電影熱話

【MOVIE6 熱話】影帝 尼古拉斯基治 專訪 差啲放棄演戲做漁夫

廣告:

影帝 尼古拉斯基治 專訪 差啲放棄演戲做漁夫

今年第三屆澳門國際影展暨頒獎典禮請到影帝 尼古拉斯基治 擔任明星大使,佢以獨特且充滿個人風格演繹見稱,由劇情片開始到後期好多動作片,特別係同香港導演吳宇森合作過嘅電影都深入民心。今次我哋好榮幸可以訪問到影帝,了解佢對華語電影、動作電影嘅睇法,仲有一啲俾年輕導演、演員嘅建議:

問:你最欣賞華語電影啲咩?

對我嚟講,電影就係要有動感,要令觀眾覺得刺激嘅,呢樣就係電影同相、畫嘅分別,帶到俾觀眾一個經歷。根據我,特別係同吳宇森合作嘅經驗,我唔知可唔可以以偏概全咁講吳宇森電影嘅表達就係華語電影嘅表達。佢喺電影世界入面充滿自己嘅風格,係充滿力量同刺激感。我唔能夠話全部華語電影都推崇呢種風格,但我第一手接觸到華語電影製作就係吳宇森同彭氏兄弟,都係有嗰種節奏。拍《無聲火2.0》嘅時候,我記得彭發同我講,當你開槍我想要「嘭嘭、嘭!」,係可以咁仔細,開槍節奏都好似音樂咁,準確到好似舞蹈咁。不過我都好中意情感豐富嘅電影,好似《大紅燈籠高高掛》、《雜家高手》等。嗰種激情就係電影世界嘅特色。

問:你由90年代嘅劇情片突然改為拍動作片,當中有咩原因?

我由劇情片好似《兩顆絕望的心》直接轉演《石破天驚》、《驚天動地》等電影,我咁做係因為我覺得係個挑戰,而且我想證明俾自己同其他人睇,我係做得到。我冇動作片明星嘅外表同健健碩嘅身型,我只係覺得動作片好好玩,同我做過嘅角色好唔同,就好似啱啱所講係個挑戰。

問:你有啲咩建議俾年輕嘅導演/演員?

我嘅建議好簡單,就係唔好俾其他人打擊你嘅夢想同對自己能力嘅信心。你發展嘅路途上,將會聽到好多人話你唔得或者你唔會做到。「Can’t」,我唔中意「Can’t」呢個字。我覺得佢哋必須要記住,一定會有人想趕你走,而你只可以永不放棄。至少俾你自己一段時間,亦要同自己有個對話。我曾經差啲做唔到電影演員,我有個Plan B,就係做漁夫,當時我已經準備好上船,可能會寫下關於魚嘅短編故事,好好彩最後Plan A達成。

曾經我病得好重,不斷被拒絕、被拒絕、被拒絕,冇人想同我拍電影。我同自己講試埋最後一次,做唔到就放棄了。最後係George Schlatter發掘咗我,佢見到我內在嘅一啲嘢,想我扮演一個機師嘅角色。喺《Best of Times》我第一次做到專業嘅演員,係一個電視劇,一個小角色。我曾經差啲放棄,俾好親密、好親近嘅人話我做唔到。但無論如何,上面所講嘅都係我嘅建議。

 

訪問、文字:Janis H.

尼古拉斯基治 澳門國際影展暨頒獎典禮