亞洲電影大獎 海外專才訓練計劃 德國做電影比香港好？

亞洲電影大獎 海外專才訓練計劃 德國做電影比香港好？

亞洲電影大獎 每年除了表揚出色的亞洲電影之外，也致力培養年輕的電影工作者，讓他們擴闊對電影製作的視野。今年 亞洲電影大獎 便從云云參加者中，挑選了五位電影人到德國的電影公司工作並交流達四個月之久的時間。究竟香港和德國的電影工業有甚麼大不同？五位電影人又把甚麼得著帶回來了香港？

Q.1 為甚麼想參加亞洲電影大獎的海外專才訓練計劃？

大家在香港電影業工作了數年（Joel 則從事舞台劇事業），有人遇上了樽頸，希望到外國工作吸取經驗；亦有人剎那衝動，趕及截止前報名參加；也有人純粹因為今次交流的地點是德國，本身欣賞德國的文化與藝術，於是便報名參加。雖然他們都要面對停薪留職、甚至飯碗不保的問題，但大家都強調，無悔今次實習與交流的體驗。

Q.2 電影人在德國和香港工作有甚麼不同？

所有參加者都覺得德國和香港的工作模式有很大的差別，尤其在「work-life balance」這一方面。香港人和德國人都會 full power 工作，但德國人相對沒有香港人的煎熬、急迫，而且非常尊重與家人相處的時間，一到黃昏六點，即使工作未完成，都會下班回家。

另外，在德國的 Studios 工作，有更多接觸國際電影的機會。有參加者有幸能夠見證 Marvel Studios《黑豹》的後期製作，並指出這些是獨立製作人未必能夠擁有的經歷。除了電影之外，他們還可以了解其他媒體例如電視、Netflix 電影和其他國際級商業電影的製作。

Q.3 香港人比德國人有甚麼優勝之處？

香港人的靈活性可能真的比外國人優勝，不論在創作上、技術操作上或人事協調上都更強，連德國人都願意借鏡，視參加者為新衝擊，打破他們日常的思維，刺激更多新想法。香港人的電影基礎其實也較佳，接觸新技術時更得心應手。

「德國嘅器材相對上係好啲，但係香港人勝在咩都係由基本開始學起，technique 底好強，我自己公司嘅同事都係有呢個優勢。」

「香港人有好嘅基礎，再加上喺好嘅管理之下，識得靈活變通，做嘢自然事半功倍。除咗要有好嘅基礎，都要知道咩係做得，咩係唔做得，咁就最好。」

「Flexibility，香港人通常一腳踢多。因為我哋識得好多唔同範疇嘅嘢，樣樣嘢都識啲，訓練到我哋嘅創作力變得比較強。」

Q.4 參加了這個計劃，有甚麼難忘的經驗？

到外地工作本來已經是個難得的機會，可以遇到自己的偶像更加是上天帶來的禮物，而一早已經計劃了要到外國工作的參加者更能率先體驗將來的生活。

「令我最深刻嘅係參加到今年嘅柏林電影節，因為我中意嘅 music composer 坂本龍一有部戲喺嗰邊上影，又有得睇表演，有得同佢影相，真係好開心。」

「本身諗住過多一年左右，點都會去外國做嘢，去邊度就未知，咁所以今次去德國係一個幾好嘅 testing，認識定外國公司嘅文化，睇睇會唔會有啲好unexpected 嘅情況我會習慣唔到啊，或者自己一個喺陌生嘅環境要點樣生活，係一個好難得又 fit 晒我嘅經驗。」

Q.5 回到香港，生活習慣有沒有改變？

香港的急促步伐與德國的 work-life balance 形成強烈對比，到底他們又能否將德國的生活與工作習慣帶回香港？會否需要調節？聽過參加者的分享，深信香港人的適應能力真的很強。

「有嘅，宜家盡量好似喺德國嘅時候咁，將工作好好分配，畀自己星期六、日可以放假。」

「至於我反而更加適應到香港嘅生活，比我想像中變得更加積極。我喺嗰邊六點放工，返去仲可以煮飯仔，宜家我十一、十二點先可以搭的士返屋企，一個星期七日都係。我對住宜家公司嘅 project，做咗好耐，幾年嚟都係做緊呢個 project，宜家我先發覺原來我對佢可能係有一份責任感，即係好似生仔一樣嘛，都就嚟生完，咁梗係生埋佢啦。香港人適應力都幾強，唔會話走咗四個月，返嚟就適應唔到原來嘅生活。」

Q.6 大家對將來的海外專才訓練計劃有甚麼期望？

所有參加者都希望加長海外專才訓練計劃的時間，四個月時間實在太少了。

Q.7 最後，大家會怎樣鼓勵親友參加亞洲電影大獎的海外專才訓練計劃？

計今次德國之旅後，現在又已經有另外幾位參加者出發了到意大利學習電影修復技術，相信亞洲電影大獎將來會帶給各位電影人更多元化的實習機會。幾位過來人又會如何鼓勵大眾去參加亞洲電影大獎的海外專才訓練計劃呢？

「唔好諗喇，去咗先算啦，因為呢個機會真係千載難逢㗎。人生冇幾多呢啲機會，一個完全新嘅體驗嚟。」

「永遠都要行第一步先囉，如果唔係永遠都喺呢個四方框入面自己走嚟走去，冇乜用處。」

「唔好怕自己唔夠經驗，因為去到嗰度都係學嘢嘅，所以佢哋都好 welcome 啲學緊嘢嘅人去。」

「想去外國做嘢嘅，早去好過遲去。你早去，之後可以繼續去。」

 

訪問：靈光

文字：Janis H.