😒動作場面方面，今作我認為係偏少，主要係深海潛艇果幕同最後兩飛機互片，其他間唔時開下槍、爆下炸果啲冇乜特別。老實講，果兩場重頭戲係落本、係有花心思、係設計嶄新、係難拍，但出嚟嘅精彩度係咪真係咁利害呢？我就覺得....還可以囉！深海潛艇果幕嚴格嚟講唔算係動作戲，而係冒險戲。反而覺得係欣賞其畫面設計同視覺效果出色多過爽嘅感覺，不過過程略嫌長咗啲。最後嘅兩機互片、湯佬飛機外跳來跳去並非第一次，冇太大新鮮感，而且跳來跳去/擒來擒去過程牽強，好多時一啲好critical嘅動作/過程只以剪接避過就算，過程唔連貫/流暢，所以呢場戲精彩度我只覺得麻麻哋，亦略嫌有點長。如果將呢兩場戲cut 短，將資源拍多一場唔駛好長嘅大龍風會更好。整體嚟講，此下集冇上集咁好睇，但唔代表唔需要睇或唔值得睇，此作仍然都係一齣精彩嘅上佳作品，屬有誠意嘅大製作。睇咗上集嘅一定要睇埋下集。冇睇上集嘅就好快快睇翻上集，然後入場睇下集。😄PS• 唔駛講，最好梗係去睇IMAX版啦！• 如果今作真係最終章嘅話，電影中嘅回憶片段算係幾有心思，有一種完美落幕向系列致敬嘅感覺。揾番老舊角色出嚟亦有系列首尾呼應感覺。• 本片尾段都幾主旋律吓，不過荷里活處理手法一向都比較高章，唔會畫公仔畫出腸，加上美國軍事科技的而且確世界最強，較易令人信服，自然冇其他國家嘅主旋律電影令人睇得咁尷尬。再者...呢個係靚佬湯，唔係"唔驚"，自然有說服力好多。😂• 片尾冇任何彩蛋
顯示更多
收起
147
49
7
