絕命狂逃(HKAFF2024)

等我仲驚戲院冷氣凍著多件外套，但電影節奏非常緊張刺激，睇完熱到我hihi。我知道現實中有「脫北者吳青成」真係由板門店沖過南韓邊境脫北，吳生甚至身中七槍，可想而知當時有幾驚險！但《絕命狂逃》根本就改錯名，應該叫《無敵狂逃》，主角光環應該比吳青成放大一百倍左右，北韓士兵槍法之「準」實在可怕，淨係講十米之內連你阿嬤開槍都中，機槍掃射後仲可以狂逃仲唔叫無敵？比起槍戰橋段嘅唔合理，文戲方面嘅脫北主角鬥智鬥勇個幾段都算咁上下，雖然都係解釋唔到一個小小兵點解有咁嘅霸王之氣呃到咁多將軍？亦都無解釋過點解一個普通北韓人有咁強大嘅意志，排除萬難都要脫北？相反，用作對立，具教煥飾演嘅少將就有較好嘅描寫：一個係北韓嘅同性戀者。唔洗多講都知要經歷啲咩啦？亦好明白佢放棄左啲咩令佢要咁落力去融合返落個體制（包括追殺主角）。係想脫北嘅李帝勳人設近乎無、主角無敵得唔合理、劇情都無乜特別、所有北韓人智商低於80、同埋中間無啦啦又要插班女游牧民族，效果除左拖時間外，其餘作用不明所以。幾點加埋，具教煥個角色算係比較打動到我。誠言，如果你放低思考劇情，唔理所有吐槽點，全劇個緊張刺激感已經值回票價。再者，拍比南韓人睇下北韓生活幾撚慘，順便宣揚下南韓愛與和平，已經算合格有餘。