電影熱話

【 MOVIE6 熱話 】Netflix 原創影集《 惡鬼收押所 》報仇化身食屍鬼

廣告:

Netflix 原創影集《 惡鬼收押所 》報仇化身食屍鬼

「孟蘭節氣魄更壯」,農曆七月嘅時候我哋膽粗粗去睇 Netflix 原創驚慄影集《 惡鬼收押所 》。呢套影集除咗鬼怪造型逼真同唔少血腥情節,亦包含唔同宗教、政治同社會等議題。為咗更了解電影背後嘅故事,我們訪問咗《惡鬼收押所》嘅導演Patrick Graham。

點解會用阿拉伯食屍鬼的傳說作為題材?係咪你自己對於食屍鬼呢樣有特別深刻的印象?

我拍呢套戲之前係完全唔知「Ghoul」呢個字點解同邊度黎。查返一啲阿拉伯神話同民間故事先發現呢個字好有趣,因為佢哋有唔同嘅版本,變得好混淆。呢個最原始嘅神話裡面有一樣好特別嘅嘢,就係佢可以變成宿主。對我係完美嘅題材,因為我好中意次類型電影,就好似《怪形》同《天外魔花》咁。

你係點樣將一個傳說中嘅怪物,變成係劇集中嘅嗰個樣呢?點同設計師溝通?

我係第一個設計師,然後我哋嘅視覺效果設計師有Vijesh Rajan同Yashoda Parthasarthy,佢哋嘗試描繪咗好多唔同版本嘅食屍鬼,參考咗《屍城30夜》、《撒冷地》、《鬼遮眼》同好多其他電影,再做咗graphic renditions,睇下食屍鬼喺唔同演員身上會係咩樣。我哋搵到個最滿意嘅設計:黑眼、黑色口水、面色蒼白做主要特徵。

然後我哋搵咗新德里嘅Studio Hash幫我哋整非常精美嘅模型。呢班人為呢部作品做咗好出色嘅創作,我覺得我要為我哋最後製作出外觀咁細緻嘅魔鬼而感到自豪,每一隻魔鬼都會根據宿主不同而有唔一樣嘅外觀。

拍嘅時候,點樣令演員們可以有恐懼嘅感覺?始終好多東西都要靠後期特效,但拍嘅時候點令佢地入戲呢?

哈哈,其實我好幼稚,我基本上真係好中意嚇啲演員特別係Radhika。例如有幾場戲我哋都試過嚇佢,好有滿足感。有場係Radhika爸爸嘅鬼魂係黑暗中出嚟,Radhika要表現得好驚同落床。所以我靜到冇人發覺之下行到佢床邊,然後用盡全力咁大嗌。然後Radhika嚇到跌咗落床。

另一次就係走廊追逐戲。我哋真係叫扮演Faulad Singh嘅演員Surender Thakur追住佢。第一個take佢自己嗌cut,因為冇諗過咁恐怖。

除咗食屍鬼傳說外,你覺得仲有咩特別嘅恐怖傳說可以拍出嚟呢?香港觀眾對於第2個國家嘅獨特文化故事都會特別好奇!

我諗食屍鬼最好嘅就係佢嚟自神話,充滿可能性去擴大佢嘅世界,可以創造其他唔同個性嘅惡魔,食屍鬼呢個角色都有好多可以發展。

但將來我都係好想創造一個人人都會記得嘅現代恐怖怪物,就好似溫子仁好成功喺「詭屋驚凶實錄」系列創作咗唔同鬼怪例如「詭修女」;丹尼波爾成功喺《28日後》重塑喪屍嘅形象;喺日本有經典嘅貞子同伽椰子。但都好難超越《猛鬼街》嘅Freddy、《猛鬼追魂》嘅Pinhead、《月光光心慌慌》嘅Michael Myers、《黑色星期五》嘅Jason Voorhees、《德州電鋸殺人狂》嘅Leatherface、《活死人之夜》等等好多經典。如果我創造嘅角色可以上到神枱,絕對係完成左人生願望清單一項。

電影主題都涉及宗教歧視、隔離等議題,其實係咪反映好多你對社會嘅控訴?

有,但冇特定指邊個國家或者政府。我有嘗試寫出我對影響緊全球嘅右翼政權嘅不滿、對公民權利同言論自由被打壓嘅不滿、對現今全球恐懼伊斯蘭嘅不滿。我唔係想支持或者反對某一個宗教。即使呢個作品有一個宗教背景,我嘅宗旨係營造一種氣氛唔錯嘅娛樂畀我嘅觀眾可以留意同欣賞。畢竟我又唔係學者或者知識分子。

 

Netflix 惡鬼收押所