慕伶，一鳴，偉明 (CineFest)

講起中國電影，既定概念梗係講普通話嘅戲啦，而新導演黃梓卻選擇廣州作背景並以廣東話為電影主語言，最特別係幾位主演角色都用上香港演員添，對於香港觀眾會有種親切感。.電影如片名一樣為三段式結構，先由媽媽「慕伶」角度敘述、再由兒子「一鳴」接力，最後到老竇「偉明」作結。全片不斷使用長鏡頭展示戲中角色以及演員情緒上連貫或轉折位，另一方面相信係考慮製作費較為緊絀而有咁嘅安排，所以情願選擇唔好擺咁多機位，一氣呵成咁handheld兼且搵舞台劇演員主演以便可以一take過。.不過可以咁演繹成導演嘅風格嘅，同埋睇開商業片都要學習接受獨立片上嘅種種缺陷，無論器材或者技術上未必做到極致，因此唔應該過分執着呢方面嘅問題，轉為感受劇本同演員演繹等細膩之處。.開首以母親面對兒子反叛而無力管教，加上老公證實患上肝癌「屋漏偏逢連夜雨」，儘管心入面好難受但仍要壓抑情緒故作鎮定咁，假裝若無其事掩蓋真相。不過所有秘密都有揭穿之時，當家庭其餘兩人得知真相時，兒子卻選擇逃避煩惱集中火力想到美國留學脫離家庭、而父親先拒絕接受事實後而展開超現實情節。.頭兩個章節嘅敘述方式均為寫實，尤其兒子嘅校園生活更少有地係國產電影中還原最真實校園嘅感覺。我亦相對比較鍾意呢一段，無論情節定挑選嘅演員都將內裏年輕活力展露出嚟。.從不打不相識嘅友誼、喺校園胡鬧打滾甚至逃學耍玩、對未來極為幼稚但相當樂觀嘅憧憬⋯⋯對於角色嚟講係佢哋嘅青春，同時暗示出佢哋對成長嘅迷惘 - 渴望長大但害怕承擔種種責任，但隨着年紀增長迫使慢慢接受各式各樣嘅事情。.到最後父親嘅部份，隨着病情嚴重以及回鄉計劃逐漸將情節變得超現實。喺舊屋突然亂入過往年輕自己嘅處境，同現實兒子所面對嘅情況一模一樣，同樣為咗機會因而離開自己成長嘅地方。不過可能由同一演員演繹不同角色會令觀眾混淆，相信呢段觀眾未必容易理解同接受。.正如英文片名「All About ING」，不但貫穿三位主角嘅名字，更帶出生活就係「現在進行式」。兒子對未來迷惘、媽媽因現時而惆悵、爸爸卻對過去念念不忘⋯⋯無論如何最重要係把握當下時光。.「愁懷隨日月被拭去 你會有一天學會面對」