電影熱話

【 MOVIE6 熱話 】 東京國際電影節 大師班: 陳果 、 曾慧美孜 大談「妓女三部曲」最後一部《 三夫 》

廣告:

東京國際電影節 大師班: 陳果 、 曾慧美孜 大談「妓女三部曲」最後一部《 三夫 》

陳果 嘅「妓女三部曲」最後一部《 三夫 》入選第31屆 東京國際電影節 競賽單元(前作為《榴槤飄飄》同《香港有個荷里活》)。前幾日,佢聯同女主角 曾慧美孜 喺由 亞洲電影大獎學院 及 東京國際電影節 合辦嘅大師班「與陳果對話」分享《 三夫 》拍攝過程!

果:陳果    美:曾慧美孜

問:點解會用「海、陸、空」設計《三夫》嘅故事?

果:「海」就係講女主角成家人都係漁民,喺海上面生活嘅環境;「陸」就係講女主角上咗岸去生活,但係陸地對女主角完全無幫助,而且有反效果;「空」,如果用西洋人嘅說法就係天空,但係中國人對「空」有好多唔同解釋,最簡單嘅解釋就係乜都無。「海、陸、空」正正反映咗女主角呢家人嘅狀態。

問:點解曾慧美孜係《三夫》不二嘅女主角人選?

果:揀得佢就梗係覺得佢嘅戲唔錯。雖然佢係第一次做女主角,但係我覺得佢可以凌駕《三夫》嘅故事。實則上,佢又凌駕得幾好,咁就證明我自己無揀錯,揀錯人係好大滯㗎嘛。同我十五年前見到曾慧美孜都有少少關係嘅。唔記得咗嗰陣係拍咩戲,雖然嗰陣無用到佢,但係今時今日搵返佢,梗係有少少宿命。係你就係你,走唔甩㗎啦。其實我想佢再增肥多啲,更加肥就更加好睇,形象就更強烈,但係我哋時間真係唔夠,最終只係增咗27斤。

問:同陳果導演合作,有咩感覺?

美:同導演合作好開心,狀態非常輕鬆,但係拍攝嘅時候節奏又好快,對我拍電影節奏嘅掌控更加有自信。

問:電影涉及好多裸露嘅性愛場面,你係點克服呢個障礙?

美:由第一場戲到最後一場戲,都有一啲比較激動嘅場面。我拍攝之前做咗充分嘅準備,將自己封閉起嚟,我自身作為女性嘅部分就關閉咗。我就係想刻意營造出一個封閉嘅環境,關閉慾望同感觀,我就會變得好似嬰兒一樣。喺拍攝過程我無任何障礙,對我嘅身體,對我嘅意識,都由零開始,就係「空」。最初我有問過我媽媽應唔應該接演,佢話如果真係角色需要,咁就去演啦。因為我媽媽都知道陳果係一個知名導演,唔會隨隨便便要演員裸露。有咗屋企人嘅支持同埋對陳果導演嘅祟拜,就完全無問題。

果:最有障礙就係啲男仔,真係好麻煩。

問:《三夫》同「妓女三部曲」前兩部有咩唔同?

情慾上係多咗。之前兩部我都覺得係點到即止,呢部我覺得唔應該係咁樣。拍攝到後面其實我都收斂咗,無去到我之前想像中嘅咁盡。

問:有無睇「妓女三部曲」前兩部做拍攝準備?

美:我喺讀書嘅時候有睇過,拍攝《三夫》之前都有諗過要睇返,不過放棄咗。我本來都想做一啲殘障人士嘅研究,但係後嚟都放棄咗。因為我覺得,「空」就係「有」,「有」就係「空」。

問:點解要等十幾年之後先至完成「妓女三部曲」?

有製作上嘅原因。船上面拍戲好難,你睇就好似好簡單,其實架船好細,好危險,好麻煩,又企唔到人。搖嚟搖去好難拍,最慘係老人家做戲,七十幾八十歲係記唔到對白。拍緊長鏡頭,對白只係記得一兩句,就死啦。

美:佢哋真係幾偉大,年紀都咁大,每一日都要喺船上面拍十幾個鐘。

果:當然,呢個唔係最大嘅原因。我最想《三夫》嘅故事表達到香港宜家變成點。我要與時並進,唔可以將廿年前嘅想法改都唔改就搬過嚟。我唔係特登想港珠澳大橋入鏡嘅,只係因為我哋喺大澳拍攝,咁啱拍到,都幾得意,又有視覺,又有記憶。我覺得呢個係與時並進最好嘅例子,寫到當下發生緊咩事。

 

文:靈光

https://www.facebook.com/huxtin/

靈光一閃,正在尋找《光影星碎》後的《生死幻願》。

三夫 亞洲電影大獎 曾慧美孜 東京國際電影節 陳果