我的拳王男友

1.幾年前為咗捧向佐而群星拱照炮製出大仆直嘅『封神傳奇』，今次搵嚟中國星時代合作無間嘅神手杜琪峯同韋家輝幫忙，可惜依然無助向佐嘅死症。.本身擔任今屆金馬獎評審團主席嘅杜琪峯因「與電影投資方的製作合約所限」而辭任，而近期杜sir僅有一套新作上映，就係呢套『我的拳王男友』。其實今時今日杜sir 嘅江湖地位絕對唔需要拍呢啲商業式流水作業，以往就話要養住間公司啫，所以惹來好多人質疑佢只係報恩。.外界種種流言都被佢哋否認，向佐更大爆杜sir拍攝中嘅新作亦有份參與演出添，咁樣嘅話我淨係諗到兩個可能性：杜sir 真心覺得向佐做得好又或者佢真係為咗報恩。-2.片頭已經搞到我有強烈感覺 - 杜sir竟然淪落到要拍啲咁嘅戲，真係令人唏噓。不過用幾分鐘說服自己再調整心理，會發現其實戲入邊仍然充滿佢同韋生嘅風格。.全片質素以及風格均似中國星時期所製作嘅商業片，睇返製作周期亦幾貼近當年玩法。只可惜套戲拖足咁耐先至上，加上兩位主創人物咁耐都冇新作上映，搞到大家期望過高啫。.當中最過癮一定係于文文飾演嘅Rock爆參賽者，每次上台總係傷勢更加嚴重，呢種癲喪真係得佢兩個先咁玩。-3.拍攝時片名叫做『追夢男女』，一嚟最初審批咗嘅故事大綱確實係講男女主角如何達成自己夢想，二嚟就係想食住杜韋兩人過往『男女』系列嘅名。.現時劇本改到男主角已經厭倦打MMA，女主角為舊愛搶奪自己原創歌曲而參加歌唱比賽拆穿對方真面目，仲邊一忽追夢？所以改片名係明智。.暑假開始宣傳時曾經傳出用『吃貨拳王』，係貼切男主角嘅設定但就太太太cheap。而家個名『我的拳王男友』尚算好啲，同樣擺明車馬sell男主角，但起碼係從女主角角度出發。-4.可能因為銀河映像嗰種飛紙仔嘅傳統，令到杜琪峯近年愛上搭龐大嘅廠景。今次個景就類近『華麗上班族』咁搭咗唔少街景，但就行真實風格版。.但用咁多錢搭景又用得唔多，咁奢侈嘅玩法得呢啲殿堂級導演先有能力做到。-5.返到嚟香港上映，電影意外地配上廣東話 - 全片有對白嘅香港演員僅有向佐、客串而又出現好多幕嘅張錦程、各自得兩三句對白嘅羅浩銘同陳珮思。.但始終套戲係大陸背景，用返普通話都冇乜所謂啦。向佐把聲聽落好奇怪，唔知以為係YouTuber惡搞用唔嗲唔吊嘅腔調配音，把聲完全唔夾佢個樣。.演技方面雖然稍為改善，但全片佢同女主角嘅表現都欠佳，尤其情感位上演得較差。而女主角個樣實在太路人，一轉咗髮型就認唔到佢。套戲最大敗筆就係兩位主角。-6.另外情節邏輯上亦有明顯問題，魯虎同師兄馬青條線除咗第一幕外，過咗半套戲先至再出現，可能係邊拍邊寫時諗唔到點樣迫主角上返擂台而寫出嚟。.女主角本身唱歌好聽，咁點解頭幾場選拔賽都唱得咁難聽？唉算啦，杜sir呢啲商業片原先就係唔理呢啲樣㗎啦。.忍受到向佐「強大」演技嘅朋友，有機會嘅話不妨睇吓呢套戲，當回憶吓十幾年前中國星嘅作品都OK嘅。