重案夢幻重組再重組

電影氣氛搞笑，對白輕鬆滑稽，特別是劇中馬克思的“時辰未到，不死神上身”勁抵死，反而韋史密夫的衝動派表演，沒留太多印象。個人特別喜歡電影中的槍戰和徒手搏擊場面，專業軍事，爆炸可觀。這集和首集相隔30年，bad boy已邁向中老年，子女已長大成人，收斂了橫衝直撞式的氣場。電影某些場面構圖色彩繽紛，美術服裝設計亮眼花心思。值得一看。

Bad Boys 公式元素繼續，新意就預咗冇，但勝在繼續攪笑同繼續熱鬧冇悶揚。見老朋友冇玄念要入場。

兩位其實正義感爆棚，其中一位仲好高想像力，兩位一唱一和的確係絕配，而故事則簡單而緊湊，動作場面亦充足，係一套標準好睇嘅爆谷片。4.5/5 （90分）

其實都仲係Lethal Weapons好拍檔一世好兄弟嘅老路，冇乜懸疑，完全唔燒腦，直情唔使用腦，好快觀眾就會知道邊個係壞人邊個係幕後黑手，實有內鬼，然之後直闖龍潭，亂衝亂撞，大打幾百回合，遍體鱗傷，大難不死，即使子彈亂飛，主角永遠bulletproof！我追咗哩個series 30年，頭兩集兩位主角仲後生，喜歡佢哋頑皮 不覊 瀟灑，但事隔17年，四年前重遇兩位衰仔，已經變成衰佬（衰老），Marcus頂住六個月身紀，Mike罩住一臉皺紋去公子多情，覺得哩個組合唔夠Lethal Weapons咁經典，因為人哋見好就收，一去到要婆媽就宣布停拍，俾Martin同Roger榮休，從此settle down。哩套好學唔學，學Fast and Furious越嚟越多親戚，Family越滾越大，Mike上集多咗個仔，今集父子兄弟一齊上，兼娶埋老婆Christine，上集嘅Rita變咗Ex，但又似餘情未了⋯⋯最好笑係「婆媽」似病毒會傳染俾壞人，脅持人質，到走投無路又唔痛下殺手，然後逃之夭夭，反而留低要人二揀一咁死蠢，是但死一個咪少咗人盾囉，點解唔喺人盾後一鎗打死無遮無掩嘅Mike呢？真係唔明啲壞人做乜咁多口水，次次衰多口！此外，婆媽到似FnF嘅仲有已故隊長「復活」嘅兩段videos、阿媽救女、仇人和解、老爸放仔⋯⋯唯一好嘅係仍不乏笑料，尤其Marcus嘅超猛宅男女婿！其實見到Will Smith自從兜巴掌事件之後有工開，都好替佢高興，不過要拍文藝/劇情片，麻煩唔好用警匪片包裝吖！

《重案夢幻組》Bad Boys 今年來到第4集—-即係本片，時光飛逝，第一集成於1995年，差不多30年前，歲月催人，這對警探孖寶亦垂垂老矣。本片照例包含飛車、爆破、槍戰、埋身搏鬥，上天下海，非常熱鬧刺激，呢對邁阿密緝毒幹探經常互窒鬥嘴，帶來唔少笑料。但今次被人陷害，成為黑白兩道追殺對象，又增多一份驚險，一份趣味，睇得過癮。兩主角邁克Mike(韋史密夫Will Smith飾)同馬克斯Marcus （馬田羅蘭士Martin Lawrence飾）唔單止係出生入死嘅孖寶戰友，今集仲話佢哋係靈魂伴侶Soul Mate，似乎前幾集冇提起過，係咪編導刻意要加入此剛中帶柔元素，畀大家多啲笑料？

著草警探《重案夢幻重組再重組/Bad Boys Ride Or Die》，已故警長被指控貪腐在暗中跟毒販販毒集團合作，警長在死前拍下影片警告兩人，別再相信任何人，孖寶米高(韋史密夫 飾)與馬克斯(馬田羅倫斯 飾)，二人同遭設局陷害，一夜之間淪為被追捕的危險逃犯，組合二人陷入大規模的連場激戰，著草期間孖寶因而鬧出不少瘋狂笑話。公式化的內容，捉內鬼新意欠奉，劇情婆媽，繼續的無厘頭，更有有些老土，是些看了會讓人尷尬的笑料，間有悶場，結局已在意料之中，但求熱鬧睇得開心。不過另一方面電影亦顯現岀人性化的一面，兩人年紀大了，亦會有軟弱的一面，會有病痛纏身，有了愛情同時亦會受到家人的牽絆，惹人共鳴，結尾依舊是皆大歡喜的結局，可以一看。