電影熱話

【 MOVIE6 熱話 】專訪 郭富城 、 莊文強 話你知點解足足等咗十年先拍得成《 無雙 》製作假鈔過程極複雜

廣告:

專訪 郭富城 、 莊文強 話你知點解足足等咗十年先拍得成《 無雙 》製作假鈔過程極複雜

2008年, 莊文強 打算開拍一齣有關製作假鈔的電影,寫好了劇本初稿,卻等到2018年電影才順利完成並準備於10月上映。為甚麼《 無雙 》一等要等個十年? 郭富城 在《 無雙 》飾演一個畫假鈔的畫家李問,事前又需要多少時間的準備?今次專訪 郭富城 、 莊文強 話你知製作假鈔過程極複雜!

問:今次嘅合作係點樣促成嘅?

郭:莊文強一直都係我好欣賞嘅編劇同導演。有一次喺電影嘅聚會見到莊文強,佢同我講,不如合作吓啦。我心裏面好開心,因為我一直都好期待同一啲好叻嘅人合作,去考驗自己嘅演技。收到《無雙》劇本嘅時候,從心底裏感受到導演相信我可以駕馭甚至乎超越李問呢個角色。呢個劇本其實好複雜,我一共睇咗六次。以往睇劇本可能睇到第三次已經好明白,好清晰。呢個劇本我係睇咗六次之後,先至完全清晰了解李問呢個人物。

問:寫得到一個咁複雜嘅劇本,要做幾多 research?

莊:我一開始搵到三單唔同嘅做假鈔 case,全部都喺八、九十年代喺美國發生,喺每單 case 都拎咗啲有趣嘅部分,之後再做咗啲印刷術嘅 research。我最意想唔到嘅部分其實無拍到出嚟,就係造紙嘅部分。原來以前會有人喺街頭不斷問啲細路攞一蚊美金返去,攪碎再漂白去做假鈔。

問:點解要等十年嘅時間,《無雙》先至可以同觀眾見面?

莊:隔咗十年係因為當時呢個題材好敏感,製作好大,又無乜人信我。終於到2014年,有人信我喇,個題材又無咁敏感喇,咁咪可以開始籌備。原來「真做」比「假做」係平好多,所以我哋真係買咗部印刷機,買埋紙,自己做埋電版各樣嘢。咁啱我公司樓上樓下全部都係印刷廠,搵到幾個師傅做我哋顧問。最後印出嚟嘅錢,真係我哋自己印嘅。我哋美術組開咗八個月工,絕對係港產片少有。然後我哋都有知會金管局。原來美鈔唔屬於香港管轄範圍,但係我哋有部分場景喺加拿大同泰國拍攝,嗰邊係有相關法律嘅,只要細過真實美鈔 size 25%、上面個富蘭克林係歪嘴同埋有我哋公司 logo 喺上面就得。拍戲用好多假鈔嘅時候,你唔會睇到佢係真定假㗎嘛,大概嘅樣似就得,但係拍近鏡嘅時候梗係用真鈔啦。我哋用96年版嘅美金,都係要去古董鋪買返嚟。

問:郭富城扮畫家似模似樣,做咗幾多功課?

郭:哈哈,上網睇㗎啫。因為我哋無可能請一個畫畫老師去現場,又唔可以半夜三更叫佢過嚟即刻話畀你聽要點樣做。

莊:你係好著數嘅,因為你跳舞㗎嘛,模仿動作係特別叻。

郭:呢個真係天份,係上天畀我。我觀察得可能比較細緻,會睇到唔同畫家嘅手法或者眼神,記住,然後我就會擺落李問呢個角色身上。當然我都一定要落手去畫嘅。我哋拍攝嘅時候,每一個手勢,每一個感覺,全部都真係要去呈現出嚟。

莊:拍得唔好唔收貨㗎,有一場戲就足足拍咗四轉。

郭:要去清邁拍攝之前,咁啱我又要去巡迴演出。其實一個演員,喺拍攝時候都唔係好想走出角色,但係表演已經一早 mark 咗。上台唱歌跳舞,喺舞台上你一定要畀觀眾睇到你嘅開心、你嘅能量,但係你演緊嘅角色就會甩咗。一表演完我就要去清邁拍一個重要嘅鏡頭。拍完一次,我覺得未夠好,角色有啲甩甩哋。最後收工又補一次,唔得,第二日再補一次。

莊:佢OK咗之後,自己行埋一邊話「我以後都唔走啦」(哈)。

問:畫假畫係唔係真藝術?

郭:就角色嚟講,李問可以畫到同真品無異嘅假畫,只不過佢做嘅作品唔係原創,唔係屬於自己。畫假畫先至有人識欣賞,係有啲無奈,但係比你超越到原創又如何?如果無人欣賞,例如我做一個演員,無人欣賞我嘅演出,都係徒勞,其實每一行都會有呢個情況出現。畫畫係一種藝術,演出都係一種藝術,電影都係一種藝術,最緊要都係有人欣賞,擁有嗰種滿足感。就算係欣賞你嘅假畫,某程度上都係欣賞你嘅畫功,亦即係欣賞緊你。

問:咁一個同真人一模一樣嘅替身又可唔可以取代真人?

郭:如果真係一模一樣,動作又一樣,聲音又一樣⋯⋯咁咪當佢一樣囉(笑)。

莊:真同假其實同感情有關。如果世界上真同假係分得咁清楚,我哋呢行就無得做啦。

郭:尤其係電影啦。電影裏面嘅嘢係要創造出嚟,假嘅嘢喺電影世界裏面就係真實。

問:電影裏面發哥話「大部分成功嘅男人都只係為咗女人而打拼」,你哋點睇呢句說話?

莊:呢個係人類基本生態結構,你梗係為咗你另一半去做任何嘢。喺原始時代,你為咗家庭,要出去打獵、搵食,如果唔係會死㗎嘛。

郭:係人類一個好基本嘅嘢嚟⋯⋯

莊:你宜家明啲啦?

郭:我完全明白(笑),所以我都好認同。我體會到,所以我嘅演繹都應該係恰如其分。

 

 

場地提供:香港嘉里酒店

髮型: Ian Wong @ii Salon

化妝 : 郭艷君

服裝 : HUGO BOSS

 

文:靈光

https://www.facebook.com/huxtin/

靈光一閃,正在尋找《光影星碎》後的《生死幻願》。

4.2
無雙
2340 482
無雙 莊文強 郭富城