非常盜3

一路睇一路唸班友到底係魔術師定魔法師？🤔😅上半場還好, 佈局有板有眼，亦較能合理地自圓其說。下半場啲佈局就夾硬咗啲，神化咗啲，有啲劇情又膠咗啲，班主角能力值又誇張咗啲咁囉！不過整體節奏算明快，冇乜悶場，纯商業娛樂電影，不拘泥於故事劇情合理性一看無妨。此作第一集有驚喜，第二集跌Watt，相隔多年先拍第三集又有番啲新鮮感。今集加入咗3個年青新角色，壯大咗騎師團，如果反應好，相信會好似 Fast & Furious 咁成為長拍長有系列，並且不時加入新家庭成員/卡士同加碼制作續篇。整體具娛樂性，可以一看。PS.• 冇彩蛋• Morgan Freeman 唔知係咪真係死咗呢？🤔• 男主角連 Formula 跑車都識揸，真係無話可說，我0咗嘴😯• 為系列加入新成員延續壽命好正常，不過呢3個新成員外型上弱咗啲，冇俠盗 feel，似什兵多啲😄

睇咗兩個鐘完全唔知睇緊乜，完全摧毁咗成個系列

個人覺得今集是好睇。我會講，今集比較十年前第二集，整體感覺是較好，這集的節奏同感覺，也比上集好，最少今集無第二集時這份刻意堆砌，一切也是好自然同順暢。導演在舖排新三人組同四騎士之間的互動好深同細緻，尤其是古堡分組的一段。新舊交替的處理，好有心思，不是最傳統舖排的處理，而是有層次的描寫。無疑，導演在場面執行方面，是好到位，他在好多位的設計上，有向首兩集致敬，如首幕三人組劫不義加密貨幣商富濟被騙貧，是去致敬第一集智破米高堅那幕，而中段古堡那段，是向第二集收啤牌藏過掃描那幕致敬。而在真正打鬥時，他在節奏調度同執行均佳，其中警署那段最為明顯。PS：個人好覺得阿布扎比那段，有些場口設計好 F1 Movie （雖然戲中那架方程式不是真正的方程式），同時也有當下F1專用輪胎品牌倍耐力的植入式廣告痴·影·夢·藝 X 的專頁 https://www.facebook.com/ckwunmovie/

電影雖然盡量表現這班魔術俠盗如何高智慧，但那班警察和被捕者太窩囊廢了。如此龐大的犯罪集團和警察似乎太弱智，編劇太脱現實，故事上請多動點腦袋，這使得魔術俠盗成了另一班自我陶醉的窩囊廢。可讚是攝影不俗。

呢次主要係強調魔術師嘅身份，主題及情節有趣，動作特效亦精彩刺激，但中段比較多玩情懷，及新舊兩代主角之間的互動，以至到後面嘅“大製作”比上集收歛，橋段簡單，沒有太大驚喜。4.6/5 （91分）

魔術師唔止表演魔術幻術掩眼法，仲要行俠仗義、劫富濟貧、改變世界、儆惡懲奸⋯⋯第一集就叫誇張得嚟有新意，第二三集就冇咗新意，只剩下誇張唔合理，啲CG係出色，但無助增加變戲法嘅真實性和故事嘅說服力！三集臨尾都刻意出人意表，故作曲折離奇，變成奇情復仇戲，第一集為父報仇，第二集與仇人合作，第三集弟向姊討回公道⋯⋯全部都搵嚟噏搵戲嚟做，牽強得猶如夫子自道，老土到好似粵語殘片嘅倫理奇情大悲劇咁！見到四騎士老態畢現，今集搵嚟後生新三劍俠接班，本來都無可厚非，問題係哩集故事同四位原來主角一樣老到返唔到轉頭，同中國城大富豪差唔多，已經過晒時，何必搵新嘅舞小姐返嚟，勉強撐落去呢？