電影熱話

【 MOVIE6 熱話 】 亞洲電影大獎 學生觀摩團分享嘉賓 淺野忠信 :「入得呢行就要盡全力」

廣告:

亞洲電影大獎 學生觀摩團分享嘉賓 淺野忠信 :「入得呢行就要盡全力」

由亞洲電影大獎學院以及 東京國際電影節 主辦單位合作嘅「第31 東京國際電影節 學生觀摩團」,喺電影節開幕嘅第二日邀請到 日本著名演員 淺野忠信 同學生進行交流。 淺野忠信 亞洲電影大獎 淵源甚廣,曾分別奪得「最佳男主角」及「最佳男配角」兩大獎項,而佢亦有豐富嘅荷里活電影拍攝經驗,以及執導電影作品嘅經驗,一班學生聽過佢分享演藝心得都顯得非常雀躍。

以下係淺野忠信同學生對談嘅部分內容:

有關日本拍戲同喺荷里活拍戲嘅分別

荷里活電影係大產業,budget 好多,雖然自己參與嘅日本電影規模都唔細,但係仍然有一段距離。因為大家都好努力工作,好有活力,所以自己都想再做得更好。荷里活有好多唔同嘅電影,各有所長,但要求更大,付出就更大,更加有挑戰。當然,荷里活拍攝技術日新月異,但係演員嘅基本功就係要去想像畫面,即使拍攝技術上有少少唔同嘅要求,但係作為一個演員,演出嘅時候其實感覺無咩大分別。

有關拍攝《雷神奇俠》系列以及角色 Hogun 嘅結局

《雷神奇俠》去到第三集,我拍攝嘅時候淨係攞到有自己對白部分嘅劇本。當我睇到電影完成品嗰陣,先知道原來我嘅角色結局係咁,連我另外兩位夥伴都唔知大家嘅結局!

有關身為導演,應該點樣指導演員

每個導演都有唔同嘅想法,但係演員亦有自己嘅想法,所以要全心全意相信演員先至會做出好作品。我好欣賞馬田史高西斯導演,記得當初我去 casting,覺得對方好用心咁去聆聽。雖然第一次 casting 我失敗咗,不過幾個月之後佢就搵咗我拍《沉默》。導演佢好自由,畀我哋有自己嘅想法同埋好多鼓勵,從來唔會講負面說話。我覺得做導演就係要有呢個態度,要鼓勵演員,演員自然會越演越好。同演員之間有創作分歧嘅話,就應該尊重演員,嘗試去了解佢哋嘅諗法。

關於好演員嘅特質

唔好導演叫你咁做,你就要咁做,咁樣嘅話會慢慢喪失自己嘅創作力。無論你身在邊個工作崗位都好,當你有長時間去準備,我相信就可以駕馭得到你嘅工作。當諗到自己嘅一套,就應該即刻去試。拍攝電影一向都係無規則嘅,唔使介意,想點就試!我自己亦唔係一個想被定型嘅演員,會想盡量演出唔一樣嘅角色。

關於就學時期修讀音樂,對之後拍攝電影嘅影響

音樂係聽覺上嘅藝術,電影則係視覺上嘅藝術,係好唔一樣嘅表演,不過都要求自己有好強嘅敏感度,所以讀過音樂對我演戲會有好大幫助。

關於同自己嘅仔女一齊拍電影嘅機會

仔女都係演員,希望將來都有機會同佢哋合作。我好中意睇自己仔女演出嘅電影,但係我就無習慣去睇返自己演出嘅電影。當然電視播嘅時候我都會睇吓啦(笑)。

最後,淺野忠信忠告一班學生:

拍電影呢一條路係你哋自己揀嘅,一定要盡全力去做(笑)!

 

文:靈光

https://www.facebook.com/huxtin/

靈光一閃,正在尋找《光影星碎》後的《生死幻願》。

亞洲電影大獎 東京國際電影節 淺野忠信 靈光 青年大使