孤味 (CineFest)

觀影前偶遇友人，聞說電影電影情節極度婆媽狗血似足八點檔劇集咁樣，本身調整心理諗住睇班女演員大鬥演技啦，點知出乎意料地劇味濃郁！當中幾姊妹嘅關係以及用食物做主題令唔少影迷聯想起『花椒之味』，但我覺得成個大綱更似『相愛相親』！.電影同名主題曲「孤味」，最初響起時以為係導演刻意挑選一首符合秀英所經歷同背負嘅嘅舊歌，原來竟然係為咗電影而創作嘅歌曲嚟！難怪可以咁貼切刻劃角色！.「秀英」陳淑芳喺今屆金馬獎勇奪最佳女主角同女配角，我就相對地鍾意佢係呢套嘅演出 - 由開始睇落橫蠻無理霸道嘅大婆，逐漸了解佢嘅想法同苦衷後多啲感性嘅流露，到最終決定灑脫放下⋯⋯確實殿堂級演繹！.幾姊妹當中最搶眼嘅必定係飾演大家姐嘅謝盈萱，貌似好跳脫難以捉摸渴望自由就如老竇咁嘅性格，但正正敢愛敢恨令角色更突出。.「人真的很奇怪，明明知道對自己有害的，還是會一直去做。」.人就係咁犯賤，呢句說話唔單止套用喺大家姐同老竇身上，其實仲吻合其餘幾個角色 - 秀英表面上痛恨老公嘅離去，其實一直念念不忘；宛瑜即使怨恨細個媽媽逼佢出人頭地威俾啲親朋好友睇，但自己同樣渴望女兒成材而逼佢去外國留學。.儘管家庭眾人各有拗撬不和甚至有前塵往事不能提及，可能只係出於誤解或者未有考慮對方立場至有咁嘅睇法，但最重要係有愛先有恨。.愛也好，恨也好，始終都係一家人。