電影熱話

【 MOVIE6 熱話 】 亞洲電影大獎 「青年大使」 廖子妤 :「無悔當初入行拍電影」

廣告:

亞洲電影大獎 「青年大使」 廖子妤 :「無悔當初入行拍電影」

廖子妤  (Fish)  為 亞洲電影大獎 擔任「青年大使」,早前同一班由亞洲電影大獎學院所安排嘅「第31屆 東京國際電影節 學生觀摩團」學生見面,喺佢哋出發之前交流電影圈心得,仲一齊大玩電影主題相關遊戲。熱愛電影嘅 Fish 非常投入,同學生打成一片。一班學生已經出發到日本東京參加 東京國際電影節嘅紅地氈以及電影節各大活動,而 Fish 就同我哋分享咗年青時候入行嘅經驗,以及佢對年輕電影人同香港電影嘅期盼。

問:今次擔任亞洲電影大獎「青年大使」對你嘅意義係?

我第一次擔任大使,非常重要,同電影圈新血溝通真係好有意思。希望我同呢一班學生可以令電影圈年輕化,令更多人留意香港電影同亞洲電影。不久嘅將來都應該會見到呢班學生,希望佢哋同我合作嘅時候,我哋都仍然充滿今日嘅熱誠。

問:今日見到呢一班咁有熱誠嘅學生,有無諗起你當初入行嘅情形?

諗返起以前喺馬來西亞做剪接,間公司都就快沒落,覺得好慘,驚自己會無晒青春。世界咁大,決定要出去睇吓,選擇嚟到香港。開頭都唔係話好順利,就快想又要離開嘅時候,我 cast 中咗我第一套戲《末日派對》。以為自己已經踏入咗影圈,到後來有電影頒獎禮提名,心諗,仲唔係我嘅世界?結果,跟住一直都無工開,直到接拍咗《同班同學》,之後又繼續無工開⋯⋯浮浮沉沉咗好耐,終於《骨妹》成為我喺呢一行好大嘅轉捩點,非常感恩有呢一套電影。希望之後可以演而優則導,因為我都有自己想講嘅故事。

問:既然你咁熱愛電影,你覺得入咗行之後,唔係再以觀眾身份欣賞電影,有啲咩不同之處或者會有咩影響?

以前自己仲係學生,中意睇咩戲就會主動去搵嚟睇。學生時代係吸收力最旺盛嘅時候,對於未來好有憧憬,又未至於全身投入電影圈,可以把握好多時間學習新事物。年輕人身體又好,記性又好,真係要好好珍惜!宜家因為工作好忙,少咗時間去搵自己中意嘅電影。電影已經唔只係娛樂,係工作,觀點會好唔同。入咗行之後會有好多壞習慣,例如睇戲嘅時候會留意到演員身上枝咪點樣擺,有時會心諗「枝咪凸晒出嚟喎」,真係好行內嘅嘢,係職業病。確實對自己欣賞電影有影響,不過又好有趣,呢啲係一般觀眾唔會留意到嘅嘢。

問:畀你再揀,你會享受做一般電影觀眾定係做全職電影演員?

我已經洗濕咗個頭喇!呢個行業實在太好玩,太吸引,係一個做夢嘅工場,做緊一個貼近現實嘅虛擬世界。作為一個演員,我可以唔做自己,可以發夢,更加可以了解真實嘅我係一個點樣嘅人。我成日都以為我好了解自己,但隨住拍戲嘅時候經驗增加,我對自己嘅發掘就更多。我唔後悔入行,雖然宜家世代好唔同,太多選擇,太多媒體,入戲院睇戲唔係唯一嘅娛樂。希望香港電影可以重奪觀眾嘅愛,而唔係得我哋一小撮人係到堅持。香港係我哋圓夢嘅地方。雖然今日嘅香港有好多唔愉快嘅事情,但係變相有好多好題材,令年輕觀眾留意香港嘅電影。

問:你希望自己喺香港電影業成為一個點樣嘅演員?

大家都未睇晒我做嘅角色,例如喺《末日派對》嘅我就癲癲地,《同班同學》嘅我就好內斂但對性有所渴求,《骨妹》嘅我就非常天真,嚟緊《智齒》裏面我嘅角色都好好玩。我唔驚被定形,呢啲係大明星先至要諗嘅嘢。以前我無咩資源同機會畀自己揀戲,咁宜家終於多咗選擇,又唔好玩又無錢嘅工作自己就未必會考慮喇(笑)。各位未來嘅導演,請搵我!

 

文:靈光

https://www.facebook.com/huxtin/

靈光一閃,正在尋找《光影星碎》後的《生死幻願》。

亞洲電影大獎 廖子妤 東京國際電影節 青年大使